你身軀內底 ê 元素 是 tùi 佗來--ê?

Page(/daily/2023/01/20230108)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 你身軀內底 ê 元素 是 tùi 佗來–ê?

你身軀內 ê 水素,會叫做 水素 就是因為你會當 tī 水分子內底揣著伊。 伊是 ùi 大霹靂 來–ê,是咱宇宙內底 上基本 ê 元素。 你身軀內 ê 炭素,是 ùi 恆星內部 ê 核融合 反應產生出來–ê,酸素 嘛是按呢來–ê。 你身軀內底大部份 ê 鐵,是足久以前、遙遠 ê 超新星 爆炸 產生–ê。 珠寶內底 ê 黃金,有可能是 ùi 中子星相碰產生–ê。 這个現象會發生 tī 短週期 ê gamma-光暴天體,抑是 重力波事件 內底。 咱身軀內底 ê 磷 kah 銅,雖然才一屑屑仔爾爾,毋過 in 是 維持性命 足重要 ê 元素這張週期表 ê 色彩,是用來標示 目前 所知影 ê 元素,可能是 ùi 佗位 ê 核反應 生出來–ê。 有一寡 元素,親像是 ,到底是 tī 佗位進行 核反應 才生出來–ê? 咱毋是蓋了解。 所以這就一直是科學家觀測 kah 電腦模擬 ê 研究主題之一。

[POJ] Lí sin-khu lāi-té ê Goân-sò͘ sī tùi to̍h ūi lâi–ê?

Lí sin-khu lāi ê chúi-sò͘, ē kiò-chò chúi-sò͘ to̍h sī in-ūi lí ē-tàng tī chúi hun-chú lāi-té chhōe-tio̍h i. I sī ùi Tōa-phek-le̍k lâi–ê, sī lán ú-tiū lāi-té siōng ki-pún ê goân-sò͘. Lí sin-khu lāi ê thòaⁿ-sò͘, sī ùi hêng-chheⁿ lōe-pō͘ ê he̍k-iông-ha̍p hoán-èng seⁿ–chhut-lâi–ê, sàng-sò͘ mā-sī án-ni lâi–ê. Lí sin-khu lāi-té tōa-pō͘-hūn ê thih, sī chiok kú í-chêng, iâu-oán ê chhiau-sin-seng po̍k-chà sán-seng–ê. Chu-pó lāi-té ê n̂g-kim, ū khó-lêng sī ùi tiong-chú-chheⁿ sio-pōng sán-seng–ê. Chit ê hiān-siōng ē hoat-seng tī té-chiu-kî ê gamma-kng-pō thian-thé, ia̍h-sī tiōng-le̍k-pho sū-kiāⁿ lāi-té. Lán sin-khu lāi-té ê lîn kah tâng, sui-jiân chiah chi̍t-sut-sut-á niā-niā m̄-koh in sī ûi-chhî sèⁿ-miā chiok tiōng-iàu ê goân-sò͘. Chit tiuⁿ chiu-kî-pió ê sek-chhái, sī iōng-lâi piau-sī bo̍k-chêng lán só͘ chai-iáⁿ ê goân-sò͘, khó-lêng sī ùi toh-ūi ê he̍k-hoán-èng seⁿ–chhut-lâi–ê. Ū chi̍t-kóa goân-sò͘, chhin-chhiūⁿ sī tâng, tàu-té sī tī toh-ūi chìn-hêng he̍k-hoán-èng chiah seⁿ–chhut-lâi–ê? Lán m̄-sī kài liáu-kái. Só͘-í che to̍h it-ti̍t sī kho-ha̍k-ka koan-chhek kah tiān-náu bô͘-gí ê gián-kiù chú-tê chi it.

[KIP] Lí sin-khu lāi-té ê Guân-sòo sī tuì to̍h uī lâi–ê?

