世界各地 春秋分點 ê 日出

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Equinox Sunrise Around the World
• 拼鬥影像版權：Luca Vanzella
• 台文翻譯：An-Li Tsai (NCU)

[漢羅] 世界各地 春秋分點 ê 日出

這个全球 ê 合作計畫，是 kā 9 月 22 春秋分點 這工無仝所在翕著–ê 相片，排列做這張引人注目 ê 拼鬥圖。 這攏總有 24 ê 攝影師提供相片，是 tī 全世界 24个航海時區 翕–ê。 全球 24 ê 航海時區較無一般咱咧用 ê 城市時區遐爾複雜。 航海時區 ê 範圍就是 地球經度差 15 度、時間差一點鐘遮爾簡單。 Ùi 正爿頂懸開始 ê 頭一張相片，是 比 協調世界時 (UTC) 加 12 點鐘 ê 航海時區翕–ê 日出。 Tī 這个時區 ê 攝影師是 tī 紐西蘭 ê 基督城。 咱若是徙 tùi 下跤去，就會行到西爿。 咱若是徙 tùi 倒爿去，UTC 時區 ê 數字愈細，日出 ê 時間就較晏。 若無，你閣有全球 tī 2022 年 9 月春秋分點翕 ê 日出 影片通看。

[POJ] Sè-kài kok-tē Chhun-chhiu-hun-tiám ê ji̍t-chhut

chit-ê choân-kiû ê ha̍p-chok kè-ōe, sī kā 9 goe̍h 22 chhun-chhiu-hun-tiám chit-kang bô-kâng só͘-chāi hip-tio̍h–ê siòng-phìⁿ, pâi-lia̍t chò chit-tiuⁿ ìn-lâng-chù-bo̍k ê pheng-tàu-tô͘. Che lóng-chóng ū 24 ê liap-iáⁿ-su thê-kiong siòng-phìⁿ, sī tī choân-sè-kài 24 ê hâng-hái sî-khu hip–ê. Choân-kiû 24 ê hâng-hái sî-khu khah bô it-poaⁿ lán leh iōng ê siâⁿ-chhī sî-khu hiah-nī ho̍k-cha̍p. Hâng-hái sî-khu ê hoān-ûi to̍h sī Tē-kiû keng-tō͘ chha 15 tō͘, si-kang chha chi̍t tiám-cheng chiah-nī kán-tan. Ùi chiàⁿ-pêng téng-koân khai-sí ê thâu chi̍t-tiuⁿ siòng-phìⁿ, sī pí hia̍p-tiau sè-kài-sî (UTC) ke 12 tiám-cheng ê hâng-hái sî-khu hip–ê ji̍t-chhut. Tī chit-ê sî-khu ê liap-iáⁿ-su sī tī Niú-se-lân ê ki-tok-siâⁿ. Lán nā-sī sóa tùi ē-kha khì to̍h ē kiâⁿ kàu sai-pêng. Lán nā-sī sóa tùi tò-pêng khì, UTC sî-khu ê sò͘-jī lú sè, ji̍t-chhut ê sî-kan to̍h lú òaⁿ. Nā-bô, lí koh-ū choân-kiû tī 2022 nî 9 goe̍h chhun-chhiu-hun-tiám hip–ê ji̍t-chhut iáⁿ-phìⁿ thang khòaⁿ.

[KIP] Sè-kài kok-tē Tshun-tshiu-hun-tiám ê ji̍t-tshut

tsit-ê tsuân-kiû ê ha̍p-tsok kè-uē, sī kā 9 gue̍h 22 tshun-tshiu-hun-tiám tsit-kang bô-kâng sóo-tsāi hip-tio̍h–ê siòng-phìnn, pâi-lia̍t tsò tsit-tiunn ìn-lâng-tsù-bo̍k ê phing-tàu-tôo. Tse lóng-tsóng ū 24 ê liap-iánn-su thê-kiong siòng-phìnn, sī tī tsuân-sè-kài 24 ê hâng-hái sî-khu hip–ê. Tsuân-kiû 24 ê hâng-hái sî-khu khah bô it-puann lán leh iōng ê siânn-tshī sî-khu hiah-nī ho̍k-tsa̍p. Hâng-hái sî-khu ê huān-uî to̍h sī Tē-kiû king-tōo tsha 15 tōo, si-kang tsha tsi̍t tiám-tsing tsiah-nī kán-tan. Uì tsiànn-pîng tíng-kuân khai-sí ê thâu tsi̍t-tiunn siòng-phìnn, sī pí hia̍p-tiau sè-kài-sî (UTC) ke 12 tiám-tsing ê hâng-hái sî-khu hip–ê ji̍t-tshut. Tī tsit-ê sî-khu ê liap-iánn-su sī tī Niú-se-lân ê ki-tok-siânn. Lán nā-sī suá tuì ē-kha khì to̍h ē kiânn kàu sai-pîng. Lán nā-sī suá tuì tò-pîng khì, UTC sî-khu ê sòo-jī lú sè, ji̍t-tshut ê sî-kan to̍h lú uànn. Nā-bô, lí koh-ū tsuân-kiû tī 2022 nî 9 gue̍h tshun-tshiu-hun-tiám hip–ê ji̍t-tshut iánn-phìnn thang khuànn.

[English] Equinox Sunrise Around the World

A planet-wide collaboration resulted in this remarkable array of sunrise photographs taken around the September 2022 equinox. The images were contributed by 24 photographers, one in each of 24 nautical time zones around the world. Unlike more complicated civil time zone boundaries, the 24 nautical time zones are simply 15 degree longitude bands corresponding to 1 hour steps that span the globe. Start at the upper right for the first to experience a sunrise in the nautical time zone corresponding to Coordinated Universal Time (UTC) + 12 hours. In that time zone, the photographer was located in Christchurch, New Zealand. Travel to the west by looking down the column and then moving to the column toward the left for later sunrises as the time zone offset in hours from UTC decreases. Or, you can watch a video of September 2022 equinox sunrises around planet Earth.

詞彙學習（漢羅/POJ/KIP/華語/English）

• 【協調世界時】hia̍p-tiau sè-kài-sî/hia̍p-tiau sè-kài-sî/協調世界時/Coordinated Universal Time (UTC)
• 【春秋分點】chhun-chhiu hun-tiám/tshun-tshiu hun-tiám/春秋分點/equinox
• 【航海時區】hâng-hái sî-khu/hâng-hái sî-khu/航海時區/nautical time zones
• 【經度】keng-tō͘/king-tōo/經度/longitude
• 【城市時區】siâⁿ-chhī sî-khu/siânn-tshī sî-khu/城市時區/civil time zone