近木軌道 11：飛過木星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：perijove 11: Passing Jupiter
• 影片來源：License: NASA, Juno, SwRI, MSSS, [Gerald Eichstadt](http://www.planetary.org/connect/our-experts/profiles/ gerald-eichstdt.html)；音樂：Moonlight Sonata (Ludwig van Beethoven)
• 予老師 kah 學生：愛按怎 tī 上課 ê 時陣用「逐工一幅天文圖」ê 文章
• 台文翻譯：An-Li Tsai (NCU)

[漢羅] 近木軌道 11：飛過木星

木星來矣！ 木星是太陽系內底上大粒 ê 行星。 NASA ê 機器人太空船 Juno，是踅木星咧行 ê 太空船，伊 ê 運行軌道是搝長–ê。 這支影片是 2018 前半年 翕–ê。 是 ùi 近木軌道 11，就是 Juno 第 11 擺飛過木星 彼陣翕–ê。 Juno 頭一擺飛到木星附近，是 2016 年中彼陣。 這支加強色彩 ê 縮時攝影影片，是 kā 4 點鐘內底 ê 影像 kah 36 張 JunoCam 翕 ê 相片鬥出來–ê。 這支影片 上開始，是 Juno 飛到木星附近 彼陣，木星 就 ùi Juno 北方出現。 等 Juno 足倚木星 ê 時陣，差不多是 木星雲頂 3500 公里懸 ê 所在，太空船就翕著這粒大行星 足濟細節矣。 Juno 飛過踅木星雲 ê 光區 kah 暗帶，閣有一大堆 tī 木星表面 捲踅 ê 圓形風暴。 In 大部份攏比 地球 ê 風颱 較大。 等飛過 近木點 了後，木星 會愈來愈遠，紲落來咱會看著 木星南方 彼寡無四常 ê 雲。 等 Juno 提有夠伊欲愛 ê 科學資料，伊就會落落去 木星 內底。 時到伊 ê 儀器就會暴露 tī 超高能輻射 ê 環境內底。

[POJ] Kīn-bo̍k-kúi-tō 11: Poe kòe Bo̍k-chhiⁿ

Bo̍k-chhiⁿ lâi–ah! Bo̍k-chhiⁿ sī Thài-iông-hē lāi-té siōng tōa-lia̍p ê kiâⁿ-chhiⁿ. NASA ê ke-khì-lâng thài-khong-chûn Juno, sī se̍h Bo̍k-chhiⁿ leh kiâⁿ ê thài-khong-chûn, i ê ūn-hêng kúi-tō sī giú-tn̂g–ê. Chit ki iáⁿ-phìⁿ sī 2018 nî chêng-pòaⁿ-nî hip–ê. Sī ùi Kīn-bo̍k-kúi-tō 11, to̍h-sī Juno tē 11 pái poe kòe Bo̍k-chhiⁿ hit-chūn hip–ê. Juno thâu-chi̍t-pái poe kàu Bo̍k-chhiⁿ hū-kīn, sī 2016 nî-tiong hit-chūn. Chit-ki chhái-sek ka-kiông sek-chhái ê sok-sî-liap-iáⁿ iáⁿ-phìⁿ, sī kā 4 tiám-cheng lāi-té ê iáⁿ-siōng kah 36 tiuⁿ JunoCam hip ê siòng-phìⁿ tàu–chhut-lâi–ê. Chit-ki iáⁿ-siōng siōng khai-sí, sī Juno poe kàu Bo̍k-chhiⁿ hū-kīn hit-chūn, Bo̍k-chhiⁿ to̍h ùi Juno pak-hong chhut-hiān. Tán Juno chiok óa Bo̍k-chhiⁿ ê sî-chūn, chha-put-to sī Bo̍k-chhiⁿ hûn téng 3500 kong-lí koân ê só͘-chāi, thài-khong-chûn to̍h hip-thioh chit-lia̍p tōa-kiâⁿ-chhiⁿ chiok chōe sè-chiat–ah Juno poe kòe se̍h Bo̍k-chhiⁿ hûn ê kng-khu kah àm-tòa, koh ū chi̍t tōa-tui tī Bo̍k-chhiⁿ piáu-bīn kńg-se̍h ê îⁿ-hêng hong-pō. In tōa-pō͘-hūn lóng pí Tē-kiû ê hong-pō khah tōa. Tán poe kòe kīn-bo̍k-tiám liáu-āu, Bo̍k-chhiⁿ ē lú lâi lú hn̄g, sòa–lo̍h-lâi lán ē khòaⁿ-tio̍h Bo̍k-chhiⁿ lâm-hong hit-kóa bô sù-siông ê hûn. Tán Juno the̍h ū-kàu i beh ài ê kho-ha̍k chu-liāu, i to̍h ē la̍k–lo̍h-khì Bo̍k-chhiⁿ lāi-té. Sî-kàu i ê gî-khì to̍h ē pō-lō͘ tī chhiau ko-lêng hok-siā ê khoân-kéng lāi-té.

