天鵝座雲牆 ê 恆星形成區

Page(/daily/2022/08/20220815)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 天鵝座雲牆 ê 恆星形成區

天頂 ê 北美洲星雲 會當做地球 ê 北美洲大陸 袂當做 ê 代誌:做恆星! 而且,kah 去予地球限制 ê 大陸比起來,這个較光–ê、看起來親像是 中美洲 kah 墨西哥 ê 星雲,實際上是氣體、塗粉、kah 新恆星 ê 燒眠床,咱 kā 叫做是 天鵝座雲牆。 這張 主題相片 內底 看會著恆星形成雲牆,伊去予 光閣少年 ê 恆星 照予光、閣去予侵蝕去,而且閣有 一部份藏 tī 伊產生 ê 烏暗 塗粉 內底。 相片內底 ê 北美洲星雲 (NGC 7000) 有 15 光年 闊,伊離咱有 1500 光年遠,就 chhāi tī 天鵝 ê 星座 (天鵝座) 內底。

[POJ] Thian-gô-chō hûn-chhiûⁿ ê Hêng-chhiⁿ hêng-sêng-khu

Thiⁿ-téng ê Pak-bí-chiu seng-hûn ē-tàng chò Tē-kiû ê Pak-bí-chiu tāi-lio̍k bē-tàng chò ê tāi-chì: Chò hêng-chhiⁿ! Jî-chhiáⁿ, kah khì hō͘ Tē-kiû hān-chè ê tāi-lio̍k pí–khí-lâi, chit-ê khah kng–ê, khòaⁿ–khí-lâi chhin-chhiūⁿ sī Tiong-bí-chiu kah Be̍k-se-ko ê seng-hûn, si̍t-chè-siōng sī khì-thé, thô͘-hún, kah sin hêng-chhiⁿ ê sio bîn-chhn̂g, lán kā kiò-chò sī Thian-gô-chō hûn-chhiûⁿ. Chit-tiuⁿ siòng-phìⁿ lāi-té khòaⁿ-ē-tio̍h hêng-chhiⁿ hêng-sêng hûn-chhiûⁿ, i khì hō͘ kng koh siàu-liân ê hêng-chhiⁿ chiò hō͘ kng, koh khì hō͘ chhim-sit–khì, jî-chhiáⁿ koh ū chi̍t-pō͘-hūn chhàng tī i sán-seng ê o͘-àm thô͘-hún lāi-té. Siòng-phìⁿ lāi-té ê Pak-bí-chiu seng-hûn (NGC 7000) ū 15 kng-nî khoah, i lî lán ū 1500 kng-nî hn̄g, to̍h chhāi tī Thian-gô-chō lāi-té.

[KIP] Thian-gô-tsō hûn-tshiûnn ê Hîng-tshinn hîng-sîng-khu

Thinn-tíng ê Pak-bí-tsiu sing-hûn ē-tàng tsò Tē-kiû ê Pak-bí-tsiu tāi-lio̍k bē-tàng tsò ê tāi-tsì: Tsò hîng-tshinn! Jî-tshiánn, kah khì hōo Tē-kiû hān-tsè ê tāi-lio̍k pí–khí-lâi, tsit-ê khah kng–ê, khuànn–khí-lâi tshin-tshiūnn sī Tiong-bí-tsiu kah Bi̍k-se-ko ê sing-hûn, si̍t-tsè-siōng sī khì-thé, thôo-hún, kah sin hîng-tshinn ê sio bîn-tshn̂g, lán kā kiò-tsò sī Thian-gô-tsō hûn-tshiûnn. Tsit-tiunn siòng-phìnn lāi-té khuànn-ē-tio̍h hîng-tshinn hîng-sîng hûn-tshiûnn, i khì hōo kng koh siàu-liân ê hîng-tshinn tsiò hōo kng, koh khì hōo tshim-sit–khì, jî-tshiánn koh ū tsi̍t-pōo-hūn tshàng tī i sán-sing ê oo-àm thôo-hún lāi-té. Siòng-phìnn lāi-té ê Pak-bí-tsiu sing-hûn (NGC 7000) ū 15 kng-nî khuah, i lî lán ū 1500 kng-nî hn̄g, to̍h tshāi tī Thian-gô-tsō lāi-té.

[English] The Cygnus Wall of Star Formation

The North America nebula on the sky can do what the North America continent on Earth cannot – form stars. Specifically, in analogy to the Earth-confined continent, the bright part that appears as Central America and Mexico is actually a hot bed of gas, dust, and newly formed stars known as the Cygnus Wall. The featured image shows the star forming wall lit and eroded by bright young stars, and partly hidden by the dark dust they have created. The part of the North America nebula (NGC 7000) shown spans about 15 light years and lies about 1,500 light years away toward the constellation of the Swan (Cygnus).

詞彙學習(漢羅/POJ/KIP/華語/English)

  • 【天鵝座雲牆】Thian-gô-chō hûn-chhiûⁿ/Thian-gô-tsō hûn-tshiûnn/天鵝座雲牆/Cygnus Wall
  • 【恆星形成區】hêng-chhiⁿ hêng-sêng-khu/hîng-tshinn hîng-sîng-khu/恆星形成區/star formation
  • 【北美洲星雲】Pak-bí-chiu seng-hûn/Pak-bí-tsiu sing-hûn/北美洲星雲/North America nebula
  • 【NGC 7000】NGC chhit-chheng/NGC tshit-tshing/NGC 7000/NGC 7000
  • 【中美洲】Tiong-bí-chiu/Tiong-bí-tsiu/中美洲/Central America
  • 【墨西哥】Be̍k-se-ko/Bi̍k-se-ko/墨西哥/Mexico

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:4000 粒系外行星 明仔載 ê 圖:突尼西亞天頂 ê 流星風