海鷗星雲

Page(/daily/2023/01/20230119)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 海鷗星雲

這規片發光氣體塗粉雲,對 地球 ê 天文學家來講,看起來敢若是一隻鳥仔,所以伊才會提著這个外號,海鷗星雲。 這張影像是 tī 天狼星 ê 方向附近,大犬座 α 星 遐。 這張相片是 kā 3 張宇宙鳥仔 ê 狹頻影像資料疊出來 ê 拼鬥影像,攏總迒過銀河盤 2.5 度闊 ê 範圍。 這規片海鷗星雲去予編做 Sh2-296 抑是 IC 2177,應該是連紲 ê 超新星爆炸 產生幾若重 大型外殼結構 ê 一部份。 Tī 中央正爿下跤 彼个顯目 ê 藍色光弧,是 ùi 大犬座 FN 星 噴出來 ê 弓形衝擊波。 大犬座 FN 星是一粒 對伊邊仔 ê 星際介質來講,離開速度足緊 ê 恆星。 這个複雜 ê 氣體塗粉雲 kah 大犬座 ê OB1 星協 tī 天頂有 200 光年闊。 In 就 tī 離咱 3800 光年遠 ê 海鷗星雲 遐。

[POJ] Hái-o͘-seng-hûn

Che kui-phìⁿ hoat-kng khì-thé thô͘-hún hûn, tùi Tē-kiû ê thian-bûn ha̍k-ka lâi kóng, khòaⁿ–khí-lâi ká-ná sī chi̍t-chiah chiáu-á, só͘-í i chiah ē the̍h-tio̍h chit-ê gōa-hō, Hái-o͘-seng-hûn. Chit tiuⁿ iáⁿ-siōng sī tī Thian-lông-chhiⁿ ê hong-hiòng hù-kīn, Tāi-khián-chō alpha chhiⁿ hiah. Chit tiuⁿ siòng-phìⁿ sī kā 3 tiuⁿ ú-tiū chiáu-á ê e̍h-pîn iáⁿ-siōng chu-liāu tha̍h–chhut-lâi ê pheng-tàu-iáⁿ-siōng, lóng-chóng hāⁿ kòe Gîn-hô-pôaⁿ 2.5 tō͘ khoah ê hoān-ûi. Che kui-phìⁿ Hái-o͘-seng-hûn khì hō͘ pian chò Sh2-296 ia̍h-sī IC 2177, èng-kai sī liân-sòa ê chhiau-sin-seng po̍k-chà sán-seng kúi-ā têng tōa-hêng gōa-khak kiat-kò͘ ê chi̍t-pō͘-hūn. Tī tiong-ng chiàⁿ-pêng ē-kha hit-ê hiáⁿ-ba̍k ê nâ-sek kng-hô͘, sī ùi Tāi-khián-chō FN chhiⁿ phùn–chhut-lâi ê kiong-hêng chhiong-kek-pho. Tāi-khián-chō FN chhiⁿ sī chi̍t lia̍p tùi i piⁿ-á ê seng-chè-kài-chit lâi kóng, lī-khui sok-tō͘ chiok kín ê hêng-chhiⁿ. Chit ê ho̍k-cha̍p ê khì-thé thô͘-hún hûn kah Tāi-khián-chō ê OB1 seng-hia̍p tī thiⁿ-téng ū 200 kng-nî khoah. In to̍h tī lī lán 3800 kng-nî hn̄g ê Hái-o͘-seng-hûn hiah.

