2023 年近日點 ê 太陽

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Perihelion Sun 2023
• 影像來源 kah 版權：Peter Ward (Barden Ridge Observatory)
• 台文翻譯：An-Li Tsai (NCU)

[漢羅] 2023 年近日點 ê 太陽

近日點就是地球離太陽上倚 ê 時陣。 2023 年 ê 近日點 是發生 tī 世界時 (UTC) 1 月 4 號 16:17。 這張清楚 ê 太陽盤影像，是望遠鏡鬥 H-α 濾光片 tī 澳洲 雪梨 翕–ê。 這張相片翕了了後 免 24 點鐘，地球就行到近日點。 H-α 濾光片 會 予 水素原子發出 ê 特別紅光 透過來。 這張太陽相片強調 ê 是太陽 ê 色球層，這是 tī 光球層 ê 頂懸層，嘛是平常時咱看著 ê 太陽表面。 太陽烏子 ê 寸尺 kah 行星是差不多大。 Tī 這張 活跳太陽 ê H-α 影像內底，烏子區附近較光 ê 斑，叫做譜斑。 你若是注意看太陽邊界，就會看著本底 tī 太陽盤表面 彎彎曲曲 ê 烏暗電漿絲，離開太陽邊界了後 就會變做光 iàⁿ-iàⁿ ê 日珥矣。

[POJ] 2023 nî Kīn-ji̍t-tiám ê Thài-iông

Kīn-ji̍t-tiám to̍h sī Tē-kiû lī Thài-iông siōng óa ê sî-chūn. 2023 nî ê kīn-ji̍t-tiám sī hoat-seng tī Sè-kài-sî (UTC) 1 goe̍h 4 hō 16:17. Chit tiuⁿ chheng-chhó ê thài-iông-pôaⁿ iáⁿ-siōng, sī bōng-oán-kiàⁿ tàu H-α lū-kng-phìⁿ tī Ò-chiu Soat-lî hip–ê. Chit tiuⁿ siòng-phìⁿ hip-liáu liáu-āu bián 24 tiám-cheng, Tē-kiû to̍h kiâⁿ kàu kīn-ji̍t-tiám. H-α lū-kng-phìⁿ ē hō͘ chúi-sò͘ goân-chú hoat–chhut ê te̍k-pia̍t âng-kng thàu–kòe-lâi. Chit tiuⁿ Thài-iông siòng-phìⁿ kiông-tiāu ê sī Thài-iông ê sek-kiû-chân, che sī tī kng-kiû-chân ê téng-koân-chân, mā-sī pêng-siông-sî lán khòaⁿ–tio̍h ê Thài-iông piáu-bīn. Thài-iông o͘-chú ê chhùn-chhioh kah kiâⁿ-chhiⁿ sī chha-put-to tōa. Tī chit tiuⁿ oa̍h-thiàu Thài-iông ê H-α iáⁿ-siōng lāi-té, o͘-chú-khu hù-kīn khah kng ê pan, kiò-chò phó͘-pan. Lí nā-sī chù-ì khòaⁿ Thài-iông pian-kài, to̍h ē khòaⁿ-tio̍h pún-té tī thài-iông-pôaⁿ piáu-bīn oan-oan-khiau-khiau ê o͘-àm tiān-chiuⁿ-si, lī-khui Thài-iông pian-kài liáu-āu to̍h ē piàn-chò kng-iàⁿ-iàⁿ ê ji̍t-ní ah.

[KIP] 2023 nî Kīn-ji̍t-tiám ê Thài-iông

Kīn-ji̍t-tiám to̍h sī Tē-kiû lī Thài-iông siōng uá ê sî-tsūn. 2023 nî ê kīn-ji̍t-tiám sī huat-sing tī Sè-kài-sî (UTC) 1 gue̍h 4 hō 16:17. Tsit tiunn tshing-tshó ê thài-iông-puânn iánn-siōng, sī bōng-uán-kiànn tàu H-α lū-kng-phìnn tī Ò-tsiu Suat-lî hip–ê. Tsit tiunn siòng-phìnn hip-liáu liáu-āu bián 24 tiám-tsing, Tē-kiû to̍h kiânn kàu kīn-ji̍t-tiám. H-α lū-kng-phìnn ē hōo tsuí-sòo guân-tsú huat–tshut ê ti̍k-pia̍t âng-kng thàu–kuè-lâi. Tsit tiunn Thài-iông siòng-phìnn kiông-tiāu ê sī Thài-iông ê sik-kiû-tsân, tse sī tī kng-kiû-tsân ê tíng-kuân-tsân, mā-sī pîng-siông-sî lán khuànn–tio̍h ê Thài-iông piáu-bīn. Thài-iông oo-tsú ê tshùn-tshioh kah kiânn-tshinn sī tsha-put-to tuā. Tī tsit tiunn ua̍h-thiàu Thài-iông ê H-α iánn-siōng lāi-té, oo-tsú-khu hù-kīn khah kng ê pan, kiò-tsò phóo-pan. Lí nā-sī tsù-ì khuànn Thài-iông pian-kài, to̍h ē khuànn-tio̍h pún-té tī thài-iông-puânn piáu-bīn uan-uan-khiau-khiau ê oo-àm tiān-tsiunn-si, lī-khui Thài-iông pian-kài liáu-āu to̍h ē piàn-tsò kng-iànn-iànn ê ji̍t-ní ah.

[English] Perihelion Sun 2023

Perihelion for 2023, Earth’s closest approach to the Sun, was on January 4 at 16:17 UTC. That was less than 24 hours after this sharp image of the Sun’s disk was recorded with telescope and H-alpha filter from Sidney, Australia, planet Earth. An H-alpha filter transmits a characteristic red light from hydrogen atoms. In views of the Sun it emphasizes the Sun’s chromosphere, a region just above the solar photosphere or normally visible solar surface. In this H-alpha image of the increasingly active Sun planet-sized sunspot regions are dominated by bright splotches called plages. Dark filaments of plasma snaking across the solar disk transition to bright prominences when seen above the solar limb.

詞彙學習（漢羅/POJ/KIP/華語/English）

• 【近日點】kīn-ji̍t-tiám/kīn-ji̍t-tiám/近日點/perihelion
• 【世界時】Sè-kài-sî/Sè-kài-sî/世界時/Universal Time Coordinated (UTC)
• 【太陽盤】thài-iông-pôaⁿ/thài-iông-puânn/太陽盤/solar disk
• 【濾光片】lū-kng-phìⁿ/lū-kng-phìnn/濾片/filter
• 【H-α】H-alpha/H-alpha/H-α/H-alpha
• 【水素】chúi-sò͘/tsuí-sòo/氫/hydrogen
• 【色球層】sek-kiû-chân/sik-kiû-tsân/色球層/chromosphere
• 【光球層】kng-kiû-chân/kng-kiû-tsân/光球層/photosphere
• 【太陽烏子】thài-iông o͘-chú/thài-iông oo-tsú/太陽黑子/sunspot
• 【譜斑】phó͘-pan/phóo-pan/譜斑/plages
• 【電漿絲】tiān-chiuⁿ-si/tiān-tsiunn-si/絲狀結構的電漿/filaments of plasma
• 【日珥】ji̍t-ní/ji̍t-ní/日珥/prominences