月圓 kah 火圓

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Full Moon, Full Mars
• 影像來源 kah 版權：Tomas Slovinsky
• 台文翻譯：An-Li Tsai (NCU)

[漢羅] 月圓 kah 火圓

12 月 8 號 是月圓 kah 火圓上倚 ê 時陣。 兩粒攏足光 ê，而且 in tī 地球天頂 攏 kah 太陽 tī 相對面。 實際上 火星去予月娘閘去矣。 咱若是 tiàm 歐洲 kah 北美洲一寡所在看，就會看著火星 ùi 月娘後壁行過。 若是 tiàm Slovakia 東爿 ê Kosice 市看，月掩火星 ê 現象就會發生 tī 日出進前。 這个迷人 ê 景色 就紀錄 tī 這个望遠鏡 ê 縮時攝影 ê 感光系列內底。 這粒紅色行星差不多消失 tī 月娘後壁一點鐘久，才閣 ùi 暖色調 ê 月圓邊仔 出現。 這个 2022 年上尾擺 ê 月圓，就 ùi 西爿地平線落去。 後一擺出現月掩火星 ê 時陣會 tī 1 月 3 號，彼陣 ê 月娘會是頂膨月。 是講 月掩星 干焦會 tiàm 地球表面一寡所在才看有。 1 月 3 號 ê 月掩火星愛 tī 南大西洋、南非、kah 印度洋 才看有。

[POJ] Goe̍h-îⁿ kah Hóe-îⁿ

12 goe̍h 8 hō sī goe̍h-îⁿ kah hóe-îⁿ siōng óa ê sî-chūn. Nn̄g-lia̍p lóng chiok kng–ê, jî-chhiáⁿ in tī Tē-kiû thiⁿ-téng lóng kah Thài-iông tī sio-tùi-bīn. Si̍t-chè-siōng Hóe-chhiⁿ khì hō͘ goe̍h-niû cha̍h khì ah. Lán nā-sī tiàm Au-chiu kah Pak-bí-chiu chi̍t-kóa só͘-chāi khòaⁿ, to̍h ē khòaⁿ-tio̍h Hóe-chhiⁿ ùi goe̍h-niû āu-piah kiâⁿ kòe. Nā-sī tiàm Slovakia tang-pêng ê Kosice chhī khòaⁿ, Goe̍h iám Hóe-chhiⁿ ê hiān-siōng to̍h ē hoat-seng tī ji̍t-chhut chìn-chêng. Chit ê bê-lâng ê kéng-sek to̍h kì-lo̍k tī chit ê bōng-oán-kiàⁿ ê sok-sî-liap-iáⁿ ê kám-kng hē-lia̍t lāi-té. Chit lia̍p âng-sek kiâⁿ-chheⁿ chha-put-to siau-sit tī goe̍h-niû āu-piah chi̍t tiám-cheng kú, chiah koh ùi loán-sek-tiāu ê goe̍h-îⁿ piⁿ-á chhut-hiān. Chit ê 2022 nî siōng bóe pái ê goe̍h-îⁿ, to̍h ùi sai-pêng tē-pêng-sòaⁿ lo̍h–khì. Āu chi̍t pái chhut-hiān Goe̍h iám Hóe-chhiⁿ ê sî-chūn ē tī 1 goe̍h 3 hō, hit-chūn ê goe̍h-niû ē sī téng-phòng-goe̍h. Sī kóng Goe̍h-iám-chhiⁿ kan-na ē tiàm Tē-kiû piáu-bīn chi̍t-kóa só͘-chāi chiah khòaⁿ-ū. 1 goe̍h 3 hō ê Goe̍h-iám-Hóe-chhiⁿ ài tī Lâm Tōa-se-iûⁿ, Lâm-hui, kah Ìn-tō͘-iûⁿ chiah khòaⁿ-ū.

