哈雷彗星 累積七年 ê 塗粉

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Seven Years of Halley Dust
• 影像來源 kah 版權：Petr Horalek / Institute of Physics in Opava
• 台文翻譯：An-Li Tsai (NCU)

[漢羅] 哈雷彗星 累積七年 ê 塗粉

哈雷彗星 (編號 1P/Halley) 是人類頭一粒認捌 ê 掃帚星，每 75 冬就會轉來內太陽系一擺。 咱頂擺直接用目睭看著這粒有名 ê 長尾星，是 1986 年彼陣。 毋過咱踮地球，逐年攏會當看著兩擺哈雷彗星 ê 塗粉殘骸，包括 五月 ê 寶瓶座 η 流星雨 佮 十月 ê 獵戶座流星雨。 In 佇天頂就親像是咧落雨仝款。 這張 獵戶座流星雨 ê 合成影像 是 kā 2015 年 到 2022 年翕–ê 相片疊做伙，嘛包括 出現佇 10 月 21 ê 流星雨極大期。 這張夜空全景圖內底，差不多有 47 粒較光 ê 流星。 背景 ê 夜空有長長 ê 銀河佮滿滿 ê 天星，獵戶座流星看起來就親像是 ùi 獵戶座 參宿四 北方 ê 輻射點 來–ê。 前景是 Slovakia 共和國 西部 Presov 市附近 ê 山脈。

[POJ] Ha-lûi hūi-chhiⁿ lúi-chek chhit nî ê thô͘-hún

Ha-lûi hūi-chhiⁿ (pian-hō 1P/Halley) sī jîn-lūi thâu chi̍t lia̍p jīn-bat ê sàu-chhiú-chhiⁿ, múi 75 tang to̍h ē tńg-lâi Lōe Thài-iông-hē chi̍t pái. Lán téng-pái ti̍t-chiap iōng ba̍k-chiu khòaⁿ-tio̍h chit-lia̍p ū-miâ ê tn̂g-bóe-chhiⁿ, sī 1986 nî hit-chūn. M̄-koh lán tiàm Tē-kiû, ta̍k-nî lóng ê-táng khòaⁿ-tio̍h nn̄g pái Ha-lûi hūi-chhiⁿ ê thô͘-hún chân-hâi, pau-koat gō͘ goe̍h ê Pó-pân-chō η liû-chhiⁿ-hō͘ kah cha̍p goe̍h ê La̍h-hō͘-chō liû-chhiⁿ-hō͘. In tī thiⁿ-téng to̍h chhiⁿ-chhiūⁿ sī leh lo̍h-hō͘ kāng-khoán. Chit tiuⁿ La̍h-hō͘-chō liû-chhiⁿ-hō͘ ê ha̍p-sêng iáⁿ-siōng sī kā 2015 nî kàu 2022 nî hip–ê siòng-phìⁿ tha̍h chò-hóe, mā pau-koat chhut-hiān tī 10 goe̍h 21 ê liû-chhiⁿ-hō͘ ke̍k-tōa-kî. Chit tiûⁿ iā-khong choân-kéng-tô͘ lāi-té, chha-put-to ū 47 lia̍p khah kng ê liû-chhiⁿ. Pōe-kéng ê iā-khong ū tn̂g-tn̂g ê Gîn-hô kah móa-móa ê thiⁿ-chhiⁿ, La̍h-hō͘-chō liû-chhiⁿ khòaⁿ–khí-lâi to̍h chhiⁿ-chhiūⁿ sī ùi La̍h-hō͘-chō Chham-siù-sù pak-hong ê hok-siā-tiám lâi–ê. Chiân-kéng sī Slovakia Kiōng-hô-kok se-pō͘ Presov chhī hū-kīn ê soaⁿ-me̍h.

