美國號 kah 寧靜海

Page(/daily/2022/12/20221210)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 美國號 kah 寧靜海

Kā 你 ê 3D 目鏡 提來,咱來看這張 tī 別个世界 ê 立體影像。 50 冬前,阿波羅 17 號任務 ê 指揮官 Eugene Cernan tī 1972 年 12 月 11 欲降落月球進前踅月球一輾 ê 時陣,紀錄著 這張影像。 這組立體浮雕是 ùi 兩張相片 (AS17-147-22465, AS17-147-22466) 組合來–ê,是 伊 kah Harrison Schmitt 博士 tī 登月艙 挑戰號飛到上好地點翕–ê。 遐是 阿波羅 17 號 ê 降落地點Taurus-Littrow 山谷。 這个面對日光、寬闊 ê 南 Massif 山就 ùi 相片 中央附近 peh 起來。 倒爿是烏暗 ê Taurus-Littrow 山谷。 Ron Evans 駛–ê 踅月球行 ê 美國號指揮艙,就 tī 南 Massif 山 ê 山尖 頭前。 Tī 山脈後壁,月球邊緣彼搭,是月球 ê 寧靜海

[POJ] Bí-kok-hō kah Lêng-chêng-hái

Kā lí ê 3D ba̍k-kiàⁿ the̍h-lâi, lán lâi khòaⁿ chit tiuⁿ tī pa̍t ê sè-kài ê li̍p-thé iáⁿ-siōng. 50 tang chêng A-pho-lô 17 hō jīm-bū ê chí-hui-koaⁿ Eugene Cernan tī 1972 nî 12 goe̍h 11 beh kàng-lo̍h Goe̍h-kiû chìn-chêng se̍h Goe̍h-kiû chi̍t-liàn ê sî-chūn, kì-lo̍k tio̍h chit tiuⁿ iáⁿ-siōng. Chit cho͘ li̍p-thé phû-tiau sī ùi nn̄g tiuⁿ siòng-phìⁿ (AS17-147-22465, AS17-147-22466) cho͘-ha̍p lâi–ê, sī i kah Harrison Schmitt phok-sū tī Teng-goe̍h-chhng Thiáu-chiàn-hō poe kàu siōng hó tē-tiám hi̍p–ê. Hiah sī A-pho-lô 17 hō ê kàng-lo̍h tē-tiám, Taurus-Littrow soaⁿ-kok. Chit ê bīn-tùi ji̍t-kng, khoan-khoah ê Lâm Massif soaⁿ tō ùi siòng-phìⁿ tiong-ng hù-kīn peh–khí-lâi. Tò-pêng sī o͘-àm ê Taurus-Littrow soaⁿ-kok. Ron Evans sái–ê se̍h Goe̍h-kiû kiâⁿ ê Bí-kok-hō chí-hui-chhng, to̍h tī Lâm Massif soaⁿ ê soaⁿ-chiam thâu-chêng. Tī soaⁿ-me̍h āu-piah, Goe̍h-kiû pian-iân hit-tah, sī Goe̍h-kiû ê Lêng-chêng-hái.

[KIP] Bí-kok-hō kah Lîng-tsîng-hái

Kā lí ê 3D ba̍k-kiànn the̍h-lâi, lán lâi khuànn tsit tiunn tī pa̍t ê sè-kài ê li̍p-thé iánn-siōng. 50 tang tsîng A-pho-lô 17 hō jīm-bū ê tsí-hui-kuann Eugene Cernan tī 1972 nî 12 gue̍h 11 beh kàng-lo̍h Gue̍h-kiû tsìn-tsîng se̍h Gue̍h-kiû tsi̍t-liàn ê sî-tsūn, kì-lo̍k tio̍h tsit tiunn iánn-siōng. Tsit tsoo li̍p-thé phû-tiau sī uì nn̄g tiunn siòng-phìnn (AS17-147-22465, AS17-147-22466) tsoo-ha̍p lâi–ê, sī i kah Harrison Schmitt phok-sū tī Ting-gue̍h-tshng Thiáu-tsiàn-hō pue kàu siōng hó tē-tiám hi̍p–ê. Hiah sī A-pho-lô 17 hō ê kàng-lo̍h tē-tiám, Taurus-Littrow suann-kok. Tsit ê bīn-tuì ji̍t-kng, khuan-khuah ê Lâm Massif suann tō uì siòng-phìnn tiong-ng hù-kīn peh–khí-lâi. Tò-pîng sī oo-àm ê Taurus-Littrow suann-kok. Ron Evans sái–ê se̍h Gue̍h-kiû kiânn ê Bí-kok-hō tsí-hui-tshng, to̍h tī Lâm Massif suann ê suann-tsiam thâu-tsîng. Tī suann-me̍h āu-piah, Gue̍h-kiû pian-iân hit-tah, sī Gue̍h-kiû ê Lîng-tsîng-hái.

[English] America and the Sea of Serenity

Get out your red/blue glasses and check out this stereo view of another world. Fifty years ago the scene was recorded by Apollo 17 mission commander Eugene Cernan on December 11, 1972, one orbit before descending to land on the Moon. The stereo anaglyph was assembled from two photographs AS17-147-22465, AS17-147-22466 captured from his vantage point on board the Lunar Module Challenger as he and Dr. Harrison Schmitt flew over Apollo 17’s landing site in the Taurus-Littrow Valley. The broad, sunlit face of the mountain dubbed South Massif rises near the center of the frame, above the dark floor of Taurus-Littrow to its left. Piloted by Ron Evans, the Command Module America is visible in orbit in the foreground against the South Massif’s peak. Beyond the mountains, toward the lunar limb, lies the Moon’s Mare Serenitatis.

詞彙學習(漢羅/POJ/KIP/華語/English)

  • 【美國號】Bí-kok-hō/Bí-kok-hō/美國號/America
  • 【寧靜海】Lêng-chêng-hái/Lîng-tsîng-hái/寧靜海/the Sea of Serenity
  • 【阿波羅 17 號】A-pho-lô cha̍p-chhit hō/A-pho-lô tsa̍p-tshit hō/阿波羅 17 號/Apollo 17
  • 【指揮艙】chí-hui-chhng/tsí-hui-tshng/指揮艙/Command Module
  • 【立體浮雕】li̍p-thé phû-tiau/li̍p-thé phû-tiau/立體浮雕/stereo anaglyph
  • 【3D 目鏡】saⁿ-D ba̍k-kiàⁿ/sann-D ba̍k-kiànn/3D 眼鏡/red/blue glasses
  • 【挑戰號】Thiáu-chiàn-hō/Thiáu-tsiàn-hō/挑戰號/Challenger
  • 【指揮官】chí-hui-koaⁿ/tsí-hui-kuann/指揮官/commander
  • 【登月艙】Teng-goe̍h-chhng/Ting-gue̍h-tshng/登月艙/Lunar Module
  • 【山尖】soaⁿ-chiam/suann-tsiam/山峰/peak

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:火星 tùi 對月球後壁 peh 起來 明仔載 ê 圖:木衛一 Io 誠實 ê 色彩