Lí sin-khu lāi ê tsuí-sòo, ē kiò-tsò tsuí-sòo to̍h sī in-uī lí ē-tàng tī tsuí hun-tsú lāi-té tshuē-tio̍h i. I sī uì Tuā-phik-li̍k lâi–ê, sī lán ú-tiū lāi-té siōng ki-pún ê guân-sòo. Lí sin-khu lāi ê thuànn-sòo, sī uì hîng-tshenn luē-pōo ê hi̍k-iông-ha̍p huán-ìng senn–tshut-lâi–ê, sàng-sòo mā-sī án-ni lâi–ê. Lí sin-khu lāi-té tuā-pōo-hūn ê thih, sī tsiok kú í-tsîng, iâu-uán ê tshiau-sin-sing po̍k-tsà sán-sing–ê. Tsu-pó lāi-té ê n̂g-kim, ū khó-lîng sī uì tiong-tsú-tshenn sio-pōng sán-sing–ê. Tsit ê hiān-siōng ē huat-sing tī té-tsiu-kî ê gamma-kng-pō thian-thé, ia̍h-sī tiōng-li̍k-pho sū-kiānn lāi-té. Lán sin-khu lāi-té ê lîn kah tâng, sui-jiân tsiah tsi̍t-sut-sut-á niā-niā m̄-koh in sī uî-tshî sènn-miā tsiok tiōng-iàu ê guân-sòo. Tsit tiunn tsiu-kî-pió ê sik-tshái, sī iōng-lâi piau-sī bo̍k-tsîng lán sóo tsai-iánn ê guân-sòo, khó-lîng sī uì toh-uī ê hi̍k-huán-ìng senn–tshut-lâi–ê. Ū tsi̍t-kuá guân-sòo, tshin-tshiūnn sī tâng, tàu-té sī tī toh-uī tsìn-hîng hi̍k-huán-ìng tsiah senn–tshut-lâi–ê? Lán m̄-sī kài liáu-kái. Sóo-í tse to̍h it-ti̍t sī kho-ha̍k-ka kuan-tshik kah tiān-náu bôo-gí ê gián-kiù tsú-tê tsi it.

[English] Where Your Elements Came From

The hydrogen in your body, present in every molecule of water, came from the Big Bang. There are no other appreciable sources of hydrogen in the universe. The carbon in your body was made by nuclear fusion in the interior of stars, as was the oxygen. Much of the iron in your body was made during supernovas of stars that occurred long ago and far away. The gold in your jewelry was likely made from neutron stars during collisions that may have been visible as short-duration gamma-ray bursts or gravitational wave events. Elements like phosphorus and copper are present in our bodies in only small amounts but are essential to the functioning of all known life. The featured periodic table is color coded to indicate humanity’s best guess as to the nuclear origin of all known elements. The sites of nuclear creation of some elements, such as copper, are not really well known and are continuing topics of observational and computational research.

詞彙學習(漢羅/POJ/KIP/華語/English)

  • 【水素】chúi-sò͘/tsuí-sòo/氫/hydrogen
  • 【大霹靂】Tōa-phek-le̍k/Tuā-phik-li̍k/大霹靂/Big Bang
  • 【炭素】thòaⁿ-sò͘/thuànn-sòo/碳/carbon
  • 【核融合】he̍k-iông-ha̍p/hi̍k-iông-ha̍p/核融合/nuclear fusion
  • 【酸素】sàng-sò͘/sàng-sòo/氧/oxygen
  • 【鐵】thih/thih/鐵/iron
  • 【超新星爆炸】chhiau-sin-seng po̍k-chà/tshiau-sin-sing po̍k-tsà/超新星爆炸/supernova explosion
  • 【黃金】n̂g-kim/n̂g-kim/黃金/gold
  • 【中子星】tiong-chú-chheⁿ/tiong-tsú-tshenn/中子星/neutron star
  • 【gamma-光暴天體】gamma-kng-pō thian-thé/gamma-kng-pō thian-thé/伽瑪射線暴/gamma-ray bursts
  • 【重力波】tiōng-le̍k-pho/tiōng-li̍k-pho/重力波/gravitational wave
  • 【磷】lîn/lîn/磷/phosphorus
  • 【銅】tâng/tâng/銅/copper
  • 【週期表】chiu-kî-pió/tsiu-kî-pió/週期表/periodic table
  • 【核反應】he̍k-hoán-èng/hi̍k-huán-ìng/核反應/nuclear creation

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:踅地球低軌道 ê 太空站 明仔載 ê 圖:ZTF 彗星 ê 尾溜