木衛三 Ganymede ê 烏影下底

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：In Ganymede's Shadow
• 影像來源 kah 版權：Andrew McCarthy
• 台文翻譯：An-Li Tsai (NCU)

[漢羅] 木衛三 Ganymede ê 烏影下底

木星 tī 地球天頂是 kah 太陽 無仝爿。 頂個月底，木星行到欲倚近日點 ê 所在。 近日點就是天體 tī 伊長株圓軌道面頂行到離太陽上近彼點，木星 ê 近日點是明年初。 時到 木星就會倚咱地球足近--ê，按呢欲看太陽系內底上大粒 ê 氣態巨行星就會變做足讚--ê。 這張 遮爾清楚 ê 木星影像 是 9 月 27 彼工 tī 美國 Arizona 州 Florence ê 後埕，用細台望遠鏡翕--ê。 這是 kā 影片影格疊出來 ê 相片，有通看著 踅 這粒大行星、一輾一輾 ê 環形風。 暗帶 kah 光區 一逝一逝迒 tī 這粒氣態行星，閣有 咧轉踅 ê 長株圓風暴 kah 有名 ê 大紅斑。 加利略衛星 ê 木衛三 Ganymede 就 tī 這張相片 ê 正爿下跤遐。 太陽系上大粒 ê 衛星 kah 伊 ê 烏影就 ùi 南方 ê 木星雲頂懸 飛過。

[POJ] Bo̍k-ūi-saⁿ Ganymede ê o͘-iáⁿ ē-té

Bo̍k-chhiⁿ tī Tē-kiû thiⁿ-téng sī kah Thài-iông bô kâng pêng. Téng kò goe̍h-té, Bo̍k-chhiⁿ kiâⁿ kàu beh óa kīn-tē-tiám ê só͘-chāi. Kīn-ji̍t-tiám to̍h sī thian-thé tī i tn̂g-tu-îⁿ kúi-tō bīn-téng kiâⁿ kàu lī Thài-iông siōng kīn hit-tiám, Bo̍k-chhiⁿ ê kīn-ji̍t-tiám sī môa-nî-chhoe. Sî-kàu Bo̍k-chhiⁿ to̍h ē óa lán Tē-kiû chiok kīn--ê, án-ni beh khòaⁿ Thài-iông-hē lāi-té siōng tōa-lia̍p ê khì-thài kū-kiâⁿ-chhiⁿ to̍h ē piàn-chò chiok chán--ê. Chit-tiuⁿ chiah-nī chheng-chhó͘ ê Bo̍k-chhiⁿ iáⁿ-siōng sī 9 goe̍h 27 hit-kang tī Bí-kok Arizona chiu Florence ê āu-tiâⁿ, iōng sè-tâi bōng-oán-kiàⁿ hip--ê. Che sī kā iáⁿ-phìⁿ iáⁿ-keh tha̍h chhut-lâi ê siòng-phìⁿ, ū-thang khòaⁿ-tio̍h se̍h chit-lia̍p tōa-kiâⁿ-chhiⁿ, chi̍t-liàn chi̍t-liàn ê khoân-hêng hong. Àm-tòa kah kng-khu chi̍t-chōa chi̍t-chōa hāⁿ tī chit-lia̍p khì-thài kiâⁿ-chhiⁿ, koh-ū leh tńg-se̍h ê tn̂g-tu-îⁿ hong-pō kah ū-miâ ê Tōa-âng-pan. Ka-lī-lio̍h ūi-chhiⁿ ê Bo̍k-ūi-saⁿ Ganymede to̍h tī chit-tiuⁿ siòng-phìⁿ ê chiàⁿ-pêng ē-kha hiah. Thài-iông-hē siōng tōa-lia̍p ê ūi-chhiⁿ kah i ê o͘-iáⁿ to̍h ùi lâm-hong ê Bo̍k-chhiⁿ-hûn téng-koân poe kòe.

[KIP] Bo̍k-uī-sann Ganymede ê oo-iánn ē-té

Bo̍k-tshinn tī Tē-kiû thinn-tíng sī kah Thài-iông bô kâng pîng. Tíng kò gue̍h-té, Bo̍k-tshinn kiânn kàu beh uá kīn-tē-tiám ê sóo-tsāi. Kīn-ji̍t-tiám to̍h sī thian-thé tī i tn̂g-tu-înn kuí-tō bīn-tíng kiânn kàu lī Thài-iông siōng kīn hit-tiám, Bo̍k-tshinn ê kīn-ji̍t-tiám sī muâ-nî-tshue. Sî-kàu Bo̍k-tshinn to̍h ē uá lán Tē-kiû tsiok kīn--ê, án-ni beh khuànn Thài-iông-hē lāi-té siōng tuā-lia̍p ê khì-thài kū-kiânn-tshinn to̍h ē piàn-tsò tsiok tsán--ê. Tsit-tiunn tsiah-nī tshing-tshóo ê Bo̍k-tshinn iánn-siōng sī 9 gue̍h 27 hit-kang tī Bí-kok Arizona tsiu Florence ê āu-tiânn, iōng sè-tâi bōng-uán-kiànn hip--ê. Tse sī kā iánn-phìnn iánn-keh tha̍h tshut-lâi ê siòng-phìnn, ū-thang khuànn-tio̍h se̍h tsit-lia̍p tuā-kiânn-tshinn, tsi̍t-liàn tsi̍t-liàn ê khuân-hîng hong. Àm-tuà kah kng-khu tsi̍t-tsuā tsi̍t-tsuā hānn tī tsit-lia̍p khì-thài kiânn-tshinn, koh-ū leh tńg-se̍h ê tn̂g-tu-înn hong-pō kah ū-miâ ê Tuā-âng-pan. Ka-lī-lio̍h uī-tshinn ê Bo̍k-uī-sann Ganymede to̍h tī tsit-tiunn siòng-phìnn ê tsiànn-pîng ē-kha hiah. Thài-iông-hē siōng tuā-lia̍p ê uī-tshinn kah i ê oo-iánn to̍h uì lâm-hong ê Bo̍k-tshinn-hûn tíng-kuân pue kuè.

[English] In Ganymede's Shadow

At opposition, opposite the Sun in Earth's sky, late last month Jupiter is also approaching perihelion, the closest point to the Sun in its elliptical orbit, early next year. That makes Jupiter exceptionally close to our fair planet, currently resulting in excellent views of the Solar System's ruling gas giant. On September 27, this sharp image of Jupiter was recorded with a small telescope from a backyard in Florence, Arizona. The stacked video frames reveal the massive world bounded by planet girdling winds. Dark belts and light zones span the gas giant, along with rotating oval storms and its signature Great Red Spot. Galilean moon Ganymede is below and right in the frame. The Solar System's largest moon and its shadow are in transit across the southern Jovian cloud tops.

詞彙學習