MACS0647：Webb 太空望遠鏡翕著--ê 宇宙早期 ê 重力透鏡效應

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：MACS0647: Gravitational Lensing of the Early Universe by Webb
• 影像來源：NASA, ESA, CSA, Dan Coe (STScI), Rebecca Larson (UT), Yu-Yang Hsiao (JHU); Processing: Alyssa Pagan (STScI); Text: Michael Rutkowski (Minn. St. U. Mankato
• 探索你 ê 宇宙：APOD 亂數產生器
• 台文翻譯：An-Li Tsai (NCUap230118.html)

[漢羅] MACS0647：Webb 太空望遠鏡翕著--ê 宇宙早期 ê 重力透鏡效應

咱會當 ùi 這張 James Webb 太空望遠鏡 (JWST) 最近 翕--ê 紅外線多彩影像 看著星系團 MACS0647 造成 ê 重力透鏡效應。 前景 ê 大質量星系團，kā 背景遙遠星系 tī 視線方向發出 ê 光彎曲去。 背景星系 MACS0647-JD 看起來是去予星系團 ê 透鏡效應 彎曲 三擺。 MACS0647-JD 頭先 用 Hubble 太空望遠鏡 發現 ê 時陣，去 hŏng 認為是一个變形體。 毋過用 Webb 太空望遠鏡 看 ê 時陣，煞發現這个天體其實是 一對、或者是一陣細陣 ê 星系群。 這張 MACS0647-JD 內底 ê 天體，色彩攏無仝款，表示這寡星系可能是無仝年歲，抑是有無仝款 ê 塗粉 成份。 這寡新影像翕著 ê 星系實在是足少--ê，in 是 tī 大霹靂 發生了後 幾若億年 ê 時間內 產生 ê 星系。

[POJ] MACS0647: Webb Thài-khong Bōng-oán-kiàⁿ hip--tio̍h--ê ú-tiū chá-kî ê tiōng-le̍k thàu-kiàⁿ hāu-èng

Lán ē-tàng ùi chit tiuⁿ James Webb Thài-khong bōng-oán-kiàⁿ (JWST) chòe-kīn hip--ê âng-gōa-sòaⁿ to-chhái iáⁿ-siōng khòaⁿ-tio̍h seng-hē-thoân MACS0647 chō-sêng ê tiōng-le̍k-thàu-kiàⁿ hāu-èng. Chiân-kéng ê tōa-chit-liōng seng-hē-thoân, kā pōe-kéng iâu-oán seng-hē tī sī-sòaⁿ-hong-hiòng hoat--chhut ê kng oan-khiau khì. Pōe-kéng seng-hē MACS0647-JD khòaⁿ--khí-lâi sī khì hô͘ seng-hē-thoân ê thàu-kiàⁿ-hāu-èng oan-khiau saⁿ pái. MACS0647-JD thâu-seng iōng Hubble Thài-khong Bōng-oán-kiàⁿ hoat-hiān ê sî-chūn, khì hŏng jīn-ûi sī chit ê piàn-hêng-thé. M̄-koh iōng Webb Thài-khong Bōng-oán-kiàⁿ khòaⁿ ê sî-chūn, sòa hoat-hiān chit ê thian-thé kî-si̍t sī chi̍t-tùi, he̍k-chiá sī chi̍t tīn sè-tīn ê seng-hē-kûn. Chit tiuⁿ MACS0647-JD lāi-té ê thian-thé, sek-chhái lóng bô-kâng, piau-sī chit-kóa seng-hē khó-lêng sī bô-kâng nî-hòe, ia̍h-sī ū bô-kâng-khoán ê thô͘-hún sêng-hūn. Chit-kóa sin iáⁿ-siōng hip-tio̍h ê seng-hē si̍t-chāi sī chiok chió--ê, in sī tī Tōa-phek-le̍k hoat-seng liáu-āu kúi-ā ek nî ê sî-kan lāi sán-seng ê seng-hē.

[KIP] MACS0647: Webb Thài-khong Bōng-uán-kiànn hip--tio̍h--ê ú-tiū tsá-kî ê tiōng-li̍k thàu-kiànn hāu-ìng

Lán ē-tàng uì tsit tiunn James Webb Thài-khong bōng-uán-kiànn (JWST) tsuè-kīn hip--ê âng-guā-suànn to-tshái iánn-siōng khuànn-tio̍h sing-hē-thuân MACS0647 tsō-sîng ê tiōng-li̍k-thàu-kiànn hāu-ìng. Tsiân-kíng ê tuā-tsit-liōng sing-hē-thuân, kā puē-kíng iâu-uán sing-hē tī sī-suànn-hong-hiòng huat--tshut ê kng uan-khiau khì. Puē-kíng sing-hē MACS0647-JD khuànn--khí-lâi sī khì hôo sing-hē-thuân ê thàu-kiànn-hāu-ìng uan-khiau sann pái. MACS0647-JD thâu-sing iōng Hubble Thài-khong Bōng-uán-kiànn huat-hiān ê sî-tsūn, khì hŏng jīn-uî sī tsit ê piàn-hîng-thé. M̄-koh iōng Webb Thài-khong Bōng-uán-kiànn khuànn ê sî-tsūn, suà huat-hiān tsit ê thian-thé kî-si̍t sī tsi̍t-tuì, hi̍k-tsiá sī tsi̍t tīn sè-tīn ê sing-hē-kûn. Tsit tiunn MACS0647-JD lāi-té ê thian-thé, sik-tshái lóng bô-kâng, piau-sī tsit-kuá sing-hē khó-lîng sī bô-kâng nî-huè, ia̍h-sī ū bô-kâng-khuán ê thôo-hún sîng-hūn. Tsit-kuá sin iánn-siōng hip-tio̍h ê sing-hē si̍t-tsāi sī tsiok tsió--ê, in sī tī Tuā-phik-li̍k huat-sing liáu-āu kuí-ā ik nî ê sî-kan lāi sán-sing ê sing-hē.

[English] MAC0647: Gravitational Lensing of the Early Universe by Webb

Gravitational lensing by the galaxy cluster MACS0647 -- in which the massive foreground cluster distorts and lenses the light emitted by distant background galaxies along the line of sight — is on vivid display here in this recent multi-color infrared image from the James Webb Space Telescope (JWST). In particular, the background source MACS0647-JD is seen to be lensed three times by the cluster. When first discovered with the Hubble Space Telescope, MACS0647-JD was observed as an amorphous blob. With Webb though, this single source is revealed to be a pair or small group of galaxies. The colors of the MACS0647-JD objects are different as well -- indicating differences potentially in the age or dust content of these galaxies. These new images provide rare examples of galaxies in an era only a few 100 million years after the Big Bang.

詞彙學習