土星 ê 暗暝

Page(/daily/2022/11/20221126)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 土星 ê 暗暝

土星佇咱地球 ê 暗暝 猶是遮爾光。 這粒遙遠 ê 氣態巨行星 佮 美麗 ê 土星環,予伊佇望遠鏡景色下底,成做 天星宴會 ê 焦點。 這个予人讚嘆 ê 土星環 佮 土星暗暝,是無可能出現 佇 倚太陽這爿 ê 望遠鏡景色內底,愛到外行星彼爿才有法度。 望遠鏡干焦會當 看著土星 ê 日時。 實際上,這張相片是 Cassini 太空船翕–ê。 有翕著去予日光照著 ê 月眉相 ê 土星,嘛有翕著 土星暗暝這爿 ê 烏影,投影佇複雜 ê 土星環系統頂懸。 Ùi 地球出去 ê 機器人太空船 Cassini,以土星為家,已經踅土星 13 冬矣。 伊佇 2017 年 9 月 15 彼工,飛入去這粒氣態巨行星 ê 大氣層內底。 這張壯麗 ê 拼鬥影像Cassini 太空船 ê 闊幅 kha-mé-lah 翕–ê,時間點是伊欲進行 上尾一擺飛入去土星軌道內底 ê 任務 ê 2 工前。 咱無法度閣看著土星 ê 暗暝,除非地球閣送 另外一台太空船–過來。

[POJ] Thó͘-chhiⁿ ê Àm-mî

Thó͘-chhiⁿ tī lán Tē-kiû ê àm-mî iáu-sī chiah-nī kng. Chit lia̍p iâu-oán ê khì-thài kū-kiâⁿ-chhiⁿ kah bí-lē ê Thó͘-chhiⁿ-khoân, hō͘ i tī bōng-oán-kiàⁿ kéng-sek ē-té, chiâⁿ-chò thiⁿ-chhiⁿ iàn-hōe ê chiau-tiám. Chit ê hō͘ lâng chàn-thàn ê Thó͘-chhiⁿ-khoân kah Thó͘-chhiⁿ àm-mî, sī bô khó-lêng chhut-hiān tī óa Thài-iông chit-pêng ê bōng-oán-kiàⁿ kéng-sek lāi-té, ài kàu gōa-kiâⁿ-chhiⁿ hit-pêng chiah ū-hoat-tō͘. Bōng-oán-kiàⁿ kan-na ē-tàng khòaⁿ-tio̍h Thó͘-chhiⁿ ê ji̍t–sî. Si̍t-chè siōng, chit tiuⁿ siòng-phìⁿ sī Cassini thài-khong-chûn hip–ê. Ū hip tio̍h khì hō͘ ji̍t-kng chiò–tio̍h ê goe̍h-bâi siòng ê Thó͘-chhiⁿ, mā ū hip tio̍h Thó͘-chhiⁿ àm-mî chit-pêng ê o͘-iáⁿ, tâu-iáⁿ tī ho̍k-cha̍p ê Thó͘-chhiⁿ-khoân hē-thóng téng-koân. Ùi Tē-kiû chhut-khì ê ke-khì-lâng thài-khong-chûn Cassini, í Thó͘-chhiⁿ ûi ka, í-keng se̍h Thó͘-chhiⁿ 13 tang–ah. I tī 2017 nî 9 goe̍h 15 hit kang, poe ji̍p-khì chit lia̍p khì-thài kū-kiâⁿ-chhiⁿ ê tōa-khì-chân lāi-té. Chit tiuⁿ chòng-lē ê pheng-tàu iáⁿ-siōng sī Cassini thài-khong-chûn ê khoah-pak kha-mé-lah hip–ê, sî-kan sī i beh chìn-hêng siōng bóe chi̍t pái poe ji̍p-khì Thó͘-chhiⁿ kúi-tō lāi-té ê jīm-bū ê 2 kang chêng. Lán bô-hoat-tō͘ koh khòaⁿ-tio̍h Thó͘-chhiⁿ ê àm-mî, tî-hui Tē-kiû koh sàng lēng-gōa chi̍t tâi thài-khong-chûn–kòe-lâi.

