合併星系組 IIZw096

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Merging Galaxy Pair IIZw096
• 影像來源：ESA/Webb, NASA & CSA, L. Armus, A. Evans
• 台文翻譯：An-Li Tsai (NCU)

[漢羅] 合併星系組 IIZw096

這組合併星系 佇紅外線波段是足光–ê，伊離咱有 5 億光年遠，佇海豬仔座 ê 方向。 這張相片內底，有 這組宇宙天體，有背景 ê 遙遠星系，閣有前景閃閃爍爍 ê 天星。 這張深空影像是 ùi James Webb 太空望遠鏡 來–ê。 這个星系合併有 10 億光年遐爾闊。 這張影像 ê 資料是 ùi Webb 太空望遠鏡 ê 近紅外線相機 (NIRCam) 佮 中紅外線儀器 (MIRI) 來–ê。 這張清楚 ê 紅外線合成影像內底有 kā 規个星系尺度攏翕起來。 內底有厚塗粉 ê 合併星系 ê 重組結構，包括有強烈形成恆星 ê 形成區 佮 去予搝甲變形 ê 捲螺仔手骨。

[POJ] Ha̍p-pèng seng-hē-chō IIZw096

Chit chō͘ ha̍p-pèng seng-hē tī âng-gōa-sòaⁿ pho-tōaⁿ sī chiok kng–ê, i lī lán ū 5 ek kng-nî hn̄g, tī hái-ti-á-chō ê hong-hiòng. Chit tiuⁿ siòng-phìⁿ lāi-té, ū chit chō͘ ú-tiū thian-thé, ū pōe-kéng ê iâu-oán seng-hē, koh ū chiân-kéng siám-siám-sih-sih ê thiⁿ-chheⁿ. Chit tiuⁿ chhim-khong iáⁿ-siōng sī ùi James Webb Thài-khong Bōng-oán-kiàⁿ lâi–ê. Chit ê seng-hē ha̍p-pèng ū 10 ek kng-nî hiah-nī khoah. Chit tiuⁿ iáⁿ-siōng ê chu-liāu sī ùi Webb Thài-khong Bōng-oán-kiàⁿ ê Kīn Âng-gōa-sòaⁿ Siòng-ki (WIRCam) kah Tiong Âng-gōa-sòaⁿ Gî-khì (MIRI) lâi–ê. Chit tiuⁿ chheng-chhó ê âng-gōa-sòaⁿ ha̍p-sêng iáⁿ-siōng lāi-té ū kā kui-ê seng-hē chhioh-tō͘ lóng hip–khí-lâi. Lāi-té ū kāu thô͘-hún ê ha̍p-pèng seng-hē ê têng-chō͘ kiat-kò͘, pau-koat ū kiông-lia̍t hêng-sêng hêng-chheⁿ ê hêng-sêng-khu kah khì hō͘ giú kah piàn-hêng ê kńg-lê-á chhiú-kut.

[KIP] Ha̍p-pìng sing-hē-tsō IIZw096

Tsit tsōo ha̍p-pìng sing-hē tī âng-guā-suànn pho-tuānn sī tsiok kng–ê, i lī lán ū 5 ik kng-nî hn̄g, tī hái-ti-á-tsō ê hong-hiòng. Tsit tiunn siòng-phìnn lāi-té, ū tsit tsōo ú-tiū thian-thé, ū puē-kíng ê iâu-uán sing-hē, koh ū tsiân-kíng siám-siám-sih-sih ê thinn-tshenn. Tsit tiunn tshim-khong iánn-siōng sī uì James Webb Thài-khong Bōng-uán-kiànn lâi–ê. Tsit ê sing-hē ha̍p-pìng ū 10 ik kng-nî hiah-nī khuah. Tsit tiunn iánn-siōng ê tsu-liāu sī uì Webb Thài-khong Bōng-uán-kiànn ê Kīn Âng-guā-suànn Siòng-ki (WIRCam) kah Tiong Âng-guā-suànn Gî-khì (MIRI) lâi–ê. Tsit tiunn tshing-tshó ê âng-guā-suànn ha̍p-sîng iánn-siōng lāi-té ū kā kui-ê sing-hē tshioh-tōo lóng hip–khí-lâi. Lāi-té ū kāu thôo-hún ê ha̍p-pìng sing-hē ê tîng-tsōo kiat-kòo, pau-kuat ū kiông-lia̍t hîng-sîng hîng-tshenn ê hîng-sîng-khu kah khì hōo giú kah piàn-hîng ê kńg-lê-á tshiú-kut.

[English] Merging Galaxy Pair IIZw096

Bright at infrared wavelengths, this merging galaxy pair is some 500 million light-years away toward the constellation Delphinus. The cosmic mashup is seen against a background of even more distant galaxies, and occasional spiky foreground stars. But the galaxy merger itself spans about 100,000 light-years in this deep James Webb Space Telescope image. The image data is from Webb’s Near-InfraRed Camera (NIRCam) and Mid-InfraRed Instrument (MIRI). Their combined, sharp infrared view follows galactic scale restructuring in the dusty merger’s wild jumble of intense star forming regions and distorted spiral arms.

詞彙學習（漢羅/POJ/KIP/華語/English）

• 【合併星系】ha̍p-pèng seng-hē/ha̍p-pìng sing-hē/合併星系/merging galaxies
• 【IIZw096】IIZw khòng-kiú-lio̍k/IIZw khòng-kiú-lio̍k/IIZw096/IIZw096
• 【海豬仔座】Hái-ti-á-chō/Hái-ti-á-tsō/海豚座/the constellation Delphinus
• 【James Webb 太空望遠鏡】James Webb Thài-khong Bōng-oán-kiàⁿ/James Webb Thài-khong Bōng-uán-kiànn/詹姆斯韋伯太空望遠鏡/James Webb Space Telescope
• 【捲螺仔手骨】kńg-lê-á chhiú-kut/kńg-lê-á tshiú-kut/旋臂/spiral arms
• 【恆星形成區】hêng-chheⁿ hêng-sêng-khu/hîng-tshenn hîng-sîng-khu/恆星形成區/star forming region