[KIP] Hái-oo-sing-hûn

Tse kui-phìnn huat-kng khì-thé thôo-hún hûn, tuì Tē-kiû ê thian-bûn ha̍k-ka lâi kóng, khuànn–khí-lâi ká-ná sī tsi̍t-tsiah tsiáu-á, sóo-í i tsiah ē the̍h-tio̍h tsit-ê guā-hō, Hái-oo-sing-hûn. Tsit tiunn iánn-siōng sī tī Thian-lông-tshinn ê hong-hiòng hù-kīn, Tāi-khián-tsō alpha tshinn hiah. Tsit tiunn siòng-phìnn sī kā 3 tiunn ú-tiū tsiáu-á ê e̍h-pîn iánn-siōng tsu-liāu tha̍h–tshut-lâi ê phing-tàu-iánn-siōng, lóng-tsóng hānn kuè Gîn-hô-puânn 2.5 tōo khuah ê huān-uî. Tse kui-phìnn Hái-oo-sing-hûn khì hōo pian tsò Sh2-296 ia̍h-sī IC 2177, ìng-kai sī liân-suà ê tshiau-sin-sing po̍k-tsà sán-sing kuí-ā tîng tuā-hîng guā-khak kiat-kòo ê tsi̍t-pōo-hūn. Tī tiong-ng tsiànn-pîng ē-kha hit-ê hiánn-ba̍k ê nâ-sik kng-hôo, sī uì Tāi-khián-tsō FN tshinn phùn–tshut-lâi ê kiong-hîng tshiong-kik-pho. Tāi-khián-tsō FN tshinn sī tsi̍t lia̍p tuì i pinn-á ê sing-tsè-kài-tsit lâi kóng, lī-khui sok-tōo tsiok kín ê hîng-tshinn. Tsit ê ho̍k-tsa̍p ê khì-thé thôo-hún hûn kah Tāi-khián-tsō ê OB1 sing-hia̍p tī thinn-tíng ū 200 kng-nî khuah. In to̍h tī lī lán 3800 kng-nî hn̄g ê Hái-oo-sing-hûn hiah.

[English] The Seagull Nebula

A broad expanse of glowing gas and dust presents a bird-like visage to astronomers from planet Earth, suggesting its popular moniker - The Seagull Nebula. Using narrowband image data, this 3-panel mosaic of the cosmic bird covers a 2.5 degree swath across the plane of the Milky Way, near the direction of Sirius, alpha star of the constellation Canis Major. Likely part of a larger shell structure swept up by successive supernova explosions, the broad Seagull Nebula is cataloged as Sh2-296 and IC 2177. The prominent bluish arc below and right of center is a bow shock from runaway star FN Canis Majoris. This complex of gas and dust clouds with other stars of the Canis Majoris OB1 association spans over 200 light-years at the Seagull Nebula’s estimated 3,800 light-year distance.

詞彙學習(漢羅/POJ/KIP/華語/English)

  • 【海鷗星雲】Hái-o͘-seng-hûn/Hái-oo-sing-hûn/海鷗星雲/the Seagull Nebula
  • 【天狼星】Thian-lông-chhiⁿ/Thian-lông-tshinn/天狼星/Sirius
  • 【大犬座 α 星】Tāi-khián-chō alpha chhiⁿ/Tāi-khián-tsō alpha tshinn/大犬座 α/alpha Canis Major
  • 【狹頻】e̍h-pîn/e̍h-pîn/窄頻/narrowband
  • 【拼鬥影像】pheng-tàu-iáⁿ-siōng/phing-tàu-iánn-siōng/馬賽克影像/mosaic
  • 【Sh2-296】S-H-two jī-kiú-lio̍k/S-H-two jī-kiú-lio̍k/Sh2-296/Sh2-296
  • 【IC 2177】I-C jī-it-chhit-chhit/I-C jī-it-tshit-tshit/IC 2177/IC 2177
  • 【超新星爆炸】chhiau-sin-seng po̍k-chà/tshiau-sin-sing po̍k-tsà/超新星爆炸/supernova explosion
  • 【大犬座 FN 星】Tāi-khián-chō F-N chhiⁿ/Tāi-khián-tsō F-N tshinn/大犬座 FN/FN Canis Majoris
  • 【弓形衝擊波】kiong-hêng chhiong-kek-pho/kiong-hîng tshiong-kik-pho/弓形衝擊波/bow shock
  • 【OB1 星協】OB-one seng-hia̍p/OB-one sing-hia̍p/OB1 星協/OB1 association
  • 【銀河盤】Gîn-hô-pôaⁿ/Gîn-hô-puânn/銀河盤/the plane of the Milky Way
  • 【星際介質】seng-chè-kài-chit/sing-tsè-kài-tsit/星際介質/interstellar medium

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:MACS0647:Webb 太空望遠鏡翕著--ê 宇宙早期 ê 重力透鏡效應 明仔載 ê 圖:星系相戰:M81 kah M82