Etna 山 天頂 ê ZTF 彗星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Comet ZTF over Mount Etna
• 影像來源 kah 版權：Dario Giannobile
• ZTF 彗星 ê 相簿：投稿予 APOD ê 相片
• 台文翻譯：An-Li Tsai (NCU)

[漢羅] Etna 山 天頂 ê ZTF 彗星

這个寒冷 ê 山景 kah 夜景是 tī 地球 ê Etna 火山，山頂有 像彗鬚 ê 雪煙 噴出來。 這張影像是 kā tī 1 月 23 這个冷吱吱 ê 暗暝翕--ê 幾若張 獨立 感光 ê 相片疊做伙--ê。 有翕著 tī Etna 雪山 山腹 天頂彼粒 會當用目睭直接看著 ê ZTF 彗星。 是講 日光若變較強，抑是太陽風變較強，會予彗星 ê 青色彗鬚 kah 闊尾 ê 塗粉尾溜變較明顯。 這禮拜 ê 拜六禮拜，ZTF 彗星會迒過北天 ê 北極星 kah 北斗星 之間。 是講 tī 較暗 ê 所在，你干焦會看著 霧霧、無連紲 ê 結構。 毋過就算干焦是按呢，這嘛是一件足重要 ê 代誌。 因為你是直接用你 ê 目睭 leh 看 一位 ùi 遙遠 Oort 雲 來 ê 人客。 是講 這幾工，你若是會當用雙筒千里鏡抑是細台天文望遠鏡 kā 看，你會閣較享受 ZTF 彗星 ê 景色。

[POJ] Etna soaⁿ thiⁿ-téng ê ZTF hūi-chhiⁿ

Chit ê hân-léng ê soaⁿ-kéng kah iā-kéng sī tī Tē-kiû ê Etna hóe-soaⁿ, soaⁿ-téng ū chhiūⁿ hūi-chhiu ê soat-ian phùn--chhut-lâi. Chit tiuⁿ iáⁿ-siōng sī kā tī 1 goe̍h 23 chit ê léng-ki-ki ê àm-mî hip--ê kúi-ā tiuⁿ to̍k-li̍p kám-kng ê siòng-phìⁿ tha̍h chò-hóe--ê. Ū hip-tio̍h tī Etna soat-soaⁿ soaⁿ-pak thiⁿ-téng hit-lia̍p ē-tàng iōng ba̍k-chiu ti̍t-chiap khòaⁿ--tio̍h ê ZTF hūi-chhiⁿ. Sī kóng ji̍t-kng nā piàn khah kiông, ia̍h-sī thài-iông-hong piàn khah kiông, ē hō͘ hūi-chhiⁿ ê chhiⁿ-sek hūi-chhiu kah khoah-bóe ê thô͘-hún-bóe-liu piàn khah bêng-hián. Chit lé-pài ê pài-la̍k, ZTF hūi-chhiⁿ ē hāⁿ kòe pak-thian ê Pak-ke̍k-chhiⁿ kah Pak-táu-chhiⁿ chi-kan. Sī kóng tī khah àm ê só͘-chāi, lí kan-na ē khòaⁿ-tio̍h bū-bū, bô liân-sòa ê kiat-kò͘. M̄-koh to̍h sǹg kan-na sī án-ni, che mā-sī chi̍t kiāⁿ chiok tiōng-iàu ê tāi-chì. In-ūi lí sī ti̍t-chiap iōng lí ê ba̍k-chiu leh khòaⁿ chi̍t ūi ùi iâu-oán Oort hûn lâi ê lâng-kheh. Sī kóng chit kúi kang, lí nā-sī ē-tàng iōng siang-tâng-chhian-lí-kiàⁿ ia̍h-sī sè-tâi thian-bûn bōng-oán-kiàⁿ kā khòaⁿ, lí ē koh khah hiáng-siū ZTF hūi-chhiⁿ ê kéng-sek.

[KIP] Etna suann thinn-tíng ê ZTF huī-tshinn

Tsit ê hân-líng ê suann-kíng kah iā-kíng sī tī Tē-kiû ê Etna hué-suann, suann-tíng ū tshiūnn huī-tshiu ê suat-ian phùn--tshut-lâi. Tsit tiunn iánn-siōng sī kā tī 1 gue̍h 23 tsit ê líng-ki-ki ê àm-mî hip--ê kuí-ā tiunn to̍k-li̍p kám-kng ê siòng-phìnn tha̍h tsò-hué--ê. Ū hip-tio̍h tī Etna suat-suann suann-pak thinn-tíng hit-lia̍p ē-tàng iōng ba̍k-tsiu ti̍t-tsiap khuànn--tio̍h ê ZTF huī-tshinn. Sī kóng ji̍t-kng nā piàn khah kiông, ia̍h-sī thài-iông-hong piàn khah kiông, ē hōo huī-tshinn ê tshinn-sik huī-tshiu kah khuah-bué ê thôo-hún-bué-liu piàn khah bîng-hián. Tsit lé-pài ê pài-la̍k, ZTF huī-tshinn ē hānn kuè pak-thian ê Pak-ki̍k-tshinn kah Pak-táu-tshinn tsi-kan. Sī kóng tī khah àm ê sóo-tsāi, lí kan-na ē khuànn-tio̍h bū-bū, bô liân-suà ê kiat-kòo. M̄-koh to̍h sǹg kan-na sī án-ni, tse mā-sī tsi̍t kiānn tsiok tiōng-iàu ê tāi-tsì. In-uī lí sī ti̍t-tsiap iōng lí ê ba̍k-tsiu leh khuànn tsi̍t uī uì iâu-uán Oort hûn lâi ê lâng-kheh. Sī kóng tsit kuí kang, lí nā-sī ē-tàng iōng siang-tâng-tshian-lí-kiànn ia̍h-sī sè-tâi thian-bûn bōng-uán-kiànn kā khuànn, lí ē koh khah hiáng-siū ZTF huī-tshinn ê kíng-sik.

[English] Comet ZTF over Mount Etna

Comet-like plumes are blowing over the volcanic peaks of Mount Etna in this wintry mountain-and-skyscape from planet Earth. The stacked and blended combination of individual exposures recorded during the cold night of January 23, also capture naked-eye Comet ZTF just above Etna's snowy slopes. Of course increasing sunlight and the solar wind are responsible for the comet's greenish coma and broad dusty tail. This weekend Comet ZTF is dashing across northern skies between north star Polaris and the Big Dipper. From a dark site you can only just spot it as a fuzzy patch though. That's still an impressive achievement if you consider you are gazing at a visitor from the distant Oort cloud with your own eyes. But binoculars or a small telescope will make for an even more enjoyable view of this Comet ZTF in the coming days.

詞彙學習