太陽系內底 ê 行星：趨角 kah 自轉

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Planets of the Solar System: Tilts and Spins
• 影片來源：NASA, 動畫：James O'Donoghue (JAXA)
• 台文翻譯：An-Li Tsai (NCU)

[漢羅] 太陽系內底 ê 行星：趨角 kah 自轉

毋知你上佮意 ê 行星 ê 自轉是啥物款--ê？ 伊敢是踅足緊--ê？伊 ê 自轉方向是墜直--ê？坦平--ê？抑是踅倒反--ê？ 這支影片 有 kā NASA 翕--ê 太陽系 八粒行星 影像畫做動畫，按呢咱就會當看著 in 排做一排做伙自轉，咱嘛較好做比較。 Tī 這支 縮時攝影影片 內底，地球 ê 一工，就是地球自轉一輾，才幾若秒爾爾。 木星 自轉 ê 速度較緊，金星 自轉毋若較慢（是講你敢看有？），而且是踅倒反--ê。 動畫頂半爿是岩石質 ê 太陽系內行星，大部份應該是 tī 太陽系形成早期 kah 其他天體有 激烈 ê 相挵，造成自轉方向改變。 這寡行星 ê 自轉 kah 趨角是按怎變做這馬按呢，是一个 研究主題。 這會當 ùi 現代 電腦模擬 kah 最近發現--ê 幾若百粒 系外行星 ê 分析，得著啟發。 系外行星就是 踅其他恆星咧行 ê 行星。

[POJ] Thài-iông-hē lāi-té ê kiâⁿ-chhiⁿ: Chhu-kak kah Chū-choán

M̄-chai lí siōng kah-ì ê kiâⁿ-chhiⁿ ê chū-choán sī siáⁿ-mih-khoán--ê? I kám-sī se̍h chiok kín--ê? I ê chū-choán hong-hiòng sī tūi-ti̍t--ê? Thán-pîⁿ--ê? Ia̍h-sī se̍h tò-péng--ê? Chit ki iáⁿ-phìⁿ ū kā NASA hip--ê Thài-iông-hē peh-lia̍p kiâⁿ-chhiⁿ iáⁿ-siōng ōe chò tōng-ōe, án-ne lán to̍h ē-tàng khòaⁿ-tio̍h in pái chò chi̍t-pâi chò-hóe chū-choán, lán mā khah hó chò pí-kàu. Tī chit ki sok-sî-liap-iáⁿ iáⁿ-phìⁿ lāi-té, Tē-kiû ê chi̍t-kang, to̍h-sī Tē-kiû chū-choán chi̍t-liàn, chiah kúi-ā bió niā-niā. Bo̍k-chhiⁿ chū-choán ê sok-tō͘ khah kín, Kim-chhiⁿ chū-choán m̄-nā khah bān (sī-kóng lí kám khòaⁿ-ū?), jî-chhiáⁿ sī se̍h tò-péng--ê. Tōng-ōe téng-pòaⁿ-pêng sī giâm-chio̍h-chit ê Thài-iông-hē lōe-kiâⁿ-chhiⁿ, tōa-pō͘-hūn èng-kai sī tī Thài-iông-hē hêng-sêng chá-kî kah kî-tha thian-thé ū kek-lia̍t ê sio-lòng, chō-sêng chū-choán hong-hiòng kái-piàn. Chit-kóa kiâⁿ-chhiⁿ ê chū-choán kah chhu-kak sī án-ná piàn-chò chit-má án-ne, sī chi̍t-ê gián-kiù chú-tê. Che ē-tàng ùi hiān-tāi tiān-náu bô͘-gí kah chòe-kīn hoat-hiān--ê kúi-ā pah-lia̍p hē-gōa-kiâⁿ-chhiⁿ ê hun-sek, tit-tio̍h khé-hoat. Hē-gōa-kiâⁿ-chhiⁿ to̍h-sī se̍h kî-tha hêng-chhiⁿ leh kiâⁿ ê kiâⁿ-chhiⁿ.

[KIP] Thài-iông-hē lāi-té ê kiânn-tshinn: Tshu-kak kah Tsū-tsuán

M̄-tsai lí siōng kah-ì ê kiânn-tshinn ê tsū-tsuán sī siánn-mih-khuán--ê? I kám-sī se̍h tsiok kín--ê? I ê tsū-tsuán hong-hiòng sī tuī-ti̍t--ê? Thán-pînn--ê? Ia̍h-sī se̍h tò-píng--ê? Tsit ki iánn-phìnn ū kā NASA hip--ê Thài-iông-hē peh-lia̍p kiânn-tshinn iánn-siōng uē tsò tōng-uē, án-ne lán to̍h ē-tàng khuànn-tio̍h in pái tsò tsi̍t-pâi tsò-hué tsū-tsuán, lán mā khah hó tsò pí-kàu. Tī tsit ki sok-sî-liap-iánn iánn-phìnn lāi-té, Tē-kiû ê tsi̍t-kang, to̍h-sī Tē-kiû tsū-tsuán tsi̍t-liàn, tsiah kuí-ā bió niā-niā. Bo̍k-tshinn tsū-tsuán ê sok-tōo khah kín, Kim-tshinn tsū-tsuán m̄-nā khah bān (sī-kóng lí kám khuànn-ū?), jî-tshiánn sī se̍h tò-píng--ê. Tōng-uē tíng-puànn-pîng sī giâm-tsio̍h-tsit ê Thài-iông-hē luē-kiânn-tshinn, tuā-pōo-hūn ìng-kai sī tī Thài-iông-hē hîng-sîng tsá-kî kah kî-tha thian-thé ū kik-lia̍t ê sio-lòng, tsō-sîng tsū-tsuán hong-hiòng kái-piàn. Tsit-kuá kiânn-tshinn ê tsū-tsuán kah tshu-kak sī án-ná piàn-tsò tsit-má án-ne, sī tsi̍t-ê gián-kiù tsú-tê. Tse ē-tàng uì hiān-tāi tiān-náu bôo-gí kah tsuè-kīn huat-hiān--ê kuí-ā pah-lia̍p hē-guā-kiânn-tshinn ê hun-sik, tit-tio̍h khé-huat. Hē-guā-kiânn-tshinn to̍h-sī se̍h kî-tha hîng-tshinn leh kiânn ê kiânn-tshinn.

[English] Planets of the Solar System: Tilts and Spins

How does your favorite planet spin? Does it spin rapidly around a nearly vertical axis, or horizontally, or backwards? The featured video animates NASA images of all eight planets in our Solar System to show them spinning side-by-side for an easy comparison. In the time-lapse video, a day on Earth -- one Earth rotation -- takes just a few seconds. Jupiter rotates the fastest, while Venus spins not only the slowest (can you see it?), but backwards. The inner rocky planets, across the top, most certainly underwent dramatic spin-altering collisions during the early days of the Solar System. The reasons why planets spin and tilt as they do remains a topic of research with much insight gained from modern computer modeling and the recent discovery and analysis of hundreds of exoplanets: planets orbiting other stars.

詞彙學習