挪威天頂 完整 ê 圓箍仔虹

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Full Circle Rainbow over Norway
• 影像來源 kah 版權：Lukas Moesch
• 台文翻譯：An-Li Tsai (NCU)

[漢羅] 挪威天頂 完整 ê 圓箍仔虹

你敢捌看過完整 ê 虹？ 一般咱 tī 地面干焦 會當看著 虹 ê 頂半節，因為向地面方向 ê 水滴較少。 咱若是 ùi 空中看，較有法度看著規个 360 度 ê 圓箍仔 虹。 這張相片是 9 月 ê 時陣 tiàm 挪威 Lofoten 島 ê 天頂，用 飛行翕相機 飛入去一陣雨內底，才翕著這个圓箍仔虹。 這个愛靠觀測者 ê 觀測角度才看會著 ê 現象，主要是 雨滴 tùi 日光 ê 內反射 造成--ê。 這个 虹 ê 直徑，佔天頂 ê 84 度闊。 日頭 就 kah 虹 ê 中心 tī 相對面 ê 方向。 遮閣有一个 sa-bì-suh 予你，tī 這輪虹 ê 外口閣有 第二輪虹。 伊較暗，而且色 ê 順序是倒反--ê。

[POJ] Ná-ui thiⁿ-téng oân-chéng ê Îⁿ-kho͘-á-khēng

Lí kám bat khòaⁿ kòe oân-chéng ê khēng? It-poaⁿ lán tī tē-bīn kan-na ē-tàng khòaⁿ-tio̍h khēng ê téng-pòaⁿ-chat, in-ūi hiòng tē-bīn hong-hiòng ê chúi-tih khah chió. Lán nā-sī ùi khong-tiong khòaⁿ, khah ū hoat-tō͘ khòaⁿ-tio̍h kui-ê 360 tō͘ ê îⁿ-kho͘-á-khēng. Chit tiuⁿ siòng-phìⁿ sī 9 goe̍h ê sî-chūn tiàm Ná-ui Lofoten tó ê thiⁿ-téng, iōng hui-hêng hip-siòng-ki poe ji̍p-khì chit-chūn hō͘ lāi-té, chiah hip-tio̍h chit ê îⁿ-kho͘-á-khēng. Chit ê ài khò koan-chhek-chiá ê koan-chhek kak-tō͘ chiah khòaⁿ-ē-tio̍h ê hiān-siōng, chú-iàu sī hō͘-tih tùi ji̍t-kng ê lōe-hoán-siā chō-sêng--ê. Chit ê khēng ê ti̍t-kèng, chiàm thiⁿ-téng ê 84 tō͘ khoah. Ji̍t-thâu to̍h kah khēng ê tiong-sim tī sio-tùi-bīn ê hong-hiòng. Chia koh-ū chi̍t ê sa-bì-suh hō͘ lí, tī chit lián khēng ê gōa-kháu koh-ū tē jī lián khēng. I khah àm, jî-chhiáⁿ sek ê sūn-sī sī tò-péng--ê.

[KIP] Ná-ui thinn-tíng uân-tsíng ê ÎNN-khoo-á-khīng

Lí kám bat khuànn kuè uân-tsíng ê khīng? It-puann lán tī tē-bīn kan-na ē-tàng khuànn-tio̍h khīng ê tíng-puànn-tsat, in-uī hiòng tē-bīn hong-hiòng ê tsuí-tih khah tsió. Lán nā-sī uì khong-tiong khuànn, khah ū huat-tōo khuànn-tio̍h kui-ê 360 tōo ê înn-khoo-á-khīng. Tsit tiunn siòng-phìnn sī 9 gue̍h ê sî-tsūn tiàm Ná-ui Lofoten tó ê thinn-tíng, iōng hui-hîng hip-siòng-ki pue ji̍p-khì tsit-tsūn hōo lāi-té, tsiah hip-tio̍h tsit ê înn-khoo-á-khīng. Tsit ê ài khò kuan-tshik-tsiá ê kuan-tshik kak-tōo tsiah khuànn-ē-tio̍h ê hiān-siōng, tsú-iàu sī hōo-tih tuì ji̍t-kng ê luē-huán-siā tsō-sîng--ê. Tsit ê khīng ê ti̍t-kìng, tsiàm thinn-tíng ê 84 tōo khuah. Ji̍t-thâu to̍h kah khīng ê tiong-sim tī sio-tuì-bīn ê hong-hiòng. Tsia koh-ū tsi̍t ê sa-bì-suh hōo lí, tī tsit lián khīng ê guā-kháu koh-ū tē jī lián khīng. I khah àm, jî-tshiánn sik ê sūn-sī sī tò-píng--ê.

[English] A Full Circle Rainbow over Norway

Have you ever seen an entire rainbow? From the ground, typically, only the top portion of a rainbow is visible because directions toward the ground have fewer raindrops. From the air, though, the entire 360-degree circle of a rainbow is more commonly visible. Pictured here, a full-circle rainbow was captured over the Lofoten Islands of Norway in September by a drone passing through a rain shower. An observer-dependent phenomenon primarily caused by the internal reflection of sunlight by raindrops, the rainbow has a full diameter of 84 degrees. The Sun is in the exact opposite direction from the rainbow's center. As a bonus, a second rainbow that was more faint and color-reversed was visible outside the first.

詞彙學習