捷克共合國天頂 ê 紅色精靈爍爁

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Red Sprite Lightning over the Czech Republic
• 影像來源 kah 版權：Daniel Ščerba
• 世界各國 ê APOD：Arabic, Bulgarian, Catalan, Chinese (Beijing), Chinese (Taiwan), Croatian, Czech, Dutch, Farsi, French, French (Canada), German, Hebrew, Indonesian, Japanese, Korean, Montenegrin, Polish, Russian, Serbian, Slovenian, Spanish, 台語, Turkish, and Ukrainian
• 台文翻譯：An-Li Tsai (NCU)

[漢羅] 捷克共合國天頂 ê 紅色精靈爍爁

天頂彼寡紅色雲絲是啥物？ In 是真罕得看著 ê 爍爁，叫做 紅色精靈，是 35 年前才發現–ê。 研究結果 表示，紅色精靈 是足強 ê 正電 雲對地爍爁。 是 100 公尺大細 ê 電離空氣球 用 10 葩 光速 ê 速度 ùi 80 公里懸 ê 所在射落來，產生 ê 雷擊。 In 隨就 產生一陣 peh-升 ê 電離空氣球。 這張影像 是頂個月 tī 捷克共合國 Moravia 北爿 ê Jeseniky 山 翕–ê。 遮離 紅色 精靈 差不多有 200 公里遠。 紅色精靈 ê 出現，干焦 幾若分之一秒 ê 時間爾爾，而且愛 tī 邊仔有 足強雷暴 出現 ê 時陣才看較有。

[POJ] Chia̍t-khek kiōng-ha̍p-kok thiⁿ-téng ê Âng-sek-cheng-lêng sih-nah

Thiⁿ-téng hit-kóa âng-sek hûn-si sī siáⁿ-mih? In sī chin hán-tit khòaⁿ-tio̍h ê sih-nah, kiò-chò Âng-sek-cheng-lêng, sī 35 nî-chêng chiah hoat-hiān–ê. Gián-kiù kiat-kò͘ piáu-sī, Âng-sek-cheng-lêng sī chiok kiông ê chiàⁿ-tiān hūi-tùi-tē sih-nah. Sī 100 kong-chhioh tōa-sè ê tiān-lī khong-khì-kiû iōng 10 pha kng-sok ê sok-tō͘ ùi 80 kong-lí koân ê só͘-chāi siā lo̍h-lâi, sán-seng ê lûi-kek. In sûi to̍h sán-seng chi̍t-tīn peh-seng ê tiān-lī khong-khì-kiû. Chit-tiuⁿ iáⁿ-siōng sī téng kò-goe̍h tī Chia̍t-khek kiōng-ha̍p-kok Moravia pak-pêng ê Jeseniky soaⁿ hip–ê. Chiah lī Âng-sek-cheng-lêng chha-put-to ū 200 kong-lí hn̄g. Âng-sek-cheng-lêng ê chhut-hiān, kan-na kúi-ā hun chi it bió ê sî-kan niā-niā, jî-chhiáⁿ ài tī piⁿ-á ū chiok kiông lûi-pō chhut-hiān ê sî-chūn chiah khòaⁿ khah ū.

[KIP] Tsia̍t-khik kiōng-ha̍p-kok thinn-tíng ê Âng-sik-tsing-lîng sih-nah

Thinn-tíng hit-kuá âng-sik hûn-si sī siánn-mih? In sī tsin hán-tit khuànn-tio̍h ê sih-nah, kiò-tsò Âng-sik-tsing-lîng, sī 35 nî-tsîng tsiah huat-hiān–ê. Gián-kiù kiat-kòo piáu-sī, Âng-sik-tsing-lîng sī tsiok kiông ê tsiànn-tiān huī-tuì-tē sih-nah. Sī 100 kong-tshioh tuā-sè ê tiān-lī khong-khì-kiû iōng 10 pha kng-sok ê sok-tōo uì 80 kong-lí kuân ê sóo-tsāi siā lo̍h-lâi, sán-sing ê luî-kik. In suî to̍h sán-sing tsi̍t-tīn peh-sing ê tiān-lī khong-khì-kiû. Tsit-tiunn iánn-siōng sī tíng kò-gue̍h tī Tsia̍t-khik kiōng-ha̍p-kok Moravia pak-pîng ê Jeseniky suann hip–ê. Tsiah lī Âng-sik-tsing-lîng tsha-put-to ū 200 kong-lí hn̄g. Âng-sik-tsing-lîng ê tshut-hiān, kan-na kuí-ā hun tsi it bió ê sî-kan niā-niā, jî-tshiánn ài tī pinn-á ū tsiok kiông luî-pō tshut-hiān ê sî-tsūn tsiah khuànn khah ū.

[English] Red Sprite Lightning over the Czech Republic

What are those red filaments in the sky? They are a rarely seen form of lightning confirmed only about 35 years ago: red sprites. Research has shown that following a powerful positive cloud-to-ground lightning strike, red sprites may start as 100-meter balls of ionized air that shoot down from about 80-km high at 10 percent the speed of light. They are quickly followed by a group of upward streaking ionized balls. The featured image was taken late last month from the Jeseniky Mountains in northern Moravia in the Czech Republic. The distance to the red sprites is about 200 kilometers. Red sprites take only a fraction of a second to occur and are best seen when powerful thunderstorms are visible from the side.

詞彙學習（漢羅/POJ/KIP/華語/English）

• 【捷克共合國】Chia̍t-khek kiōng-ha̍p-kok/Tsia̍t-khik kiōng-ha̍p-kok/捷克共合國/the Czech Republic
• 【紅色精靈】Âng-sek-cheng-lêng/Âng-sik-tsing-lîng/紅色精靈/Red Sprite
• 【爍爁】sih-nah/sih-nah/閃電/lightning
• 【雷暴】lûi-pō/luî-pō/雷暴/thunderstorm