火星 ê Siccar 角

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Siccar Point on Mars
• 影像來源：NASA/JPL-Caltech/MSSS; 資料處理 kah 許可: Kevin M. Gill
• 台文翻譯：An-Li Tsai (NCU)

[漢羅] 火星 ê Siccar 角

是啥人 tī 火星面頂做出這个奇怪 ê 山崙？ 無人知影。 Siccar 角 tī Gale 隕石坑 內底，kah 伊邊仔 ê 地形比起來是有較尖，伊是一个袂䆀 ê 觀景點。 Tī 火星 面頂走傱 ê 好奇號 機器人探測車，進前捌來過這个奇怪 ê 山崙仔。 Siccar 角 毋若有出眾 ê 外形，tī 較淺色 ê 岩石頂懸閣有較深色 ê 岩石。 深色岩石看起來較少年，表示講這个 tī 一般岩石層 ê 地質順序 有斷去，毋閣這个過程咱 並無了解。 這个 火星山 ê 名，是用地球 ê Siccar 角 號名–ê。 彼是一个 tī 蘇格蘭 足出眾 ê 地點，kā 兩个無仝 ê 岩石層連起來。 好奇號 會繼續 tī 火星面頂探索 Gale 隕石坑，揣看有性命ê線索無。 仝這个時間，2300 公里遠 ê 所在有伊 ê 姊妹伴 毅力號 探測車 當咧探索 Jezeor 隕石坑。 毅力號閣有一台 會飛 ê 偵察兵 獨創號 咧協助伊。

[POJ] Hóe-chhiⁿ ê Siccar Kak

Sī siáⁿ-lâng tī Hóe-chhiⁿ bīn-téng chò-chhut chit-ê kî-koài ê soaⁿ-lūn? Bô lâng chai-iáⁿ. Siccar Kak tī Gale ún-se̍k-kheⁿ lāi-té, kah i piⁿ-á ê Tē-hêng pí–khí-lâi sī ū khah chiam, i sī chi̍t-ê bōe-bái ê koan-kéng-tiám. Tī Hóe-chhiⁿ bīn-téng cháu-chông ê Hòⁿ-kî-hō ke-khì-lâng thàm-chhek-chhia, chìn-chêng bat lâi kòe chit-ê kî-koài ê soaⁿ-lūn-á. Siccar Kak m̄-nā ū chhut-chiòng ê gōa-hêng, tī khah chhián-sek ê giâm-chio̍h téng-koân koh ū khah chhim-sek ê giâm-chio̍h. Chhim-sek giâm-chio̍h khòaⁿ–khí-lâi khah siàu-liân, piáu-sī kóng chit-ê tī it-poaⁿ giâm-chio̍h-chân ê tē-chit sūn-sī ū tn̄g–khì, m̄-koh chit ê kòe-têng lán pēng bô liáu-kái. Chit ê hóe-chhiⁿ-soaⁿ ê miâ, sī iōng Tē-kiû ê Siccar Kak hō-miâ–ê. He sī chi̍t-ê tī So͘-kek-lân chiok chhut-chiòng ê tē-tiám, kā nn̄g-ê bô-kâng ê giâm-chio̍h-chân liân–khí-lâi. Hòⁿ-kî-hō ē kè-sio̍k tī Hóe-chhiⁿ bīn-téng thàm-soh Gale ún-se̍k-kheⁿ, chhōe khòaⁿ ū sìⁿ-miā ê sòaⁿ-soh bô. Kāng chit-ê sî-kan, 2300 kong-lí hn̄g ê só͘-chāi ū i ê chí-mōe-phōaⁿ Gē-le̍k-hō thàm-chhek-chhia tng-leh thàm-soh Jezeor ún-se̍k-kheⁿ. Gē-le̍k-hō koh ū chi̍t tâi ē poe ê cheng-chhat-peng To̍k-chhòng-hō leh hia̍p-chō͘ i.

[KIP] Hué-tshinn ê Siccar Kak

Sī siánn-lâng tī Hué-tshinn bīn-tíng tsò-tshut tsit-ê kî-kuài ê suann-lūn? Bô lâng tsai-iánn. Siccar Kak tī Gale ún-si̍k-khenn lāi-té, kah i pinn-á ê Tē-hîng pí–khí-lâi sī ū khah tsiam, i sī tsi̍t-ê buē-bái ê kuan-kíng-tiám. Tī Hué-tshinn bīn-tíng tsáu-tsông ê Hònn-kî-hō ke-khì-lâng thàm-tshik-tshia, tsìn-tsîng bat lâi kuè tsit-ê kî-kuài ê suann-lūn-á. Siccar Kak m̄-nā ū tshut-tsiòng ê guā-hîng, tī khah tshián-sik ê giâm-tsio̍h tíng-kuân koh ū khah tshim-sik ê giâm-tsio̍h. Tshim-sik giâm-tsio̍h khuànn–khí-lâi khah siàu-liân, piáu-sī kóng tsit-ê tī it-puann giâm-tsio̍h-tsân ê tē-tsit sūn-sī ū tn̄g–khì, m̄-koh tsit ê kuè-tîng lán pīng bô liáu-kái. Tsit ê hué-tshinn-suann ê miâ, sī iōng Tē-kiû ê Siccar Kak hō-miâ–ê. He sī tsi̍t-ê tī Soo-kik-lân tsiok tshut-tsiòng ê tē-tiám, kā nn̄g-ê bô-kâng ê giâm-tsio̍h-tsân liân–khí-lâi. Hònn-kî-hō ē kè-sio̍k tī Hué-tshinn bīn-tíng thàm-soh Gale ún-si̍k-khenn, tshuē khuànn ū sìnn-miā ê suànn-soh bô. Kāng tsit-ê sî-kan, 2300 kong-lí hn̄g ê sóo-tsāi ū i ê tsí-muē-phuānn Gē-li̍k-hō thàm-tshik-tshia tng-leh thàm-soh Jezeor ún-si̍k-khenn. Gē-li̍k-hō koh ū tsi̍t tâi ē pue ê tsing-tshat-ping To̍k-tshòng-hō leh hia̍p-tsōo i.

[English] Siccar Point on Mars

What created this unusual hill on Mars? No one is sure. A good outlook to survey the surrounding area, Siccar Point stands out from its surroundings in Gale Crater. The unusual mound was visited by the robotic Curiosity rover exploring Mars late last year. Siccar Point not only has a distinctive shape, it has dark rocks above lighter rocks. The apparent much younger age of the dark rocks indicates a time-break in the usual geological ordering of rock layers – by a process yet unknown. The Martian hill is named for Siccar Point on Earth, a place in Scotland itself distinctive as a junction between two different rock layers. Curiosity continues to explore Gale crater on Mars, looking for clues of ancient life. Simultaneously, 2300 kilometers away, its sister rover Perseverance explores Jezero crater, there assisted by the flight-capable scout Ingenuity.

詞彙學習（漢羅/POJ/KIP/華語/English）

• 【火星】Hóe-chhiⁿ/Hué-tshinn/火星/Mars
• 【好奇號】Hòⁿ-kî-hō/Hònn-kî-hō/好奇號/Curiosity
• 【探測車】thàm-chhek-chhia/thàm-tshik-tshia/探測車/rover
• 【毅力號】Gē-le̍k-hō/Gē-li̍k-hō/毅力號/Perseverance
• 【獨創號】To̍k-chhòng-hō/To̍k-tshòng-hō/獨創號/Ingenuity
• 【偵察兵】cheng-chhat-peng/tsing-tshat-ping/偵察兵/scout