星塵 kah 彗尾

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Stardust and Comet Tails
• 影像來源 kah 版權：Rolando Ligustri (CARA Project, CAST)
• 台文翻譯：An-Li Tsai (NCU)

[漢羅] 星塵 kah 彗尾

C/2017 K2 (PanSTARRS) 彗星 這馬 tī 天頂掃過天蠍座，是天文觀測者追蹤 ê 目標。 伊這馬當咧飛 tùi 近日點 ê 方向去，會 tī 12 月 19 這工到伊 ê 近地點。 彗星 ùi 8 月 18 開始，就 tī 咱 ê 深空 出現 青色 ê 彗鬚、長長白白 ê 塗粉尾溜、kah 較短 ê 離子尾溜矣。 這張視野 2x3 度闊 ê 相片，有一部份是反射藍光、厚塗粉 ê IC 4592 星雲。 IC 4592 嘛叫做 藍色馬頭星雲，伊離咱有 400 光年遠，毋閣 彗星離咱才 17 光分爾爾。 咱頭一擺看著 C/2017 K2 彗星 ê 時陣，伊猶 tī 土星軌道後壁，當咧飛到咱 ê 內太陽系。 伊是 ùi 遙遠 ê Oort 雲 來–ê 人客，是一位會當提供咱早期太陽系資訊 ê 訪客。

[POJ] Seng-tîn kah Hūi-bóe

C/2017 K2 (PanSTARRS) hui-chhiⁿ chit-má tī thiⁿ-téng sàu-kòe Thian-giat-chō, sī, sī thian-bûn koan-chhek-chiá tui-chong ê bo̍k-piau. I chit-má tng-leh poe tùi kīn-ji̍t-tiám ê hong-hiòng khì, ē tī 12 goe̍h 19 chit-kang kàu i ê kīn-tē-tiám. Hui-chhiⁿ ùi 8 goe̍h 18 khai-sí, to̍h tī lán ê chhim-khong chhut-hiān chhiⁿ-sek ê hūi-chhiu, tn̂g-tn̂g pe̍h-pe̍h ê thô͘-hún-bóe-liu, kah khah té ê lî-chú-bóe-liu –ah. Chit-tiuⁿ sī-iá nn̄g sêng saⁿ tō͘ khoah ê siòng-phìⁿ, ū chi̍t-pō͘-hūn sī hoán-siā nâ-kng, kāu thô͘-hún ê IC 4592 seng-hûn. IC 4592 mā kiò-chò Nâ-sek Bé-thâu-seng-hûn, i lī lán ū 400 kng-nî hn̄g, m̄-koh hui-chhiⁿ lī lán chiah 17 kng-hun niā-niā. Lán thâu chi̍t-pái khòaⁿ-tio̍h C/2017 K2 hui-chhiⁿ ê sî-chūn, i iáu tī Thó͘-chhiⁿ kúi-tō āu-piah, tng-leh poe kàu lán ê Lōe Thài-iông-hē. I sī ùi iâu-oán ê Oort hûn 來–ê lâng-kheh, sī chi̍t-ūi ē-tàng the̍h-kiong lán chá-kî Thài-iông-hē chū-sìn ê hóng-kheh.

[KIP]Sing-tîn kah Huī-bué

C/2017 K2 (PanSTARRS) hui-tshinn tsit-má tī thinn-tíng sàu-kuè Thian-giat-tsō, sī, sī thian-bûn kuan-tshik-tsiá tui-tsong ê bo̍k-piau. I tsit-má tng-leh pue tuì kīn-ji̍t-tiám ê hong-hiòng khì, ē tī 12 gue̍h 19 tsit-kang kàu i ê kīn-tē-tiám. Hui-tshinn uì 8 gue̍h 18 khai-sí, to̍h tī lán ê tshim-khong tshut-hiān tshinn-sik ê huī-tshiu, tn̂g-tn̂g pe̍h-pe̍h ê thôo-hún-bué-liu, kah khah té ê lî-tsú-bué-liu –ah. Tsit-tiunn sī-iá nn̄g sîng sann tōo khuah ê siòng-phìnn, ū tsi̍t-pōo-hūn sī huán-siā nâ-kng, kāu thôo-hún ê IC 4592 sing-hûn. IC 4592 mā kiò-tsò Nâ-sik Bé-thâu-sing-hûn, i lī lán ū 400 kng-nî hn̄g, m̄-koh hui-tshinn lī lán tsiah 17 kng-hun niā-niā. Lán thâu tsi̍t-pái khuànn-tio̍h C/2017 K2 hui-tshinn ê sî-tsūn, i iáu tī Thóo-tshinn kuí-tō āu-piah, tng-leh pue kàu lán ê Luē Thài-iông-hē. I sī uì iâu-uán ê Oort hûn 來–ê lâng-kheh, sī tsi̍t-uī ē-tàng the̍h-kiong lán tsá-kî Thài-iông-hē tsū-sìn ê hóng-kheh.

[English] Stardust and Comet Tails

Heading for its closest approach to the Sun, or perihelion, on December 19 comet C/2017 K2 (PanSTARRS) remains a sight for telescopic observers as it sweeps through planet Earth’s skies in the constellation Scorpius. The comet currently sports a greenish coma, long whitish dust tail, and short ion tail in this deep image from August 18. The 2x3 degree wide field of view includes part of the dusty nebula IC 4592 reflecting blue starlight. Also known as the Blue Horsehead Nebula, IC 4592 is about 400 light-years distant while the comet is just under 17 light-minutes away. First spotted at a distance well beyond the orbit of Saturn C/2017 K2 is on its maiden voyage to the inner solar system, a pristine visitor from the remote Oort cloud.

詞彙學習（漢羅/POJ/KIP/華語/English）

• 【天蠍座】Thian-giat-chō/Thian-giat-tsō/天蠍座/Scorpius
• 【近日點】kīn-ji̍t-tiám/kīn-ji̍t-tiám/近日點/perihelion
• 【彗星】hui-chhiⁿ/hui-tshinn/彗星/comet
• 【星塵】seng-tîn/sing-tîn/星塵/stardust
• 【彗尾】hūi-bóe/huī-bué/彗尾/comet’s tail
• 【彗鬚】hūi-chhiu/huī-tshiu/彗髮/coma
• 【塗粉尾溜】thô͘-hún-bóe-liu/thôo-hún bué-liu/灰塵尾/dust tail
• 【離子尾溜】lî-chú-bóe-liu/lî-tsú bué-liu/離子尾/ion tail
• 【Oort 雲】Oort-hûn/Oort-hûn/歐特雲/Oort Cloud
• 【光分】kng-hun/kng-hun/光分/light-minute
• 【光年】kng-nî/kng-nî/光年/light-year
• 【藍色馬頭星雲】Nâ-sek Bé-thâu-seng-hûn/Nâ-sik Bé-thâu-sing-hûn/藍色馬頭星雲/Blue Horsehead Nebula
• 【IC 4592 星雲】IC sù-ngó͘-kiú-jī seng-hûn/IC sù-ngóo-kiú-jī sing-hûn/IC 4592 星雲/nebula IC 4592
• 【C/2017 K2 (PanSTARRS) 彗星】C jī-khòng-it-chhit K-two (PanSTARRS) hui-chhiⁿ / C jī-khòng-it-chhit K-two (PanSTARRS) hui-chhiⁿ / C/2017 K2 (PanSTARRS) 彗星 / comet C/2017 K2 (PanSTARRS)
• 【內太陽系】Lōe Thài-iông-hē/Luē Thài-iông-hē/內太陽系/Inner Solar System