泰姬瑪哈陵 ê 日落 kah 月落

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Sunset, Moonset, Taj Mahal
• 影像來源 kah 版權：Neelam and Ajay Talwar (TWAN)
• 台文翻譯：An-Li Tsai (NCU)

[漢羅] 泰姬瑪哈陵 ê 日落 kah 月落

10 月 25 佇 印度 Agra 會當看會著日頭 kah 月娘 同齊 落去。 這个霧霧 ê 高空景色，就佇泰姬瑪哈陵 圓厝頂 附近。 這个「日月合」 就出現佇西爿地平線附近，產生日偏食 ê 現象。 是講，日偏食 嘛會當佇歐洲、北非、中東、kah 西亞看著。 這是 2022 年上尾兩个日食，兩个攏是日偏食。 毋過後一个 月圓時會佇 11 月 7 號 8 號彼陣，時到月娘會 ùi 地球烏影下底趨過，出現月全食。

[POJ] Thài-ki Má-ha-lêng ê Ji̍t-lo̍h kah Goe̍h-lo̍h

10 goe̍h 25 tī Ìn-tō͘ Agra ē-tàng khòaⁿ-tio̍h ji̍t-thâu kah goe̍h-niû tâng-chê lo̍h-khì. Chit-ê bū-bū ê ko-khong kéng-sek, to̍h tī Thài-ki Má-ha-lêng îⁿ-chhù-téng hū-kīn. Chit-ê "Ji̍t Goe̍h Ha̍p" to̍h chhut-hiān tī se-pêng tē-pêng-sòaⁿ hū-kīn, sán-seng ji̍t-phian-si̍t ê hiān-siōng. Sī kóng, ji̍t-phian-si̍t mā ē-tàng tī Au-chiu, Pak-hui, Tiong-tang, kah Se-a khòaⁿ-tio̍h. Che sī 2022 nî siōng bóe nn̄g ê ji̍t-si̍t, nn̄g-ê lóng sī ji̍t-phian-si̍t. M̄-koh āu chi̍t-ê goe̍h-îⁿ sî ē tī 11 goe̍h 7 hō 8 hō hit-chūn, sî-kàu goe̍h-niû ē ùi Tē-kiû o͘-iáⁿ ē-té chhu kòe, chhut-hiān goe̍h-choân-si̍t.

[KIP] Thài-ki Má-ha-lîng ê Ji̍t-lo̍h kah Gue̍h-lo̍h

10 gue̍h 25 tī Ìn-tōo Agra ē-tàng khuànn-tio̍h ji̍t-thâu kah gue̍h-niû tâng-tsê lo̍h-khì. Tsit-ê bū-bū ê ko-khong kíng-sik, to̍h tī Thài-ki Má-ha-lîng înn-tshù-tíng hū-kīn. Tsit-ê "Ji̍t Gue̍h Ha̍p" to̍h tshut-hiān tī se-pîng tē-pîng-suànn hū-kīn, sán-sing ji̍t-phian-si̍t ê hiān-siōng. Sī kóng, ji̍t-phian-si̍t mā ē-tàng tī Au-tsiu, Pak-hui, Tiong-tang, kah Se-a khuànn-tio̍h. Tse sī 2022 nî siōng bué nn̄g ê ji̍t-si̍t, nn̄g-ê lóng sī ji̍t-phian-si̍t. M̄-koh āu tsi̍t-ê gue̍h-înn sî ē tī 11 gue̍h 7 hō 8 hō hit-tsūn, sî-kàu gue̍h-niû ē uì Tē-kiû oo-iánn ē-té tshu kuè, tshut-hiān gue̍h-tsuân-si̍t.

[English] Sunset, Moonset, Taj Mahal

On October 25th, Sun and New Moon set together as seen from Agra, India. Their close conjunction near the western horizon, a partial solar eclipse, was captured in this elevated view in hazy skies near the solitary dome of the Taj Mahal. Of course, the partial solar eclipse was also seen from most of Europe, northern Africa, the Middle East, and western parts of Asia. This eclipse was the last of two solar eclipses (both partial eclipses) in 2022. But the next Full Moon will slide through planet Earth's shadow on November 7/8, in a total lunar eclipse.

詞彙學習