4000 粒系外行星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：4000 Exoplanets
• 影片來源：系統音樂 (M. Russo, A. Santaguida);資料來源：NASA Exoplanet Archive
• 台文翻譯：An-Li Tsai (NCU)

[漢羅] 4000 粒系外行星

咱這馬知影太陽系以外已經有超過 4000 粒行星。 這款行星就叫做 系外行星。 NASA 系外行星資料庫 記錄著--ê 系外行星數量，tī 頂個月才拄達成這个里程埤。 這支影片 kā 1992 年 一直到 2019 年確定有揣著 ê 系外行星，按照時間順序，用聲音 kah 色彩 kā 標出來。 這規張夜空圖，頭一个注意著 ê 部份，是去予 櫼做 大 U ê 銀河系 中央帶。 粉紅仔色--ê，是因為母恆星 ê 徑向速度 產生變化，造成伊 ê 色光產生小可仔變化，才揣著 ê 系外行星。 茄仔色--ê，是母恆星 ê 輝度 tī 凌星 過程中，小可仔變暗，才揣著 ê 系外行星。 柑仔色--ê，是 直接顯像 ê 系外行星。 青色--ê，是 微 重力透鏡效應 kā 背景星 ê 光 放大，才揣著 ê 系外行星。 行星若是踅家己 ê 母恆星較緊，就會 彈較懸 ê 聲調。 已經退休 ê Kepler 踅地衛星，是頭一个揣系外行星 ê 太空望遠鏡。 伊干焦踮天頂某一區揣。 這 4000 粒系外行星，有一半攏是伊揣著--ê。 毋閣猶咧運作 ê TESS 任務 揣著閣較濟，規个天區攏揣會著 踅厝邊 上光彼粒 恆星咧行 ê 行星。 揣 系外行星，毋若會當幫贊人類 閣較了解宇宙其他所在，是毋是 有可能有性命，嘛會當幫贊咱 了解 地球 佮 太陽系，是按怎形成--ê。

[POJ] 4000 lia̍p Hē-gōa Kiâⁿ-chhiⁿ

Lán chit-má chai-iáⁿ Thài-iông-hē ì-gōa í-keng ū chhiau-kòe 4000 lia̍p kiâⁿ-chhiⁿ. Chit-khóaⁿ kiâⁿ-chhiⁿ to̍h kiò-chò hē-gōa kiâⁿ-chhiⁿ. NASA hē-gōa kiâⁿ-chhiⁿ chu-liāu-khò͘ kì-lio̍k tio̍h--ê hē-gōa kiâⁿ-chhiⁿ sò͘-liōng, tī téng kò-goe̍h chiah tú ta̍t-sêng chit-ê lí-têng-pi. Chit-ki iáⁿ-phìⁿ kā 1992 nî it-ti̍t kàu 2019 nî khak-tēng ū chhōe-tio̍h ê hē-gōa kiâⁿ-chhiⁿ, àn-chiàu sî-kan sūn-sī, iōng siaⁿ-im kah se̍k-chhái kā piau--chhut-lâi. Chit kui-tiuⁿ iā-khong-tô͘, thâu-chi̍t-ê chù-ì tio̍h ê pō͘-hūn, sī khì hō͘ chiⁿ chò tōa U ê Gîn-hô-hē tiong-ng-tòa. Hún-âng-á-sek--ê, sī in-ūi bú-hêng-chhiⁿ ê kèng-hiòng sok-tō͘ sán-seng piàn-hòa, chō-sêng i ê se̍k-kng sán-seng sió-khóa-á piàn-hòa, chiah chhōe--tio̍h ê hē-gōa kiâⁿ-chhiⁿ. Kiô-á-sek--ê, sī bú-hêng-chhiⁿ ê hūi-tō͘ tī lêng-chhiⁿ kòe-têng tiong, sió-khóa-á piàn àm, chiah chhōe--tio̍h ê hē-gōa kiâⁿ-chhiⁿ. Kam-á-sek--ê, sī ti̍t-chiap hián-siōng ê hē-gōa kiâⁿ-chhiⁿ. Chhiⁿ-sek--ê, sī bî-tiōng-le̍k thàu-kiàⁿ-hāu-èng kā pōe-kéng chhiⁿ ê kng hòng-tōa, chiah chhōe--tio̍h ê hē-gōa kiâⁿ-chhiⁿ. Kiâⁿ-chhiⁿ nā-sī se̍h ka-tī ê bú-hêng-chhiⁿ khah kín, to̍h ē tôaⁿ khah koân ê siaⁿ-tiāu. Í-keng thè-hiu ê Kepler se̍h-tē-ūi-chhiⁿ, sī thâu-chi̍t-ê chhōe hē-gōa kiâⁿ-chhiⁿ ê Thài-khong-bōng-oán-kiàⁿ. I kan-na tiàm thiⁿ-téng bó͘ chi̍t-khu chhōe. Che 4000 lia̍p hē-gōa kiâⁿ-chhiⁿ, ū chi̍t-pòaⁿ lóng-sī i chhōe--tio̍h-ê。 M̄-koh iáu-leh ūn-chok ê TESS jīm-bū chhōe-tio̍h koh khah chōe, kui-ê thian-khu lóng chhōe-ē-tio̍h se̍h chhù-piⁿ siōng kng hit-lia̍p hêng-chhiⁿ leh kiâⁿ ê kiâⁿ-chhiⁿ. Chhōe hē-gōa kiâⁿ-chhiⁿ, m̄-nā ē-tàng pang-chān jîn-lūi koh-khah liáu-kái ú-tiū kî-tha só͘-chāi, sī-m̄-sī ū-khó-lêng ū sìⁿ-miā, mā ē-tàngpang-chān lán liáu-kái Tē-kiû kah Thài-iông-hē, sī án-ná hêng-sêng--ê.

