活跳太陽 ê 日偏食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Partial Eclipse of an Active Sun
• 影片來源：Ralf Burkart; h/t Maciej Libert (AG)
• 2022 年 10 月 ê 日偏食：Notable Submissions to APOD
• 台文翻譯：An-Li Tsai (NCU)

[漢羅] 活跳太陽 ê 日偏食

請你注意看這支奇怪 ê 日食影片內底 ê 三項代誌。 代先，咱先來看 ùi 正爿過來--ê、kā 日頭 閘牢 矣 ê 大塊烏色圓盤。 這个烏色圓盤是 月娘，影片主要是咧翕 頂禮拜 ê 日偏食。 第二，咱來看浮佇 太陽外緣 頂懸，彼个 leh 爍咧爍咧 ê 大型日珥。 你若是斟酌 kā 看，就會發現實際上 in 當咧 落轉來 太陽。 日珥是高溫 電漿 組成--ê。 因為 太陽磁場咧變化，所以 in 就會暫時浮佇較懸 ê 所在。 落尾，咱來看太陽外緣 咧跳舞 ê 鬚鬚。 這規組 咧跳舞 ê 鬚鬚 就敢若是一塊活--ê 地毯，in 是 太陽色球層 內底咧 peh 升 kah 降落 ê 高溫氣體管仔，嘛會使 kā 叫做 針形管。 這支 4 秒鐘 ê 縮時攝影影片 其實是太陽性命 ê 10 分鐘久。 是講太陽應該會 閣活 50 億年 講！

[POJ] Oa̍h-thiàu Thài-iông ê Ji̍t-phian-si̍t

Chhiáⁿ lí chú-ì khòaⁿ chit ki kî-koài ê ji̍t-si̍t iáⁿ-phìⁿ lāi-té ê saⁿ hāng tāi-chì. Tāi-seng, lán seng lâi khòaⁿ ùi chiàⁿ-pêng kòe--lâi--ê, kā ji̍t-thâu cha̍h tiâu--ah ê tōa tè o͘-sek îⁿ-pôaⁿ. Chit ê o͘-sek îⁿ-pôaⁿ sī goe̍h-niû, iáⁿ-phìⁿ chú-iàu sī leh hip téng lé-pài ê ji̍t-phian-si̍t. Tē-jī, lán lâi khòaⁿ phû tī Thài-iông gōa-iân téng-koân, hit-ê leh sih-leh-sih-leh ê tōa-hêng ji̍t-jíⁿ. Lí nā-sī chim-chiok kā khòaⁿ, to̍h ē hoat-hiān si̍t-chè-siōng in tng-leh lak-tńg-lâi Thài-iông. Ji̍t-jíⁿ sī ko-un tiān-chiuⁿ cho͘-sêng--ê. In-ūi Thài-iông chû-tiûⁿ leh piàn-hòa, só͘-í in to̍h ē chiām-sî phû tī khah koân ê só͘-chāi. Lo̍h-bóe, lán lâi khòaⁿ Thài-iông gōa-iân leh thiàu-bú ê chhiu-chhiu. Chit kui-cho͘ leh thiàu-bú ê chhiu-chhiu to̍h ká-ná sī chi̍t tè oa̍h--ê tē-thán, in sī Thài-iông sek-kiû-chân lāi-té leh peh-seng kah kàng-lo̍h ê ko-un khì-thé kóng-á, mā ē-sái kā kiò-chò chiam-hêng-kóng. Chit ki 4 bió-cheng ê sok-sî-liap-iáⁿ iáⁿ-phìⁿ kî-si̍t sī Thài-iông sìⁿ-miā ê 10 hun-cheng kú. Sī kóng Thài-iông èng-kai ē koh oa̍h 50 ek nî kóng!

[KIP] Ua̍h-thiàu Thài-iông ê Ji̍t-phian-si̍t

Tshiánn lí tsú-ì khuànn tsit ki kî-kuài ê ji̍t-si̍t iánn-phìnn lāi-té ê sann hāng tāi-tsì. Tāi-sing, lán sing lâi khuànn uì tsiànn-pîng kuè--lâi--ê, kā ji̍t-thâu tsa̍h tiâu--ah ê tuā tè oo-sik înn-puânn. Tsit ê oo-sik înn-puânn sī gue̍h-niû, iánn-phìnn tsú-iàu sī leh hip tíng lé-pài ê ji̍t-phian-si̍t. Tē-jī, lán lâi khuànn phû tī Thài-iông guā-iân tíng-kuân, hit-ê leh sih-leh-sih-leh ê tuā-hîng ji̍t-jínn. Lí nā-sī tsim-tsiok kā khuànn, to̍h ē huat-hiān si̍t-tsè-siōng in tng-leh lak-tńg-lâi Thài-iông. Ji̍t-jínn sī ko-un tiān-tsiunn tsoo-sîng--ê. In-uī Thài-iông tsû-tiûnn leh piàn-huà, sóo-í in to̍h ē tsiām-sî phû tī khah kuân ê sóo-tsāi. Lo̍h-bué, lán lâi khuànn Thài-iông guā-iân leh thiàu-bú ê tshiu-tshiu. Tsit kui-tsoo leh thiàu-bú ê tshiu-tshiu to̍h ká-ná sī tsi̍t tè ua̍h--ê tē-thán, in sī Thài-iông sik-kiû-tsân lāi-té leh peh-sing kah kàng-lo̍h ê ko-un khì-thé kóng-á, mā ē-sái kā kiò-tsò tsiam-hîng-kóng. Tsit ki 4 bió-tsing ê sok-sî-liap-iánn iánn-phìnn kî-si̍t sī Thài-iông sìnn-miā ê 10 hun-tsing kú. Sī kóng Thài-iông ìng-kai ē koh ua̍h 50 ik nî kóng!

[English] A Partial Eclipse of an Active Sun

Watch for three things in this unusual eclipse video. First, watch for a big dark circle to approach from the right to block out more and more of the Sun. This dark circle is the Moon, and the video was made primarily to capture this partial solar eclipse last week. Next, watch a large solar prominence hover and shimmer over the Sun's edge. A close look will show that part of it is actually falling back to the Sun. The prominence is made of hot plasma that is temporarily held aloft by the Sun's changing magnetic field. Finally, watch the Sun's edge waver. What is wavering is a dynamic carpet of hot gas tubes rising and falling through the Sun's chromosphere -- tubes known as spicules. The entire 4-second time-lapse video covers a time of about ten minutes, although the Sun itself is expected to last another 5 billion years.

詞彙學習