1993 - 2022 年 ê 土星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Saturn: 1993 - 2022
• 影像來源 kah 版權：Tunc Tezel (TWAN)
• 台文翻譯：An-Li Tsai (NCU)

[漢羅] 1993 - 2022 年 ê 土星

土星是太陽系內底，咱用目睭 就會當直接看著–ê、上遠 ê 行星。 這張遮爾出眾 ê 天文影像投影是 ùi 1993 年開始翕土星，翕到 2022 年為止，按呢土星踅太陽一輾，算一个土星年。 你會當看著這个有環 ê 氣態巨行星 tī 一个土星年內底，按怎 tī 黃道面 面頂 行踏。 這是用 29 个 地球年，逐年翕一張影像，落尾才 kā 鬥做這張相片。 相片分做頂面 kah 下面兩張全景圖，主要是 tùi 黃道方向翕，閣 kah 銀河盤交叉。 1993 年 ê 土星就 tī 頂半張圖上正爿 ê 摩羯座遐，逐年向倒爿徙過去。 伊 tī 2022 年閣轉來到摩羯座，就 tī 下半張圖上倒爿遐。 這个一致 ê 影像表示講，土星 tī 2000 - 2005 kah 2015 - 2019 之間有變較光，應該是因為美麗 ê 土星環 tī 這个時期 踅過來向咱地球這爿。

[POJ] 1993 - 2022 nî ê Thó͘-chhiⁿ

Thó͘-chhiⁿ sī Thài-iông-hē lāi-té, lán iōng ba̍k-chiu to̍h ē-tàng ti̍t-chiap khòaⁿ–tio̍h–ê, siōng hn̄g ê kiâⁿ-chhiⁿ. Chit-tiuⁿ chiah-nī chhut-chiòng ê thian-bûn iáⁿ-siōng tâu-iáⁿ sī ùi 1993 nî khai-sí hip Thó͘-chhiⁿ, hip kàu 2022 nî ûi-chí, án-ni Thó͘-chhiⁿ se̍h Thài-iông chi̍t-liàn, sǹg chi̍t-ê Thó͘-chhiⁿ-nî. Lí ē-tàng khòaⁿ-tio̍h chit-ê ū khoân ê khì-thài kū kiâⁿ-chhiⁿ tī chi̍t-ê Thó͘-chhiⁿ nî lāi-té, án-ná tī n̂g-tō-bīn bīn-téng kiâⁿ-ta̍h. Che sī iōng 29 ê Tē-kiû nî, ta̍k-nî hip chi̍t-tiuⁿ iáⁿ-siōng, lo̍h-bóe chiah kā tàu-chò chit-tiuⁿ siòng-phìⁿ. Siòng-phìⁿ pun chò téng-bīn kah ē-bīn nn̄g-tiuⁿ choân-kéng-tô͘, chú-iàu sī tùi n̂g-tō hong-hiòng hip, koh kah Gîn-hô-pôaⁿ kau-chhe. 1993 nî ê Thó͘-chhiⁿ to̍h tī téng pòaⁿ-tiuⁿ-tô͘ siōng chiàⁿ-pêng ê Mô͘-kiat-chō hiah, ta̍k-nî hiòng tò-péng sóa kòe-khì. I tī 2022 nî koh tńg-lâi kàu Mô͘-kiat-chō, to̍h tī ē-pòaⁿ-tiuⁿ tô͘ siōng tò-péng hiah. Chit-ê it-tì ê iáⁿ-siōng piáu-sī kóng, Thó͘-chhiⁿ tī 2000 - 2005 kah 2015 - 2019 chi-kan ū piàn khah kng, èng-kai sī in-ūi bí-lē ê Thó͘-chhiⁿ-khoân tī chit-ê sî-ki se̍h kòe-lâi hiòng lán Tē-kiû chit-pêng.

[KIP] 1993 - 2022 nî ê Thóo-tshinn

Thóo-tshinn sī Thài-iông-hē lāi-té, lán iōng ba̍k-tsiu to̍h ē-tàng ti̍t-tsiap khuànn–tio̍h–ê, siōng hn̄g ê kiânn-tshinn. Tsit-tiunn tsiah-nī tshut-tsiòng ê thian-bûn iánn-siōng tâu-iánn sī uì 1993 nî khai-sí hip Thóo-tshinn, hip kàu 2022 nî uî-tsí, án-ni Thóo-tshinn se̍h Thài-iông tsi̍t-liàn, sǹg tsi̍t-ê Thóo-tshinn-nî. Lí ē-tàng khuànn-tio̍h tsit-ê ū khuân ê khì-thài kū kiânn-tshinn tī tsi̍t-ê Thóo-tshinn nî lāi-té, án-ná tī n̂g-tō-bīn bīn-tíng kiânn-ta̍h. Tse sī iōng 29 ê Tē-kiû nî, ta̍k-nî hip tsi̍t-tiunn iánn-siōng, lo̍h-bué tsiah kā tàu-tsò tsit-tiunn siòng-phìnn. Siòng-phìnn pun tsò tíng-bīn kah ē-bīn nn̄g-tiunn tsuân-kíng-tôo, tsú-iàu sī tuì n̂g-tō hong-hiòng hip, koh kah Gîn-hô-puânn kau-tshe. 1993 nî ê Thóo-tshinn to̍h tī tíng puànn-tiunn-tôo siōng tsiànn-pîng ê Môo-kiat-tsō hiah, ta̍k-nî hiòng tò-píng suá kuè-khì. I tī 2022 nî koh tńg-lâi kàu Môo-kiat-tsō, to̍h tī ē-puànn-tiunn tôo siōng tò-píng hiah. Tsit-ê it-tì ê iánn-siōng piáu-sī kóng, Thóo-tshinn tī 2000 - 2005 kah 2015 - 2019 tsi-kan ū piàn khah kng, ìng-kai sī in-uī bí-lē ê Thóo-tshinn-khuân tī tsit-ê sî-ki se̍h kuè-lâi hiòng lán Tē-kiû tsit-pîng.

[English] Saturn: 1993 - 2022

Saturn is the most distant planet of the Solar System easily visible to the unaided eye. In this remarkable astro-imaging project begun in 1993, you can follow the ringed gas giant for one Saturn year as it wanders once around the ecliptic plane, finishing a single orbit around the Sun by 2022. Constructed from individual images made over 29 Earth years, the split panorama is centered along the ecliptic and crossed by the plane of our Milky Way galaxy. Saturn’s position in 1993 is at the right side, upper panel in the constellation Capricornus and progresses toward the left. It returns to the spot in Capricornus at left in the lower panel in 2022. The consistent imaging shows Saturn appears slightly brighter during the years 2000-2005 and 2015-2019, periods when its beautiful rings were tilted more face-on to planet Earth.

詞彙學習（漢羅/POJ/KIP/華語/English）

• 【摩羯座】Mô͘-kiat-chō/Môo-kiat-tsō/摩羯座/Capricornus
• 【土星環】Thó͘-chhiⁿ-khoân/Thóo-tshinn-khuân/土星環/ring of Saturn
• 【氣態巨行星】khì-thài kū kiâⁿ-chhiⁿ/khì-thài kū kiânn-tshinn/氣態巨行星/gas giant
• 【黃道面】n̂g-tō-bīn/n̂g-tō-bīn/黃道面/ecliptic plane
• 【銀河盤】Gîn-hô-pôaⁿ/Gîn-hô-puânn/銀河盤/plane of the Milky Way