土耳其天頂 ê 雙月行軌跡

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Double Lunar Analemma over Turkey
• 影像來源 kah 版權：Betul Turksoy
• 台文翻譯：An-Li Tsai (NCU)

[漢羅] 土耳其天頂 ê 雙月行軌跡

8 字形 ê 日行軌跡，是咱一冬內 逐工 tī 仝一个時間仝一个地點看伊 tī 天頂出現 ê 位置變化圖。 毋閣仝款這个技術，欲翕出 月娘 ê 月行軌跡，是愛開較長 ê 時間。 一般講來，欲等 月娘 tī 天頂轉來 到仝一位，逐工是愛加等 50 分 29 秒。 所以若是欲 翕月娘，逐工就愛加等 50 分 29 秒。 經過一个月圓週期，差不多就是舊曆一個月 ê 時間，咱就會當追蹤月娘實際上，因為自轉軸趨一个角度 kah 長株圓 軌道 造成 伊 tī 天頂散步 ê 月行軌跡。 這張相片 是翕差不多兩個月，所以你會當看著兩个月行軌跡。 月初 ê 月眉 月相，因為傷薄傷暗，所以 咱看無。 這个堅持翕兩個月 ê 天文攝影師，是揀七月 kah 八月天氣較好 ê 時陣，tī 土耳其 ê Kayseri 翕--ê。

[POJ] Thó͘-jíⁿ-kî thiⁿ-téng ê Siang goe̍h-hêng kúi-jiah

8 jī-hêng ê ji̍t-hêng kúi-jiah, sī lán chi̍t tang lāi ta̍k-kang tī kāng chi̍t-ê sî-kan kāng chi̍t-ê tē-tiám khòaⁿ i tī thiⁿ-téng chhut-hiān ê ūi-tì piàn-hòa tô͘. M̄-koh kāng-khoán chit-ê ki-su̍t, beh hip chhut goe̍h-niû ê goe̍h-hêng kúi-jiah, sī ài khai khah tn̂g ê sî-kan. It-poaⁿ kóng-lâi, beh tán goe̍h-niû tī thiⁿ-téng tńg-lâi kàu kāng chi̍t-ūi, ta̍k-kang sī ài ke tán 50 hun 29 bió. Só͘-í nā-sī beh hi̍p goe̍h-niû, ta̍k-kang to̍h ài ke tán 50 hun 29 bió. Keng-kòe chi̍t-ê goe̍h-îⁿ chiu-kî, chha-put-to to̍h sī kū-le̍k chi̍t-ko-goe̍h ê sî-kan, lán to̍h ē-tàng tui-chong goe̍h-niû si̍t-chè-siōng, in-ūi chū-choán-tek chhu chi̍t-ê kak-tō͘ kah tn̂g-tu-îⁿ kúi-tō chō-sêng i tī thiⁿ-téng sàn-pō͘ ê goe̍h-hêng kúi-jiah. Chit-tiuⁿ siòng-phìⁿ sī hip chha-put-to nn̄g kò goe̍h, só͘-í lí ē-tàng khòaⁿ-tio̍h nn̄g-ê goe̍h-hêng kúi-jiah. Goe̍h-chhe ê goe̍h-bâi goe̍h-siòng, in-ūi siuⁿ po̍h siuⁿ àm, só͘-í lán khòaⁿ-bô. Chit-ê kian-chhî hip nn̄g kò goe̍h ê thian-bûn liap-iáⁿ-su, sī kéng chhit-goe̍h kah peh-goe̍h thiⁿ-khì khah hó ê sî-chūn, tī Thó͘-jíⁿ-kî ê Kayseri hip--ê.

[KIP] Thóo-jínn-kî thinn-tíng ê Siang gue̍h-hîng kuí-jiah

8 jī-hîng ê ji̍t-hîng kuí-jiah, sī lán tsi̍t tang lāi ta̍k-kang tī kāng tsi̍t-ê sî-kan kāng tsi̍t-ê tē-tiám khuànn i tī thinn-tíng tshut-hiān ê uī-tì piàn-huà tôo. M̄-koh kāng-khuán tsit-ê ki-su̍t, beh hip tshut gue̍h-niû ê gue̍h-hîng kuí-jiah, sī ài khai khah tn̂g ê sî-kan. It-puann kóng-lâi, beh tán gue̍h-niû tī thinn-tíng tńg-lâi kàu kāng tsi̍t-uī, ta̍k-kang sī ài ke tán 50 hun 29 bió. Sóo-í nā-sī beh hi̍p gue̍h-niû, ta̍k-kang to̍h ài ke tán 50 hun 29 bió. King-kuè tsi̍t-ê gue̍h-înn tsiu-kî, tsha-put-to to̍h sī kū-li̍k tsi̍t-ko-gue̍h ê sî-kan, lán to̍h ē-tàng tui-tsong gue̍h-niû si̍t-tsè-siōng, in-uī tsū-tsuán-tik tshu tsi̍t-ê kak-tōo kah tn̂g-tu-înn kuí-tō tsō-sîng i tī thinn-tíng sàn-pōo ê gue̍h-hîng kuí-jiah. Tsit-tiunn siòng-phìnn sī hip tsha-put-to nn̄g kò gue̍h, sóo-í lí ē-tàng khuànn-tio̍h nn̄g-ê gue̍h-hîng kuí-jiah. Gue̍h-tshe ê gue̍h-bâi gue̍h-siòng, in-uī siunn po̍h siunn àm, sóo-í lán khuànn-bô. Tsit-ê kian-tshî hip nn̄g kò gue̍h ê thian-bûn liap-iánn-su, sī kíng tshit-gue̍h kah peh-gue̍h thinn-khì khah hó ê sî-tsūn, tī Thóo-jínn-kî ê Kayseri hip--ê.

[English] A Double Lunar Analemma over Turkey

An analemma is that figure-8 curve you get when you mark the position of the Sun at the same time each day for one year. But the trick to imaging an analemma of the Moon is to wait bit longer. On average the Moon returns to the same position in the sky about 50 minutes and 29 seconds later each day. So photograph the Moon 50 minutes 29 seconds later on successive days. Over one lunation or lunar month it will trace out an analemma-like curve as the Moon's actual position wanders due to its tilted and elliptical orbit. Since the featured image was taken over two months, it actually shows a double lunar analemma. Crescent lunar phases too thin and faint to capture around the New moon are missing. The two months the persistent astrophotographer chose were during a good stretch of weather during July and August, and the location was Kayseri, Turkey.

詞彙學習