[KIP] Kīn-bo̍k-kuí-tō 11: Pue kuè Bo̍k-tshinn

Bo̍k-tshinn lâi–ah! Bo̍k-tshinn sī Thài-iông-hē lāi-té siōng tuā-lia̍p ê kiânn-tshinn. NASA ê ke-khì-lâng thài-khong-tsûn Juno, sī se̍h Bo̍k-tshinn leh kiânn ê thài-khong-tsûn, i ê ūn-hîng kuí-tō sī giú-tn̂g–ê. Tsit ki iánn-phìnn sī 2018 nî tsîng-puànn-nî hip–ê. Sī uì Kīn-bo̍k-kuí-tō 11, to̍h-sī Juno tē 11 pái pue kuè Bo̍k-tshinn hit-tsūn hip–ê. Juno thâu-tsi̍t-pái pue kàu Bo̍k-tshinn hū-kīn, sī 2016 nî-tiong hit-tsūn. Tsit-ki tshái-sik ka-kiông sik-tshái ê sok-sî-liap-iánn iánn-phìnn, sī kā 4 tiám-tsing lāi-té ê iánn-siōng kah 36 tiunn JunoCam hip ê siòng-phìnn tàu–tshut-lâi–ê. Tsit-ki iánn-siōng siōng khai-sí, sī Juno pue kàu Bo̍k-tshinn hū-kīn hit-tsūn, Bo̍k-tshinn to̍h uì Juno pak-hong tshut-hiān. Tán Juno tsiok uá Bo̍k-tshinn ê sî-tsūn, tsha-put-to sī Bo̍k-tshinn hûn tíng 3500 kong-lí kuân ê sóo-tsāi, thài-khong-tsûn to̍h hip-thioh tsit-lia̍p tuā-kiânn-tshinn tsiok tsuē sè-tsiat–ah Juno pue kuè se̍h Bo̍k-tshinn hûn ê kng-khu kah àm-tuà, koh ū tsi̍t tuā-tui tī Bo̍k-tshinn piáu-bīn kńg-se̍h ê înn-hîng hong-pō. In tuā-pōo-hūn lóng pí Tē-kiû ê hong-pō khah tuā. Tán pue kuè kīn-bo̍k-tiám liáu-āu, Bo̍k-tshinn ē lú lâi lú hn̄g, suà–lo̍h-lâi lán ē khuànn-tio̍h Bo̍k-tshinn lâm-hong hit-kuá bô sù-siông ê hûn. Tán Juno the̍h ū-kàu i beh ài ê kho-ha̍k tsu-liāu, i to̍h ē la̍k–lo̍h-khì Bo̍k-tshinn lāi-té. Sî-kàu i ê gî-khì to̍h ē pō-lōo tī tshiau ko-lîng hok-siā ê khuân-kíng lāi-té.

[English] perijove 11: Passing Jupiter

Here comes Jupiter! NASA’s robotic spacecraft Juno is continuing on its highly-elongated orbits around our Solar System’s largest planet. The featured video is from perijove 11 in early 2018, the eleventh time Juno has passed near Jupiter since it arrived in mid-2016. This time-lapse, color-enhanced movie covers about four hours and morphs between 36 JunoCam images. The video begins with Jupiter rising as Juno approaches from the north. As Juno reaches its closest view – from about 3,500 kilometers over Jupiter’s cloud tops – the spacecraft captures the great planet in tremendous detail. Juno passes light zones and dark belt of clouds that circle the planet, as well as numerous swirling circular storms, many of which are larger than hurricanes on Earth. After the perijove, Jupiter recedes into the distance, then displaying the unusual clouds that appear over Jupiter’s south. To get desired science data, Juno swoops so close to Jupiter that its instruments are exposed to very high levels of radiation.

詞彙學習（漢羅/POJ/KIP/華語/English）

• 【近木軌道 11】kīn-bo̍k kúi-tō 11/īn-bo̍k kuí-tō 11/近木軌道 11/perijove 11
• 【近木點】kīn-bo̍k-tiám/kīn-bo̍k-tiám/近木點/perijove
• 【光區】kng-khu/kng-khu/光區/light zone
• 【暗帶】àm-tòa/àm-tuà/暗帶/dark belt
• 【縮時攝影】sok-sî-liap-iáⁿ/sok-sî-liap-iánn/縮時攝影/time-lapse
• 【Juno 號太空船】Juno hō thài-khong-chûn/Juno hō thài-khong-tsûn/朱諾號/Juno spacecraft