[KIP] Ha-luî huī-tshinn luí-tsik tshit nî ê thôo-hún

Ha-luî huī-tshinn (pian-hō 1P/Halley) sī jîn-luī thâu tsi̍t lia̍p jīn-bat ê sàu-tshiú-tshinn, muí 75 tang to̍h ē tńg-lâi Luē Thài-iông-hē tsi̍t pái. Lán tíng-pái ti̍t-tsiap iōng ba̍k-tsiu khuànn-tio̍h tsit-lia̍p ū-miâ ê tn̂g-bué-tshinn, sī 1986 nî hit-tsūn. M̄-koh lán tiàm Tē-kiû, ta̍k-nî lóng ê-táng khuànn-tio̍h nn̄g pái Ha-luî huī-tshinn ê thôo-hún tsân-hâi, pau-kuat gōo gue̍h ê Pó-pân-tsō η liû-tshinn-hōo kah tsa̍p gue̍h ê La̍h-hōo-tsō liû-tshinn-hōo. In tī thinn-tíng to̍h tshinn-tshiūnn sī leh lo̍h-hōo kāng-khuán. Tsit tiunn La̍h-hōo-tsō liû-tshinn-hōo ê ha̍p-sîng iánn-siōng sī kā 2015 nî kàu 2022 nî hip–ê siòng-phìnn tha̍h tsò-hué, mā pau-kuat tshut-hiān tī 10 gue̍h 21 ê liû-tshinn-hōo ki̍k-tuā-kî. Tsit tiûnn iā-khong tsuân-kíng-tôo lāi-té, tsha-put-to ū 47 lia̍p khah kng ê liû-tshinn. Puē-kíng ê iā-khong ū tn̂g-tn̂g ê Gîn-hô kah muá-muá ê thinn-tshinn, La̍h-hōo-tsō liû-tshinn khuànn–khí-lâi to̍h tshinn-tshiūnn sī uì La̍h-hōo-tsō Tsham-siù-sù pak-hong ê hok-siā-tiám lâi–ê. Tsiân-kíng sī Slovakia Kiōng-hô-kok se-pōo Presov tshī hū-kīn ê suann-me̍h.

[English] Seven Years of Halley Dust

History’s first known periodic comet Halley (1P/Halley) returns to the inner Solar System every 75 years or so. The famous comet made its last appearance to the naked-eye in 1986. But dusty debris from Comet Halley can be seen raining through planet Earth’s skies twice a year during two annual meteor showers, the Eta Aquarids in May and the Orionids in October. Including meteors near the shower maximum on October 21, this composite view compiles Orionid meteors captured from years 2015 through 2022. About 47 bright meteors are registered in the panoramic night skyscape. Against a starry background extending along the Milky Way, the Orionid meteors all seem to radiate from a point just north of Betelgeuse in the familiar constellation of the Hunter. In the foreground are mountains in eastern Slovakia near the city of Presov.

詞彙學習（漢羅/POJ/KIP/華語/English）

• 【哈雷彗星】Ha-lûi hūi-chhiⁿ/Ha-luî huī-tshinn/哈雷彗星/Comet Halley
• 【1P/Halley】it P Halley/it P Halley/ 1P/Halley / 1P/Halley
• 【內太陽系】Lōe Thài-iông-hē/Luē Thài-iông-hē/內太陽系/Inner Solar System
• 【內太陽系】Lāi Thài-iông-hē/Lāi Thài-iông-hē/內太陽系/Inner Solar System
• 【掃帚星】sàu-chhiú-chhiⁿ/sàu-tshiú-tshinn/掃帚星/comet
• 【長尾星】tn̂g-bóe-chhiⁿ/tn̂g-bué-tshinn/長尾星/comet
• 【寶瓶座 η 流星雨】Pó-pân-chō Eta liû-chhiⁿ-hō͘/Pó-pân-tsō Eta liû-tshinn-hōo/寶瓶座 η 流星雨/Eta Aquarids meteors
• 【獵戶座】La̍h-hō͘-chō/La̍h-hōo-tsō/獵戶座/constellation of the Hunter
• 【獵戶座流星雨】La̍h-hō͘-chō liû-chhiⁿ-hō͘/La̍h-hōo-tsō liû-tshinn-hōo/獵戶座流星雨/Orionid meteors
• 【流星雨】liû-chhiⁿ-hō͘/liû-tshinn-hōo/流星雨/meteor showers
• 【流星】liû-chhiⁿ/liû-tshinn/流星/meteors
• 【流星雨極大期】liû-chhiⁿ-hō͘ ke̍k-tōa-kî/liû-tshinn-hōo ki̍k-tuā-kî/流星雨極大期/the shower maximum
• 【參宿四】Chham-siù-sù/Tsham-siù-sù/參宿四/Betelgeuse
• 【輻射點】hok-siā-tiám/hok-siā-tiám/輻射點/radiate point
• 【Slovakia 共和國】Slovakia Kiōng-hô-kok/Slovakia Kiōng-hô-kok/斯洛伐克共和國/Slovak Republic