雙生仔座流星雨

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Geminid
• 影像來源 kah 版權：Jeff Dai (TWAN)
• 台文翻譯：An-Li Tsai (NCU)

[漢羅] 雙生仔座流星雨

12 月 11 這工，獵戶座太空船 ùi 月球 轉來，伊用一秒鐘上加 11 公里 ê 速度入來到咱地球 ê 大氣層。 這个速度是這粒 產生長尾溜火流星 ê 塗粉粒 ê 速度 ê 一半。 伊 tī 12 月 13 這工入來到咱 ê 大氣層，這陣差不多是逐年 雙生仔座流星雨 上濟 ê 時陣。 咱這粒美麗 ê 行星逐年攏會 ùi 神祕 ê 小行星 3200 ê 塗粉軌跡行過。 所有雙生仔座流星 ê 平行軌跡，看起來攏是 ùi 雙生仔座 ê 輻射點來–ê。 毋過雙生仔座 ê 這兩粒星 這馬藏 tī 夜空倒爿 ê 樹林仔後壁，就 tī 中國雲南省 美麗 ê 藍月谷。 相片中央附近是拄 peh 起來 ê 獵戶座，伊 ê 成員星就反射 tī 山頂湖 平靜 ê 水面。 這張相片是月出進前翕–ê。 光-iàⁿ-iàⁿ ê 火星 猶原是天頂上光 ê 燈塔。

[POJ] Siang-siⁿ-á-chō Liû-chhiⁿ-hō͘

12 goe̍h 11 chit kang, La̍h-hō͘-chō thài-khong-chûn ùi Goe̍h-kiû tńg-lâi, i iōng chi̍t bió-cheng siōng ke 11 kong-lí ê sok-tō͘ ji̍p-lâi kàu lán Tē-kiû ê tōa-khì-chân. Chit ê sok-tō͘ sī chit-lia̍p sán-seng tn̂g-bóe-liu hóe-liû-chhiⁿ ê thô͘-hún-lia̍p ê sok-tō͘ ê chi̍t-pòaⁿ. I tī 12 goe̍h 13 chit-kang ji̍p-lâi kàu lán ê tōa-khì-chân, chit-chūn chha-put-to sī ta̍k-nî Siang-siⁿ-á-chō liû-chhiⁿ-hō͘ siōng chōe ê sî-chūn. Lán chit-lia̍p bí-lē ê kiâⁿ-chhiⁿ ta̍k-nî lóng ē ùi sîn-pì ê sió-kiâⁿ-chhiⁿ 3200 ê thô͘-hún kúi-jiah kiâⁿ-kòe. Só͘-ū Siang-siⁿ-á-chō liû-chhiⁿ ê pêng-hêng kúi-jiah, khòaⁿ–khí-lâi lóng sī ùi Siang-siⁿ-á-chō hok-siā lâi–ê. M̄-koh Siang-siⁿ-á-chō ê chit nn̄g-lia̍p chhiⁿ chit-má chhàng tī iā-khong tò-pêng ê chhiū-nâ-â āu-piah, to̍h tī Tiong-kok Hûn-lâm-séng bí-lē ê Nâ-goe̍h-kok. Siòng-phìⁿ tiong-ng hù-kīn sī tú peh–khí-lâi ê La̍h-hō͘-chō, i ê sêng-goân-chhiⁿ to̍h hoán-siā tī soaⁿ-téng ô͘ pêng-chēng ê chúi-bīn. Chit tiuⁿ siòng-phìⁿ sī goe̍h-chhut chìn-chêng hi̍p–ê. Kng-iàⁿ-iàⁿ ê Hóe-chhiⁿ iu-goân sī thiⁿ-téng siōng kng ê teng-thah.

[KIP] Siang-sinn-á-tsō Liû-tshinn-hōo

12 gue̍h 11 tsit kang, La̍h-hōo-tsō thài-khong-tsûn uì Gue̍h-kiû tńg-lâi, i iōng tsi̍t bió-tsing siōng ke 11 kong-lí ê sok-tōo ji̍p-lâi kàu lán Tē-kiû ê tuā-khì-tsân. Tsit ê sok-tōo sī tsit-lia̍p sán-sing tn̂g-bué-liu hué-liû-tshinn ê thôo-hún-lia̍p ê sok-tōo ê tsi̍t-puànn. I tī 12 gue̍h 13 tsit-kang ji̍p-lâi kàu lán ê tuā-khì-tsân, tsit-tsūn tsha-put-to sī ta̍k-nî Siang-sinn-á-tsō liû-tshinn-hōo siōng tsuē ê sî-tsūn. Lán tsit-lia̍p bí-lē ê kiânn-tshinn ta̍k-nî lóng ē uì sîn-pì ê sió-kiânn-tshinn 3200 ê thôo-hún kuí-jiah kiânn-kuè. Sóo-ū Siang-sinn-á-tsō liû-tshinn ê pîng-hîng kuí-jiah, khuànn–khí-lâi lóng sī uì Siang-sinn-á-tsō hok-siā lâi–ê. M̄-koh Siang-sinn-á-tsō ê tsit nn̄g-lia̍p tshinn tsit-má tshàng tī iā-khong tò-pîng ê tshiū-nâ-â āu-piah, to̍h tī Tiong-kok Hûn-lâm-síng bí-lē ê Nâ-gue̍h-kok. Siòng-phìnn tiong-ng hù-kīn sī tú peh–khí-lâi ê La̍h-hōo-tsō, i ê sîng-guân-tshinn to̍h huán-siā tī suann-tíng ôo pîng-tsīng ê tsuí-bīn. Tsit tiunn siòng-phìnn sī gue̍h-tshut tsìn-tsîng hi̍p–ê. Kng-iànn-iànn ê Hué-tshinn iu-guân sī thinn-tíng siōng kng ê ting-thah.

[English] The Geminid

Returning from beyond the Moon, on December 11 the Orion spacecraft entered Earth’s atmosphere at almost 11 kilometers per second. That’s half the speed of the grain of dust that created this long fireball meteor when it entered the atmosphere on December 13, near the peak of the annual Geminid meteor shower. As our fair planet makes its yearly pass through the dust trail of mysterious asteroid 3200 Phaethon, the parallel tracks of all Geminid meteors appear to radiate from a point in the constellation Gemini. But the twin stars of Gemini hide just behind the trees on the left in this night skyscape from the beautiful Blue Moon Valley, Yunnan, China. Reflected in the still waters of the mountain lake, stars of the constellation Orion are rising near center. Captured before moonrise, dazzling Mars is still the brightest celestial beacon in the scene.

詞彙學習（漢羅/POJ/KIP/華語/English）

• 【雙生仔座流星雨】Siang-siⁿ-á-chō liû-chhiⁿ-hō͘/Siang-sinn-á-tsō liû-tshinn-hōo/雙子座流星雨/Geminid meteor shower
• 【獵戶座太空船】La̍h-hō͘-chō thài-khong-chûn/La̍h-hōo-tsō thài-khong-tsûn/獵戶座太空船/the Orion spacecraft
• 【火流星】hóe-liû-chhiⁿ/hué-liû-tshinn/火流星/fireball meteor
• 【小行星 3200】sió-kiâⁿ-chhiⁿ/sió-kiânn-tshinn/小行星 3200/asteroid 3200 Phaethon
• 【輻射】hok-siā/hok-siā/輻射/radiate
• 【獵戶座】La̍h-hō͘-chō/La̍h-hōo-tsō/獵戶座/the constellation Orion