中國天頂 ê 虹彩頭巾雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：An Iridescent Pileus Cloud over China
• 影像來源 kah 版權：Jiaqi Sun （孙嘉琪）
• 探索你 ê 宇宙：APOD 亂數產生器
• 台文翻譯：An-Li Tsai (NCU)

[漢羅] 中國天頂 ê 虹彩頭巾雲

是講，毋知有偌濟烏雲有彩色 ê 內裡？ 這張相片內底，tī 烏雲後壁–ê，是一个有 虹彩 ê 頭巾雲。 彼是一陣差不多平大粒 ê 水滴，因為 tùi 無仝色光 ê 日光 做伙 產生 繞射 ê 量無仝，才會產生按呢 ê 現象。 這張相片 是頂個月 tī 中國 雲南省 普洱市 翕–ê。 嘛有翕著 tī 頭巾雲頂懸彼个無四常 ê 雲 波。 這款 頭巾雲 實在是真罕得看著，伊就崁 tī 一般 積雲 面頂。 會變做這形，是因為較低 ê 雲 peh 懸 ê 過程會 擴大。 是講，伊落尾嘛有可能發展做 暴風雨。

[POJ] Tiong-kok thiⁿ-téng ê khēng-chhái Thâu-kin-hûn

Sī kóng, m̄-chai ū gōa-chōe o͘-hûn ū chhái-sek ê lāi-lí? Chit-tiuⁿ siòng-phìⁿ lāi-té, tī o͘-hûn āu-piah–ê, sī chi̍t-ê ū khēng-chhái ê Thâu-kin-hûn. He sī chi̍t-tīn chha-put-to pêⁿ-tōa-lia̍p ê chúi-tih, in-ūi tùi bô-kâng se̍k-kng ê ji̍t-kng chò-hóe sán-seng jiàu-siā ê liōng bô-kâng, chiah-ē sán-seng án-ne ê hiān-siōng. Chit tiuⁿ siòng-phìⁿ sī téng-kò-goe̍h tī Tiong-kok Hûn-lâm-séng Phó͘-jíⁿ-chhī hip–ê. Mā ū hip-tio̍h tī Thâu-kin-hûn téng-koân hit-ê bô sù-siông ê hûn-pho. Chit khoán Thâu-kin-hûn si̍t-chāi sī chin hán-tit khòaⁿ-tio̍h, i to̍h khàm tī it-poaⁿ chek-hun bīn-téng. Ē piàn-chò chit hêng, sī in-ūi khah kē ê hûn peh koân ê kòe-têng ē khok-tōa. Sī kóng, i lo̍h-bóe mā ū khó-lêng hoat-tián chò pō-hong-ú.

[KIP] Tiong-kok thinn-tíng ê khīng-tshái Thâu-kin-hûn

Sī kóng, m̄-tsai ū guā-tsuē oo-hûn ū tshái-sik ê lāi-lí? Tsit-tiunn siòng-phìnn lāi-té, tī oo-hûn āu-piah–ê, sī tsi̍t-ê ū khīng-tshái ê Thâu-kin-hûn. He sī tsi̍t-tīn tsha-put-to pênn-tuā-lia̍p ê tsuí-tih, in-uī tuì bô-kâng si̍k-kng ê ji̍t-kng tsò-hué sán-sing jiàu-siā ê liōng bô-kâng, tsiah-ē sán-sing án-ne ê hiān-siōng. Tsit tiunn siòng-phìnn sī tíng-kò-gue̍h tī Tiong-kok Hûn-lâm-síng Phóo-jínn-tshī hip–ê. Mā ū hip-tio̍h tī Thâu-kin-hûn tíng-kuân hit-ê bô sù-siông ê hûn-pho. Tsit khuán Thâu-kin-hûn si̍t-tsāi sī tsin hán-tit khuànn-tio̍h, i to̍h khàm tī it-puann tsik-hun bīn-tíng. Ē piàn-tsò tsit hîng, sī in-uī khah kē ê hûn peh kuân ê kuè-tîng ē khok-tuā. Sī kóng, i lo̍h-bué mā ū khó-lîng huat-tián tsò pō-hong-ú.

[English] An Iridescent Pileus Cloud over China

Yes, but how many dark clouds have a multicolored lining? Pictured, behind this darker cloud, is a pileus iridescent cloud, a group of water droplets that have a uniformly similar size and so together diffract different colors of sunlight by different amounts. The featured image was taken last month in Pu’er, Yunnan Province, China. Also captured were unusual cloud ripples above the pileus cloud. The formation of a rare pileus cloud capping a common cumulus cloud is an indication that the lower cloud is expanding upward and might well develop into a storm.

詞彙學習（漢羅/POJ/KIP/華語/English）

• 【虹彩】khēng-chhái/khīng-tshái/虹彩/Iridescence
• 【頭巾雲】thâu-kin-hûn/thâu-kin-hûn/幞狀雲/Pileus Cloud
• 【積雲】chek-hûn/tsik-hûn/積雲/cumulus cloud
• 【繞射】jiàu-siā/jiàu-siā/繞射/diffract
• 【雲波】hûn-pho/hûn-pho/雲波/cloud ripple
• 【普洱市】Phó͘-jíⁿ-chhī/Phóo-jínn-tshī/普洱市/Pu’er city