夜空中 上光 ê 25 粒星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：25 Brightest Stars in the Night Sky
• 影像來源 kah 版權：Tragoolchitr Jittasaiyapan
• 超空間：APOD 亂數產生器
• 台文翻譯：An-Li Tsai (NCU)

[漢羅] 夜空中 上光 ê 25 粒星

你敢知影這寡上光 ê 天星 ê 名？ 你可能知影。 有一寡仔 天星 ê 名，是老甲拄開始有 書寫系統 ê 時陣就有矣。 世界上足濟文化對這寡 上光 ê 天星 攏有 in 家己號名 ê 方式，而且知影 in ê 名 tī in ê 文化 kah 歷史佔足重要 ê 地位。 毋過，為著欲予全球 ê 人有較精確 ê 溝通，國際天文聯合會 (IAU) kā 這寡天星 ê 名標準化。 這張相片是這 25 粒 上光 ê 天星 kah IAU kā in 號 ê 名。 相片內底這寡天星 ê 色彩，是咱 人 目睭真正看著 ê 色彩。 有一寡天星 ê 名實在是 誠有意思，包括 天狼星 (tī 拉丁文 內底是臭火焦 ê 意思)，織女星 (tī 阿拉伯文 內底是落落去 ê 意思)，kah 心宿二 (tī 希臘文 內底是火星 ê 死對頭 ê 意思)。 有一粒你可能較熟 ê 是：北極星。 毋過伊無 tī 這張圖內底，因為伊無夠光。

[POJ] Iā-khong tiong siōng kng ê 25 lia̍p chhiⁿ

Lí kám chai-iáⁿ chit-kóa siōng kng ê thiⁿ-chhiⁿ ê miâ? Lí khó-lêng chai-iáⁿ. Ū chi̍t-kóa-á thiⁿ-chhiⁿ ê miâ, sī lāu kah tú khai-sí ū su-siá hē-thóng ê sî-chūn to̍h ū–ah. Sè-kài siōng chiok chōe bûn-hòa tùi chit-kóa siōng kng ê thiⁿ-chhiⁿ lóng ū in ka-tī hō-miâ ê hong-sek, jî-chhiáⁿ chai-iáⁿ in ê miâ tī in ê bûn-hòa kah le̍k-sú chiàm chiok tiōng-iàu ê tē-ūi. M̄-koh, ūi-tio̍h beh hō͘ choân-kiû ê lâng ū khah cheng-khak ê ko͘-thong, Kok-chè Thian-bûn liân-ha̍p-hōe (IAU) kā chit-kóa thiⁿ-chhiⁿ ê miâ piau-chún-hòa. Chit tiuⁿ siòng-phìⁿ sī chit 25 lia̍p siōng kng ê thiⁿ-chhiⁿ kah IAU kā in hō ê miâ. Siòng-phìⁿ lāi-té chit-kóa thiⁿ-chhiⁿ ê sek-chhái, sī lán lâng ba̍k-chiu chin-chiàⁿ khòaⁿ–tio̍h ê sek-chhái. Ū chi̍t-kóa thiⁿ-chhiⁿ ê miâ si̍t-chāi sī chiâⁿ ū ì-sù, pau-koat Thian-lông-chhiⁿ (tī La-teng-bûn lāi-té sī chhàu-hóe-ta ê ì-sù), Chit-lú-chhiⁿ (tī A-la-peh-bûn lāi-té sī lak-lo̍h-khì ê ì-sù), kah Sim-siù-jī (tī Hi-la̍h-bûn lāi-té sī Hóe-chhiⁿ ê sí-tùi-thâu ê ì-sù). Ū chi̍t-lia̍p lí khó-lêng khah se̍k ê sī: Pak-ke̍k-chhiⁿ. M̄-koh i bô tī chit tiuⁿ tô͘ lāi-té, in-ū i bô-kàu kng.

[KIP] Iā-khong tiong siōng kng ê 25 lia̍p tshinn

Lí kám tsai-iánn tsit-kuá siōng kng ê thinn-tshinn ê miâ? Lí khó-lîng tsai-iánn. Ū tsi̍t-kuá-á thinn-tshinn ê miâ, sī lāu kah tú khai-sí ū su-siá hē-thóng ê sî-tsūn to̍h ū–ah. Sè-kài siōng tsiok tsuē bûn-huà tuì tsit-kuá siōng kng ê thinn-tshinn lóng ū in ka-tī hō-miâ ê hong-sik, jî-tshiánn tsai-iánn in ê miâ tī in ê bûn-huà kah li̍k-sú tsiàm tsiok tiōng-iàu ê tē-uī. M̄-koh, uī-tio̍h beh hōo tsuân-kiû ê lâng ū khah tsing-khak ê koo-thong, Kok-tsè Thian-bûn liân-ha̍p-huē (IAU) kā tsit-kuá thinn-tshinn ê miâ piau-tsún-huà. Tsit tiunn siòng-phìnn sī tsit 25 lia̍p siōng kng ê thinn-tshinn kah IAU kā in hō ê miâ. Siòng-phìnn lāi-té tsit-kuá thinn-tshinn ê sik-tshái, sī lán lâng ba̍k-tsiu tsin-tsiànn khuànn–tio̍h ê sik-tshái. Ū tsi̍t-kuá thinn-tshinn ê miâ si̍t-tsāi sī tsiânn ū ì-sù, pau-kuat Thian-lông-tshinn (tī La-ting-bûn lāi-té sī tshàu-hué-ta ê ì-sù), Tsit-lú-tshinn (tī A-la-peh-bûn lāi-té sī lak-lo̍h-khì ê ì-sù), kah Sim-siù-jī (tī Hi-la̍h-bûn lāi-té sī Hué-tshinn ê sí-tuì-thâu ê ì-sù). Ū tsi̍t-lia̍p lí khó-lîng khah si̍k ê sī: Pak-ki̍k-tshinn. M̄-koh i bô tī tsit tiunn tôo lāi-té, in-ū i bô-kàu kng.

[English] 25 Brightest Stars in the Night Sky

Do you know the names of some of the brightest stars? It’s likely that you do, even though some bright stars have names so old they date back to near the beginning of written language. Many world cultures have their own names for the brightest stars, and it is culturally and historically important to remember them. In the interest of clear global communication, however, the International Astronomical Union (IAU) has begun to designate standardized star names. Featured here in true color are the 25 brightest stars in the night sky, currently as seen by humans, coupled with their IAU-recognized names. Some star names have interesting meanings, including Sirius (“the scorcher” in Latin, Vega (“falling” in Arabic, and Antares (“rival to Mars” in Greek. You are likely even familiar with the name of at least one star too dim to make this list: Polaris.

詞彙學習（漢羅/POJ/KIP/華語/English）

• 【國際天文聯合會】Kok-chè Thian-bûn Liân-ha̍p-hōe/Kok-tsè Thian-bûn Liân-ha̍p-huē/國際天文聯合會/International Astronomical Union (IAU)
• 【天狼星】Thian-lông-chhiⁿ/Thian-lông-tshinn/天狼星/Sirius
• 【織女星】Chit-lú-chhiⁿ/Tsit-lú-tshinn/織女星/Vega
• 【心宿二】Sim-siù-jī/Sim-siù-jī/心宿二/Antares
• 【北極星】Pak-ke̍k-chhiⁿ/Pak-ki̍k-tshinn/北極星/Polaris