[KIP] 4000 lia̍p Hē-guā Kiânn-tshinn

Lán tsit-má tsai-iánn Thài-iông-hē ì-guā í-king ū tshiau-kuè 4000 lia̍p kiânn-tshinn. Tsit-khuánn kiânn-tshinn to̍h kiò-tsò hē-guā kiânn-tshinn. NASA hē-guā kiânn-tshinn tsu-liāu-khòo kì-lio̍k tio̍h--ê hē-guā kiânn-tshinn sòo-liōng, tī tíng kò-gue̍h tsiah tú ta̍t-sîng tsit-ê lí-tîng-pi. Tsit-ki iánn-phìnn kā 1992 nî it-ti̍t kàu 2019 nî khak-tīng ū tshuē-tio̍h ê hē-guā kiânn-tshinn, àn-tsiàu sî-kan sūn-sī, iōng siann-im kah si̍k-tshái kā piau--tshut-lâi. Tsit kui-tiunn iā-khong-tôo, thâu-tsi̍t-ê tsù-ì tio̍h ê pōo-hūn, sī khì hōo tsinn tsò tuā U ê Gîn-hô-hē tiong-ng-tuà. Hún-âng-á-sik--ê, sī in-uī bú-hîng-tshinn ê kìng-hiòng sok-tōo sán-sing piàn-huà, tsō-sîng i ê si̍k-kng sán-sing sió-khuá-á piàn-huà, tsiah tshuē--tio̍h ê hē-guā kiânn-tshinn. Kiô-á-sik--ê, sī bú-hîng-tshinn ê huī-tōo tī lîng-tshinn kuè-tîng tiong, sió-khuá-á piàn àm, tsiah tshuē--tio̍h ê hē-guā kiânn-tshinn. Kam-á-sik--ê, sī ti̍t-tsiap hián-siōng ê hē-guā kiânn-tshinn. Tshinn-sik--ê, sī bî-tiōng-li̍k thàu-kiànn-hāu-ìng kā puē-kíng tshinn ê kng hòng-tuā, tsiah tshuē--tio̍h ê hē-guā kiânn-tshinn. Kiânn-tshinn nā-sī se̍h ka-tī ê bú-hîng-tshinn khah kín, to̍h ē tuânn khah kuân ê siann-tiāu. Í-king thè-hiu ê Kepler se̍h-tē-uī-tshinn, sī thâu-tsi̍t-ê tshuē hē-guā kiânn-tshinn ê Thài-khong-bōng-uán-kiànn. I kan-na tiàm thinn-tíng bóo tsi̍t-khu tshuē. Tse 4000 lia̍p hē-guā kiânn-tshinn, ū tsi̍t-puànn lóng-sī i tshuē--tio̍h-ê。 M̄-koh iáu-leh ūn-tsok ê TESS jīm-bū tshuē-tio̍h koh khah tsuē, kui-ê thian-khu lóng tshuē-ē-tio̍h se̍h tshù-pinn siōng kng hit-lia̍p hîng-tshinn leh kiânn ê kiânn-tshinn. Tshuē hē-guā kiânn-tshinn, m̄-nā ē-tàng pang-tsān jîn-luī koh-khah liáu-kái ú-tiū kî-tha sóo-tsāi, sī-m̄-sī ū-khó-lîng ū sìnn-miā, mā ē-tàngpang-tsān lán liáu-kái Tē-kiû kah Thài-iông-hē, sī án-ná hîng-sîng--ê.

[English] 4000 Exoplanets

Over 4000 planets are now known to exist outside our Solar System. Known as exoplanets, this milestone was passed last month, as recorded by NASA's Exoplanet Archive. The featured video highlights these exoplanets in sound and light, starting chronologically from the first confirmed detection in 1992 and continuing into 2019. The entire night sky is first shown compressed with the central band of our Milky Way Galaxy making a giant U. Exoplanets detected by slight jiggles in their parents-star's colors (radial velocity) appear in pink, while those detected by slight dips in their parent star's brightness transit are shown in purple. Further, those exoplanets imaged directly appear in orange, while those detected by gravitationally magnifying the light of a background star microlensing are shown in green. The faster a planet orbits its parent star, the higher the accompanying tone played. The retired Kepler satellite has discovered about half of these first 4000 exoplanets in just one region of the sky, while the TESS mission is on track to find even more, all over the sky, orbiting the brightest nearby stars. Finding exoplanets not only helps humanity to better understand the potential prevalence of life elsewhere in the universe, but also how our Earth and Solar System were formed.

詞彙學習