[KIP] Gue̍h-înn kah Hué-înn

12 gue̍h 8 hō sī gue̍h-înn kah hué-înn siōng uá ê sî-tsūn. Nn̄g-lia̍p lóng tsiok kng–ê, jî-tshiánn in tī Tē-kiû thinn-tíng lóng kah Thài-iông tī sio-tuì-bīn. Si̍t-tsè-siōng Hué-tshinn khì hōo gue̍h-niû tsa̍h khì ah. Lán nā-sī tiàm Au-tsiu kah Pak-bí-tsiu tsi̍t-kuá sóo-tsāi khuànn, to̍h ē khuànn-tio̍h Hué-tshinn uì gue̍h-niû āu-piah kiânn kuè. Nā-sī tiàm Slovakia tang-pîng ê Kosice tshī khuànn, Gue̍h iám Hué-tshinn ê hiān-siōng to̍h ē huat-sing tī ji̍t-tshut tsìn-tsîng. Tsit ê bê-lâng ê kíng-sik to̍h kì-lo̍k tī tsit ê bōng-uán-kiànn ê sok-sî-liap-iánn ê kám-kng hē-lia̍t lāi-té. Tsit lia̍p âng-sik kiânn-tshenn tsha-put-to siau-sit tī gue̍h-niû āu-piah tsi̍t tiám-tsing kú, tsiah koh uì luán-sik-tiāu ê gue̍h-înn pinn-á tshut-hiān. Tsit ê 2022 nî siōng bué pái ê gue̍h-înn, to̍h uì sai-pîng tē-pîng-suànn lo̍h–khì. Āu tsi̍t pái tshut-hiān Gue̍h iám Hué-tshinn ê sî-tsūn ē tī 1 gue̍h 3 hō, hit-tsūn ê gue̍h-niû ē sī tíng-phòng-gue̍h. Sī kóng Gue̍h-iám-tshinn kan-na ē tiàm Tē-kiû piáu-bīn tsi̍t-kuá sóo-tsāi tsiah khuànn-ū. 1 gue̍h 3 hō ê Gue̍h-iám-Hué-tshinn ài tī Lâm Tuā-se-iûnn, Lâm-hui, kah Ìn-tōo-iûnn tsiah khuànn-ū.

[English] Full Moon, Full Mars

On December 8 a full Moon and a full Mars were close, both bright and opposite the Sun in planet Earth’s sky. In fact Mars was occulted, passing behind the Moon when viewed from some locations across Europe and North America. Seen from the city of Kosice in eastern Slovakia, the lunar occultation of Mars happened just before sunrise. The tantalizing spectacle was recorded in this telescopic timelapse sequence of exposures. It took about an hour for the Red Planet to disappear behind the lunar disk and then reappear as a warm-hued full Moon, the last full Moon of 2022, sank toward the western horizon. The next lunar occultation of bright planet Mars will be in the new year on January 3, when the Moon is in a waxing gibbous phase. Lunar occultations are only ever visible from a fraction of the Earth’s surface, though. The January 3 occultation of Mars will be visible from parts of the South Atlantic, southern Africa, and the Indian Ocean.

詞彙學習（漢羅/POJ/KIP/華語/English）

• 【月圓】goe̍h-îⁿ/gue̍h-înn/滿月/full Moon
• 【火圓】hóe-îⁿ/hué-înn/滿火星/full Mars
• 【頂膨月】téng-phòng-goe̍h/tíng-phòng-gue̍h/盈凸月/waxing gibbous phase
• 【掩星】iám-chhiⁿ/iám-tshinn/掩星/occultations
• 【縮時攝影】sok-sî-liap-iáⁿ/sok-sî-liap-iánn/縮時攝影/timelapse
• 【月掩火星】Goe̍h iám Hóe-chhiⁿ/Gue̍h iám Hué-tshinn/月掩火星/lunar occultation of Mars
• 【月掩星】Goe̍h-iám-chhiⁿ/Gue̍h-iám-tshinn/月掩星/Lunar occultations