飛過獵戶座 ê 獅仔座流星雨

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Leonid Meteors Through Orion
• 影像來源 kah 版權：Luo Hongyang
• 台文翻譯：An-Li Tsai (NCU)

[漢羅] 飛過獵戶座 ê 獅仔座流星雨

後一粒流星會佇當時出現？ 就算是拄著流星雨 ê 時陣，咱嘛無一定會知。 所以，享受 流星雨 上好 ê 方式，是揣一个四序 ê 所在好好仔坐咧，觀賞這个夜空電影。 而且你會當 kah 朋友分享這个經驗，逐家攏會足歡喜--ê。 這張相片是佇 中國 海南島 看 tùi 南中國海，內底 ê 流星雨是 2022 年 ê 獅仔座流星雨。 流星出現上濟 ê 時陣，就是佇這個月。 相片內底 ê 流星軌跡是連紲翕幾若點鐘了後，才疊佇較早進前翕 ê 背景影像頂懸。 佇這个地點佮時間，咱會當 ùi 獅仔座流星雨 ê 流星軌跡，揣出 in 是 ùi 獅仔座 來--ê。 毋過咱嘛會當看著這寡軌跡嘛迒過 其他星座，嘛包括 獵戶座。 相片頂懸彼粒紅紅上光 ê 行星是 火星。 相片內底這兩位流星雨愛好者，因為對天文 ê 愛 結婚矣。 In 佇這個月慶祝 in ê 仝一工生日。

[POJ] Poe kòe La̍h-hō͘-chō ê Sai-á-chō Liû-chhiⁿ-hō͘

Āu chi̍t lia̍p liû-chhiⁿ ē tī tang-sî chhut-hiān? To̍h sǹg sī tú-tio̍h liû-chhiⁿ-hō͘ ê sî-chūn, lán mā bô it-tēng ē chai. Só͘-í, hiáng-siū liû-chhiⁿ-hō͘ siōng hó ê hong-sek, sī chhōe chi̍t ê sù-sī ê só͘-chāi hó-hó-á chē leh, koan-sióng chit ê iā-khong tiān-iáⁿ. Jî-chhiáⁿ lí ē-tàng kah pêng-iú hun-hióng chit ê keng-giām, ta̍k-ke lóng ē chiok hoaⁿ-hí--ê. Chit tiuⁿ siòng-phìⁿ sī tī Tiong-kok Hái-lâm-tó khòaⁿ tùi Lâm Tiong-kok-hái, lāi-té ê liû-chhiⁿ-hō͘ sī 2022 nî ê Sai-á-chō liû-chhiⁿ-hō͘. Liû-chhiⁿ chhut-hiān siōng chōe ê sî-chūn, to̍h sī tī chit kò goe̍h. Siòng-phìⁿ lāi-té ê liû-chhiⁿ kúi-jiah sī liân-sòa hip kúi-ā tiám-cheng liáu-āu, chiah thah tī khah chá chìn-chêng ê pōe-kéng iáⁿ-siōng téng-koân. Tī chit ê tē-tiám kah sî-kan, lán ē-tàng ùi Sai-á-chō liû-chhiⁿ-hō͘ ê liû-chhiⁿ kúi-jiah, chhōe-chhut in sī ùi Sai-á-chō lâi--ê. M̄-koh lán mā ē-tàng khòaⁿ-tio̍h chit kóa kúi-jiah mā hāⁿ kòe kî-tha seng-chō, pau-koat La̍h-hō͘-chō. Siòng-phìⁿ téng-koân hit lia̍p âng-âng siōng kng ê kiâⁿ-chhiⁿ sī Hóe-chhiⁿ. Siòng-phìⁿ lāi-té chit nn̄g ūi liû-chhiⁿ-hō͘ ài-hòⁿ-chiá, in-ūi tùi thian-bûn ê ài kiat-hun--ah. In tī chit kò goe̍h khèng-chiok in ê kāng chi̍t kang siⁿ-ji̍t.

[KIP] Pue kuè La̍h-hōo-tsō ê Sai-á-tsō Liû-tshinn-hōo

Āu tsi̍t lia̍p liû-tshinn ē tī tang-sî tshut-hiān? To̍h sǹg sī tú-tio̍h liû-tshinn-hōo ê sî-tsūn, lán mā bô it-tīng ē tsai. Sóo-í, hiáng-siū liû-tshinn-hōo siōng hó ê hong-sik, sī tshuē tsi̍t ê sù-sī ê sóo-tsāi hó-hó-á tsē leh, kuan-sióng tsit ê iā-khong tiān-iánn. Jî-tshiánn lí ē-tàng kah pîng-iú hun-hióng tsit ê king-giām, ta̍k-ke lóng ē tsiok huann-hí--ê. Tsit tiunn siòng-phìnn sī tī Tiong-kok Hái-lâm-tó khuànn tuì Lâm Tiong-kok-hái, lāi-té ê liû-tshinn-hōo sī 2022 nî ê Sai-á-tsō liû-tshinn-hōo. Liû-tshinn tshut-hiān siōng tsuē ê sî-tsūn, to̍h sī tī tsit kò gue̍h. Siòng-phìnn lāi-té ê liû-tshinn kuí-jiah sī liân-suà hip kuí-ā tiám-tsing liáu-āu, tsiah thah tī khah tsá tsìn-tsîng ê puē-kíng iánn-siōng tíng-kuân. Tī tsit ê tē-tiám kah sî-kan, lán ē-tàng uì Sai-á-tsō liû-tshinn-hōo ê liû-tshinn kuí-jiah, tshuē-tshut in sī uì Sai-á-tsō lâi--ê. M̄-koh lán mā ē-tàng khuànn-tio̍h tsit kuá kuí-jiah mā hānn kuè kî-tha sing-tsō, pau-kuat La̍h-hōo-tsō. Siòng-phìnn tíng-kuân hit lia̍p âng-âng siōng kng ê kiânn-tshinn sī Hué-tshinn. Siòng-phìnn lāi-té tsit nn̄g uī liû-tshinn-hōo ài-hònn-tsiá, in-uī tuì thian-bûn ê ài kiat-hun--ah. In tī tsit kò gue̍h khìng-tsiok in ê kāng tsi̍t kang sinn-ji̍t.

[English] Leonid Meteors Through Orion

Where will the next meteor appear? Even during a meteor shower, it is practically impossible to know. Therefore, a good way to enjoy a meteor shower is to find a place where you can sit comfortably and monitor a great expanse of dark sky. And it may be satisfying to share this experience with a friend. The meteor shower depicted was the 2022 Leonids which peaked earlier this month, and the view is from Hainan, China looking out over the South China Sea. Meteor streaks captured over a few hours were isolated and added to a foreground image recorded earlier. From this place and time, Leonid meteors that trace back to the constellation of Leo were seen streaking across other constellations including Orion. The bright red planet Mars appears near the top of the image. Bonding over their love of astronomy, the two pictured meteor enthusiasts, shown celebrating their common birthday this month, are now married.

詞彙學習