突尼西亞天頂 ê 流星風

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：A Meteor Wind over Tunisia
• 影像來源 kah 版權：Makrem Larnaout
• 台文翻譯：An-Li Tsai (NCU)

[漢羅] 突尼西亞天頂 ê 流星風

咱 ê 地球敢捌 ùi 流星風行過？ 有呢！而且咱定定看著 in 成做 流星雨 ê 形。 所有流星 ê 寸尺差不多攏 kah 沙 平大粒。 In 是 ùi 踅太陽咧行 ê 彗星抑是小行星落落來 ê 石霎仔，會繼續以長株圓軌道踅太陽行。 咱 ê 地球 kah in 是踅 仝一粒太陽，所以咱 tī 太空中，會去拄著這寡仝款 踅太陽咧行 ê 石霎仔流。 In 若是出現 tī 地球天頂，因為時間咧行，所以 in 就會成做一个 流星風。 這寡流星會 kā 地球大氣層 照予光，毋閣 in ê 性命嘛定定到遮就結束矣。 咱 ùi in ê 光跡 倒揣轉去，會當 tī 天頂揣著一點，就叫做 輻射點。 這張合成相片 是 tī 7 月底 寶瓶座 δ 南流星雨 上濟彼陣，踮突尼西亞 Zriba El Al 古早以前 ê 庄仔 Berber 庄，開超過 2 工 ê 時間翕–ê。 輻射點就 tī 相片正爿遐。 是講 幾若工前，咱地球才拄仔拄著另外一个 閣較有名 ê 流星風上強彼工，就是 英仙座流星雨。

[POJ] Tunisia thiⁿ-téng ê Liû-chhiⁿ-hong

Lán ê Tē-kiû kám bat ùi liû-chhiⁿ-hong kiâⁿ kòe? Ū neh! Jî-chhiáⁿ lán tiāⁿ-tiāⁿ khòaⁿ-ē-tio̍h in chiâⁿ chò liû-chhiⁿ-hō͘ ê hêng. Só͘-ū liû-chhiⁿ ê chhùn-chhioh chha-put-to lóng kah soa pîⁿ tōa lia̍p. In sī ùi se̍h Thài-iông leh kiâⁿ ê hui-chhiⁿ iah-sī sió-kiâⁿ-chhiⁿ lak-lo̍h-lâi ê chio̍h-sap-á, ē kè-sio̍k í tn̂g-tu-îⁿ kúi-tō se̍h Thài-iông kiâⁿ. Lán ê Tē-kiû kah in sī se̍h kāng chi̍t-lia̍p Thài-iông, só͘-í lán tī thài-khong tiong, ē khì tú-tio̍h chit-kóa kāng-khoán se̍h Thài-iông leh kiâⁿ ê chio̍h-sap-á liu. In nā-sī chhut-hiān tī Tē-kiû thiⁿ-téng, in-ūi sî-kan leh kiâⁿ, só͘-í in to̍h ē chiâⁿ-chò chi̍t-ê liû-chhiⁿ-hong. Chit-kóa liû-chhiⁿ ē kā Tē-kiû tōa-khì-chân chiò hō͘ kng, m̄-koh in ê sìⁿ-miā mā tiāⁿ-tiāⁿ kàu chiah to̍h kiat-sok–ah. Lán ùi in ê kng-jiah tò chhōe tńg-khì, ē-tàng tī thiⁿ-téng chhōe-tio̍h chi̍t-tiám, to̍h kiò-chò hok-siā-tiám. Chit-tiuⁿ ha̍p-sêng siòng-phìⁿ sī tī 7 goe̍h-té Pó-pân-chō δ Lâm liû-chhiⁿ-hō͘ siōng-chōe hit-chūn, tiàm Tu̍t-nî-se-a Zriba El Al kó͘-chá í-chêng ê chng-á Berber chng, khai chhiau-kòe 2 kang ê sî-kan hip–ê. Hok-siā-tiám to̍h tī siòng-phìⁿ chiàⁿ-pêng hiah. Sī-kóng kúi-ā kang chêng, lán Tē-kiû chiah tú-á tú-tio̍h lēng-gōa chi̍t-ê koh-khah ū-miâ ê liû-chhiⁿ-hong siōng kiông hit-kang, to̍h sī Eng-sian-chō liû-chhiⁿ-hō͘.

