棍螺仔星系 NGC 1300

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Barred Spiral Galaxy NGC 1300
• 影像來源：NASA ESA, Hubble Heritage
• 台文翻譯：An-Li Tsai (NCU)

[漢羅] 棍螺仔星系 NGC 1300

這个捲螺仔星系中央有一个 棍仔形 結構，棍仔形結構中央有一个較細 ê 捲螺仔 結構，捲螺仔結構中央有一粒 超大質量烏洞。 這攏佇這个大閣媠 棍螺仔星系 NGC 1300 內底看會著，伊就佇 7000 萬光年遠 ê 波江座 遐。 這个壯麗 ê 島宇宙，是 Hubble 太空望遠鏡 合成影像 有史以來有 上濟細節 上完整 ê 星系。 NGC 1300 有 10 萬 光年 闊，伊 ê Hubble 影像展示這个星系內底引人注目 ê 細節，包括有明顯中央棍仔 kah 雄偉捲螺仔手骨。 是講這支大棍仔是按怎形成 ê ?按怎保持?按怎影響 恆星形成，到今猶是一个 足衝 ê 研究主題。

[POJ] Kùn-lê-á seng-hē NGC 1300

Chit-ê kńg-lê-á seng-hē tiong-ng ū chi̍t-ê kùn-á-hêng kiat-kò͘, kùn-á-hêng kiat-kò͘ tiong-ng ū chi̍t-ê khah sè ê kńg-lê-á kiat-kò͘, kńg-lê-á kiat-kò͘ tiong-ng ū chi̍t-lia̍p chhiau-tōa chit-liōng o͘-tōng. Che lóng tī chit-ê tōa koh súi ê kùn-lê-á seng-hē NGC 1300 lāi-té khòaⁿ-ē-tio̍h, i tō tī 7000 bān kng-nî hn̄g ê Pho-kang-chō hiah. Chit-ê chòng-l ê tó-ú-tio, sī Hubble thài-khong bōng-oán-kiàⁿ hap-sêng iáⁿ-siōng iú-sú-í-lâi ū siōng chōe sè-chiat siōng oân-chéng ê seng-hē. NGC 1300 ū 10 bān kng-nî khoah, i ê Hubble iáⁿ-siōng tián-sī chit-ê seng-hē lāi-té ín-lâng-chù-bo̍k ê sè-chiat, pau-koat ū bêng-hián tiong-ng kùn-á kah hiông-úi kńg-lê-á chhiú-ku̍t. Sī kóng chit-ki tōa-kùn-á sī án-ná hêng-sêng--ê? án-ná pó-chhî? án-ná éng-hióng hêng-chhiⁿ hêng-sêng, kàu-taⁿ iáu-sī chit-ê chiok chhèng ê gián-kiù chú-tê.

[KIP] Kùn-lê-á sing-hē NGC 1300

Tsit-ê kńg-lê-á sing-hē tiong-ng ū tsi̍t-ê kùn-á-hîng kiat-kòo, kùn-á-hîng kiat-kòo tiong-ng ū tsi̍t-ê khah sè ê kńg-lê-á kiat-kòo, kńg-lê-á kiat-kòo tiong-ng ū tsi̍t-lia̍p tshiau-tuā tsit-liōng oo-tōng. Tse lóng tī tsit-ê tuā koh suí ê kùn-lê-á sing-hē NGC 1300 lāi-té khuànn-ē-tio̍h, i tō tī 7000 bān kng-nî hn̄g ê Pho-kang-tsō hiah. Tsit-ê tsòng-l ê tó-ú-tio, sī Hubble thài-khong bōng-uán-kiànn hap-sîng iánn-siōng iú-sú-í-lâi ū siōng tsuē sè-tsiat siōng uân-tsíng ê sing-hē. NGC 1300 ū 10 bān kng-nî khuah, i ê Hubble iánn-siōng tián-sī tsit-ê sing-hē lāi-té ín-lâng-tsù-bo̍k ê sè-tsiat, pau-kuat ū bîng-hián tiong-ng kùn-á kah hiông-uí kńg-lê-á tshiú-ku̍t. Sī kóng tsit-ki tuā-kùn-á sī án-ná hîng-sîng--ê? án-ná pó-tshî? án-ná íng-hióng hîng-tshinn hîng-sîng, kàu-tann iáu-sī tsit-ê tsiok tshìng ê gián-kiù tsú-tê.

[English] Barred Spiral Galaxy NGC 1300

Across the center of this spiral galaxy is a bar. And at the center of this bar is smaller spiral. And at the center of that spiral is a supermassive black hole. This all happens in the big, beautiful, barred spiral galaxy cataloged as NGC 1300, a galaxy that lies some 70 million light-years away toward the constellation of the river Eridanus. This Hubble Space Telescope composite view of the gorgeous island universe is one of the most detailed Hubble images ever made of a complete galaxy. NGC 1300 spans over 100,000 light-years and the Hubble image reveals striking details of the galaxy's dominant central bar and majestic spiral arms. How the giant bar formed, how it remains, and how it affects star formation remains an active topic of research.

詞彙學習