相挵 ê 捲螺仔星系 Arp 274

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Colliding Spiral Galaxies of Arp 274
• 影像來源：NASA, ESA, Hubble; 資料處理 kah 版權：Mehmet Hakan Özsaraç
• 台文翻譯：An-Li Tsai (NCU)

[漢羅] 相挵 ê 捲螺仔星系 Arp 274

這張上新 ê 影像是兩个 tī 室女座相戰 ê 星系。 兩个 星系相挵 ê 時陣，星系內底 ê 恆星其實袂相碰。 這是因為 星系 其實是一个足櫳 ê 結構，這寡發光 ê 恆星其實佔星系內底足少 ê 空間。 毋過星系 相挵 ê 時陣，一个星系 ê 引力會 kā 另外一个星系搝甲變形，兩个 星系 ê 塗粉 kah 氣體嘛會 相碰。 兩个星系若是 合併，星系中心 ê 烏洞 嘛會合併。 因為兩个星系 ê 距離是差足遠--ê，所以你看著 這張影像內底 ê 變形其實是一个 足慢 ê 過程，超過幾若億年遐爾久。 除了這兩个 大型 ê 捲螺仔星系 以外，影像 內底第三个較細 ê 星系，就 tī Arp 274 (NGC 5679) ê 倒爿。 Tī 室女座 ê Arp 274 有 20 萬 光年 闊，離咱有 4 億光年遠。

[POJ] Sio-lòng ê Kńg-lê-á seng-hē Arp 274

Chit tiuⁿ siōng sin ê iáⁿ-siōng sī nn̄g ê tī Sek-lú-chō sio-chiàn ê seng-hē. Nn̄g ê seng-hē sio-lòng ê sî-chūn, seng-hē lāi-té ê hêng-chheⁿ kî-si̍t bē sio-pōng. Che sī in-ūi seng-hē kî-si̍t sī chi̍t ê chiok lang ê kiat-kò͘, chi̍t-kóa hoat-kng ê hêng-chheⁿ kî-si̍t chiàm seng-hē lāi-té chiok chió ê khong-kan. M̄-koh seng-hē sio-lòng ê sî-chūn, chit ê seng-hē ê ín-le̍k ē kā lēng-gōa chi̍t ê seng-hē giú kah piàn-hêng, nn̄g ê seng-hē ê thô͘-hún kah khì-thé mā ē sio-pōng. Nn̄g ê seng-hē nā-sī ha̍p-pèng, seng-hē tiong-sim ê o͘-tōng mā ē ha̍p-pèng. In-ūi nn̄g ê seng-hē ê kū-lī sī chha chiok hn̄g--ê, só͘-í lí khòaⁿ-tio̍h chit tiuⁿ iáⁿ-siōng lāi-té ê piàn-hêng kî-si̍t sī chit ê chiok bān ê kòe-têng, chhiau-kòe kúi-ā ek nî hiah-nī kú. Tû-liáu chi̍t nn̄g ê tōa-hêng ê kńg-lê-á seng-hē í-gōa, iáⁿ-siōng lāi-té tē saⁿ ê khah sè ê seng-hē, to̍h tī Arp 274 (NGC 5679) ê tò-pêng. Tī Sek-lú-chō ê Arp 274 ū 20 bān kng-nî khoah, lī lán ū 4 ek kng-nî hn̄g.

[KIP] Sio-lòng ê Kńg-lê-á sing-hē Arp 274

Tsit tiunn siōng sin ê iánn-siōng sī nn̄g ê tī Sik-lú-tsō sio-tsiàn ê sing-hē. Nn̄g ê sing-hē sio-lòng ê sî-tsūn, sing-hē lāi-té ê hîng-tshenn kî-si̍t bē sio-pōng. Tse sī in-uī sing-hē kî-si̍t sī tsi̍t ê tsiok lang ê kiat-kòo, tsi̍t-kuá huat-kng ê hîng-tshenn kî-si̍t tsiàm sing-hē lāi-té tsiok tsió ê khong-kan. M̄-koh sing-hē sio-lòng ê sî-tsūn, tsit ê sing-hē ê ín-li̍k ē kā līng-guā tsi̍t ê sing-hē giú kah piàn-hîng, nn̄g ê sing-hē ê thôo-hún kah khì-thé mā ē sio-pōng. Nn̄g ê sing-hē nā-sī ha̍p-pìng, sing-hē tiong-sim ê oo-tōng mā ē ha̍p-pìng. In-uī nn̄g ê sing-hē ê kū-lī sī tsha tsiok hn̄g--ê, sóo-í lí khuànn-tio̍h tsit tiunn iánn-siōng lāi-té ê piàn-hîng kî-si̍t sī tsit ê tsiok bān ê kuè-tîng, tshiau-kuè kuí-ā ik nî hiah-nī kú. Tû-liáu tsi̍t nn̄g ê tuā-hîng ê kńg-lê-á sing-hē í-guā, iánn-siōng lāi-té tē sann ê khah sè ê sing-hē, to̍h tī Arp 274 (NGC 5679) ê tò-pîng. Tī Sik-lú-tsō ê Arp 274 ū 20 bān kng-nî khuah, lī lán ū 4 ik kng-nî hn̄g.

[English] The Colliding Spiral Galaxies of Arp 274

Two galaxies are squaring off in Virgo and here are the latest pictures. When two galaxies collide, the stars that compose them usually do not. This is because galaxies are mostly empty space and, however bright, stars only take up only a small fraction of that space. But during the collision, one galaxy can rip the other apart gravitationally, and dust and gas common to both galaxies does collide. If the two galaxies merge, black holes that likely resided in each galaxy center may eventually merge. Because the distances are so large, the whole thing takes place in slow motion -- over hundreds of millions of years. Besides the two large spiral galaxies, a smaller third galaxy is visible on the far left of the featured image of Arp 274, also known as NGC 5679. Arp 274 spans about 200,000 light years across and lies about 400 million light years away toward the constellation of Virgo.

詞彙學習