[KIP] Tunisia thinn-tíng ê Liû-tshinn-hong

Lán ê Tē-kiû kám bat uì liû-tshinn-hong kiânn kuè? Ū neh! Jî-tshiánn lán tiānn-tiānn khuànn-ē-tio̍h in tsiânn tsò liû-tshinn-hōo ê hîng. Sóo-ū liû-tshinn ê tshùn-tshioh tsha-put-to lóng kah sua pînn tuā lia̍p. In sī uì se̍h Thài-iông leh kiânn ê hui-tshinn iah-sī sió-kiânn-tshinn lak-lo̍h-lâi ê tsio̍h-sap-á, ē kè-sio̍k í tn̂g-tu-înn kuí-tō se̍h Thài-iông kiânn. Lán ê Tē-kiû kah in sī se̍h kāng tsi̍t-lia̍p Thài-iông, sóo-í lán tī thài-khong tiong, ē khì tú-tio̍h tsit-kuá kāng-khuán se̍h Thài-iông leh kiânn ê tsio̍h-sap-á liu. In nā-sī tshut-hiān tī Tē-kiû thinn-tíng, in-uī sî-kan leh kiânn, sóo-í in to̍h ē tsiânn-tsò tsi̍t-ê liû-tshinn-hong. Tsit-kuá liû-tshinn ē kā Tē-kiû tuā-khì-tsân tsiò hōo kng, m̄-koh in ê sìnn-miā mā tiānn-tiānn kàu tsiah to̍h kiat-sok–ah. Lán uì in ê kng-jiah tò tshuē tńg-khì, ē-tàng tī thinn-tíng tshuē-tio̍h tsi̍t-tiám, to̍h kiò-tsò hok-siā-tiám. Tsit-tiunn ha̍p-sîng siòng-phìnn sī tī 7 gue̍h-té Pó-pân-tsō δ Lâm liû-tshinn-hōo siōng-tsuē hit-tsūn, tiàm Tu̍t-nî-se-a Zriba El Al kóo-tsá í-tsîng ê tsng-á Berber tsng, khai tshiau-kuè 2 kang ê sî-kan hip–ê. Hok-siā-tiám to̍h tī siòng-phìnn tsiànn-pîng hiah. Sī-kóng kuí-ā kang tsîng, lán Tē-kiû tsiah tú-á tú-tio̍h līng-guā tsi̍t-ê koh-khah ū-miâ ê liû-tshinn-hong siōng kiông hit-kang, to̍h sī Ing-sian-tsō liû-tshinn-hōo.

[English] A Meteor Wind over Tunisia

Does the Earth ever pass through a wind of meteors? Yes, and they are frequently visible as meteor showers. Almost all meteors are sand-sized debris that escaped from a Sun-orbiting comet or asteroid, debris that continues in an elongated orbit around the Sun. Circling the same Sun, our Earth can move through an orbiting debris stream, where it can appear, over time, as a meteor wind. The meteors that light up in Earth’s atmosphere, however, are usually destroyed. Their streaks, though, can all be traced back to a single point on the sky called the radiant. The featured image composite was taken over two days in late July near the ancient Berber village Zriba El Alia in Tunisia, during the peak of the Southern Delta Aquariids meteor shower. The radiant is to the right of the image. A few days ago our Earth experienced the peak of a more famous meteor wind – the Perseids.

詞彙學習（漢羅/POJ/KIP/華語/English）

• 【流星風】liû-chhiⁿ-hong/liû-tshinn-hong/流星風/meteor wind
• 【流星雨】liû-chhiⁿ-hō͘/liû-tshinn-hōo/流星雨/meteor shower
• 【輻射點】hok-siā-tiám/hok-siā-tiám/輻射點/radiant
• 【寶瓶座 δ 南流星雨】Pó-pân-chō Delta Lâm liû-chhiⁿ-hō͘/Pó-pân-tsō Delta Lâm liû-tshinn-hōo/寶瓶座 δ 南流星雨/the Southern Delta Aquariids
• 【英仙座流星雨】Eng-sian-chō liû-chhiⁿ-hō͘/Ing-sian-tsō liû-tshinn-hō͘lta Lâm Liû-tshinn-hōo/英仙座流星雨/the Perseids
• 【突尼西亞】Tu̍t-nî-se-a/Tu̍t-nî-se-a/突尼西亞/Tunisia
• 【彗星】hui-chhiⁿ/hui-tshinn/彗星/comet
• 【小行星】sió-kiâⁿ-chhiⁿ/sió-kiânn-tshinn/小行星/asteroid