[KIP] Thóo-tshinn ê Àm-mî

Thóo-tshinn tī lán Tē-kiû ê àm-mî iáu-sī tsiah-nī kng. Tsit lia̍p iâu-uán ê khì-thài kū-kiânn-tshinn kah bí-lē ê Thóo-tshinn-khuân, hōo i tī bōng-uán-kiànn kíng-sik ē-té, tsiânn-tsò thinn-tshinn iàn-huē ê tsiau-tiám. Tsit ê hōo lâng tsàn-thàn ê Thóo-tshinn-khuân kah Thóo-tshinn àm-mî, sī bô khó-lîng tshut-hiān tī uá Thài-iông tsit-pîng ê bōng-uán-kiànn kíng-sik lāi-té, ài kàu guā-kiânn-tshinn hit-pîng tsiah ū-huat-tōo. Bōng-uán-kiànn kan-na ē-tàng khuànn-tio̍h Thóo-tshinn ê ji̍t–sî. Si̍t-tsè siōng, tsit tiunn siòng-phìnn sī Cassini thài-khong-tsûn hip–ê. Ū hip tio̍h khì hōo ji̍t-kng tsiò–tio̍h ê gue̍h-bâi siòng ê Thóo-tshinn, mā ū hip tio̍h Thóo-tshinn àm-mî tsit-pîng ê oo-iánn, tâu-iánn tī ho̍k-tsa̍p ê Thóo-tshinn-khuân hē-thóng tíng-kuân. Uì Tē-kiû tshut-khì ê ke-khì-lâng thài-khong-tsûn Cassini, í Thóo-tshinn uî ka, í-king se̍h Thóo-tshinn 13 tang–ah. I tī 2017 nî 9 gue̍h 15 hit kang, pue ji̍p-khì tsit lia̍p khì-thài kū-kiânn-tshinn ê tuā-khì-tsân lāi-té. Tsit tiunn tsòng-lē ê phing-tàu iánn-siōng sī Cassini thài-khong-tsûn ê khuah-pak kha-mé-lah hip–ê, sî-kan tiám sī i beh tsìn-hîng siōng bué tsi̍t pái pue ji̍p-khì Thóo-tshinn kuí-tō lāi-té ê jīm-bū ê 2 kang tsîng. Lán bô-huat-tōo koh khuànn-tio̍h Thóo-tshinn ê àm-mî, tî-hui Tē-kiû koh sàng līng-guā tsi̍t tâi thài-khong-tsûn–kuè-lâi.

[English] Saturn at Night

Saturn is still bright in planet Earth’s night skies. Telescopic views of the distant gas giant and its beautiful rings often make it a star at star parties. But this stunning view of Saturn’s rings and night side just isn’t possible from telescopes closer to the Sun than the outer planet. They can only bring Saturn’s day into view. In fact, this image of Saturn’s slender sunlit crescent with night’s shadow cast across its broad and complex ring system was captured by the Cassini spacecraft. A robot spacecraft from planet Earth, Cassini called Saturn orbit home for 13 years before it was directed to dive into the atmosphere of the gas giant on September 15, 2017. This magnificent mosaic is composed of frames recorded by Cassini’s wide-angle camera only two days before its grand final plunge. Saturn’s night will not be seen again until another spaceship from Earth calls.

詞彙學習(漢羅/POJ/KIP/華語/English)

  • 【土星環】Thó͘-chhiⁿ-khoân/Thóo-tshinn-khuân/土星環/Saturn’s ring
  • 【氣態巨行星】khì-thài kū-kiâⁿ-chhiⁿ/khì-thài kū-kiânn-tshinn/氣巨行星/gas giant
  • 【Cassini 太空船】Cassini thài-khong-chûn/Cassini thài-khong-tsûn/Cassini 太空船/Cassini spacecraft
  • 【月眉相】goe̍h-bâi siòng/gue̍h-bâi siòng/眉月相/crescent phase
  • 【外行星】gōa-kiâⁿ-chhiⁿ/guā-kiânn-tshinn/外行星/the outer planet

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:NGC 6744:河外星系 ê 特寫 明仔載 ê 圖:New Jersey 天頂 ê 多重虹