加拿大北方 ê 極光

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Auroras over Northern Canada
• 影像來源 kah 版權：Kwon, O Chul (TWAN)
• 台文翻譯：An-Li Tsai (NCU)

[漢羅] 加拿大北方 ê 極光

太陽 一陣一陣 ê 太陽風 kah 爆發 ê 帶電粒子，造成 tī 2014 年 12 月彼陣，有幾若暗攏看會著極光。 極光 這馬來到最近 11 年內，太陽活動 上強 ê 時陣。 這張相片 有翕著戲劇性 ê 極光，伊迒過加拿大北方 Yellowknife 庄仔頭附近 ê 夜空。 這个 極光 光甲 使人敬畏，干焦感光 1.3 秒鐘就看會著矣。 同齊翕 ê 影片 有通看著天頂 ê 極光 咧跳舞，觀光客看著極光歡喜甲咧 慶祝。 相片正爿 ê 尖箍圓形體 是 tipi，是美洲原住民徛起 ê 布篷。 相片中央 ê 遙遠夜空，是 獵戶座。 極光可能會 tī 紲落來幾若年愈來愈強，這是因為 咱 ê 太陽 欲閣來到 伊 ê 極大期 矣。

[POJ] Ka-ná-tà pak-hong ê ke̍k-kng

Thài-iông chi̍t-chūn chi̍t-chūn ê thài-iông-hong kah po̍k-hoat ê tài-tiān lia̍p-chú, chō-sêng tī 2014 nî 12 goe̍h hit-chūn, ū kúi-ā àm lóng khòaⁿ-ē-tio̍h ke̍k-kng. Ke̍k-kng chit-má lâi kàu chòe-kīn 11 nî lāi, Thài-iông oa̍h-tāng siōng kiông ê sî-chūn. Chit-tiuⁿ siòng-phìⁿ ū hip-tio̍h hì-kio̍k-sèng ê ke̍k-kng, i hāⁿ kòe Ka-ná-tà pak-hong Yellowknife chng-á-thâu hū-kīn ê iā-khong. Chit-ê ke̍k-kng kng kah sù-lâng kèng-ùi, kan-na kám-kng 1.3 bió-cheng to̍h khòaⁿ-ē-tio̍h--ah. Tâng-chê hip ê iáⁿ-phìⁿ ū-thang khòaⁿ-tio̍h thiⁿ-téng ê ke̍k-kng leh thiàu-bú, koan-kong-kheh khòaⁿ-tio̍h ke̍k-kng hoaⁿ-hí kah leh khèng-chiok. Siòng-phìⁿ chiàⁿ-pêng ê chiam-kho͘-iⁿ hêng-thé sī tipi, sī Bí-chiu goân-chū-bîn khiā-khí ê pò͘-phâng. Siòng-phìⁿ tiong-ng ê iâu-oán iā-khong, sī La̍h-hō͘-chō. Ke̍k-kng khó-lêng ē tī sòa-lo̍h-lâi kúi-ā nî lú-lâi lú-kiông, che sī in-ūi lán ê Thài-iông beh koh lâi kàu i ê ke̍k-tōa-kî--ah.

[KIP] Ka-ná-tà pak-hong ê ki̍k-kng

Thài-iông tsi̍t-tsūn tsi̍t-tsūn ê thài-iông-hong kah po̍k-huat ê tài-tiān lia̍p-tsú, tsō-sîng tī 2014 nî 12 gue̍h hit-tsūn, ū kuí-ā àm lóng khuànn-ē-tio̍h ki̍k-kng. Ki̍k-kng tsit-má lâi kàu tsuè-kīn 11 nî lāi, Thài-iông ua̍h-tāng siōng kiông ê sî-tsūn. Tsit-tiunn siòng-phìnn ū hip-tio̍h hì-kio̍k-sìng ê ki̍k-kng, i hānn kuè Ka-ná-tà pak-hong Yellowknife tsng-á-thâu hū-kīn ê iā-khong. Tsit-ê ki̍k-kng kng kah sù-lâng kìng-uì, kan-na kám-kng 1.3 bió-tsing to̍h khuànn-ē-tio̍h--ah. Tâng-tsê hip ê iánn-phìnn ū-thang khuànn-tio̍h thinn-tíng ê ki̍k-kng leh thiàu-bú, kuan-kong-kheh khuànn-tio̍h ki̍k-kng huann-hí kah leh khìng-tsiok. Siòng-phìnn tsiànn-pîng ê tsiam-khoo-inn hîng-thé sī tipi, sī Bí-tsiu guân-tsū-bîn khiā-khí ê pòo-phâng. Siòng-phìnn tiong-ng ê iâu-uán iā-khong, sī La̍h-hōo-tsō. Ki̍k-kng khó-lîng ē tī suà-lo̍h-lâi kuí-ā nî lú-lâi lú-kiông, tse sī in-uī lán ê Thài-iông beh koh lâi kàu i ê ki̍k-tuā-kî--ah.

[English] Auroras over Northern Canada

Gusting solar winds and blasts of charged particles from the Sun resulted in several rewarding nights of auroras back in 2014 December. auroras, near the peak of the last 11-year solar cycle. The featured image captured dramatic auroras stretching across a sky near the town of Yellowknife in northern Canada. The auroras were so bright that they not only inspired awe, but were easily visible on an image exposure of only 1.3 seconds. A video taken concurrently shows the dancing sky lights evolving in real time as tourists, many there just to see auroras, respond with cheers. The conical dwellings on the image right are tipis, while far in the background, near the image center, is the constellation of Orion. Auroras may increase again over the next few years as our Sun again approaches solar maximum.

詞彙學習