土衛一 Mimas ê Herschel 隕石坑

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Herschel Crater on Mimas
• 影像來源：Cassini Imaging Team, ISS, JPL, ESA, NASA
• 台文翻譯：An-Li Tsai (NCU)

[漢羅] 土衛一 Mimas ê Herschel 隕石坑

土衛一 Mimas 是土星 ê 細粒衛星，伊 ê 直徑才 400 公里闊，毋閣伊有一个直徑 130 公里大 ê Herschel 隕石坑，是規个太陽系內底上大 ê 隕石坑。 Cassini 機器人太空船 tī 2010 年踅土星咧行。 伊飛過這粒小型 冰世界 1 萬公里近 ê 時陣，有紀錄著 這个不得了 ê 景色：遮爾細粒 ê 衛星，有遮爾大 ê 隕石坑。 這个影像資料利用假色加強對比，而且較倚咱這爿、去予舂甲較深 ê 地形，有用小可仔無仝色做記號。 按呢會當予 Herschel 隕石坑，展示閣較清楚 ê 地景。 無仝色應該是地表 ê 組成成份無仝，這可能是因為 土衛一 Mimas 以前 捌去予舂甲糜糜卯卯。 是講 土衛一 Mimas 若是拄著 比挵出這个直徑 130 公里大 閣較大 ê 衝擊事件，可能會予這粒 土星 ê 細粒衛星，規粒 毀滅去。

[POJ] Thó͘-ūi-i̍t Mimas ê Herschel Ún-se̍k-kheⁿ

Thó͘-ūi-i̍t Mimas sī Thó͘-chhiⁿ ê sè-lia̍p ūi-chhiⁿ, i ê ti̍t-kèng chiah 400 kong-lí khoah, m̄-koh i ū chi̍t-ê ti̍t-kèng 130 kong-lí tōa ê Herschel ún-se̍k-kheⁿ, sī kui ê Thài-iông-hē lāi-té siōng tōa ê ún-se̍k-kheⁿ. Cassini Ke-khì-lâng Thài-khong-chûn tī 2010 nî se̍h Thó͘-chhiⁿ leh kiâⁿ. I poe kòe chit-lia̍p sió-hêng peng sè-kài 1 bān kong-lí kīn ê sî-chūn, ū kì-lio̍k tio̍h chit-ê put-tit-liáu ê kéng-sek: Chiah-nī sè-lia̍p ê ūi-chhiⁿ, ū chiah-nī tōa ê ún-se̍k-kheⁿ. Chit-ê iáⁿ-siōng chu-liāu lī-iōng ká-sek ka-kiông tùi-pí, jî-chhiáⁿ khah óa lán chit-pêng, khì hō͘ cheng kah khah chhim ê tē-hêng, ū iōng sió-khóa-á bô kāng sek chò kí-hô. Án-ni ē-tàng hō͘ Herschel ún-se̍k-kheⁿ, tiān-sī koh khah chheng-chhó͘ ê tē-kéng. Bô kāng sek èng-kai sī tē-piáu ê cho͘-sêng sêng-hūn bô kāng, che khó-lêng sī in-ūi Thó͘-ūi-i̍t Mimas í-chêng bat khì hō͘ cheng kah mi-mi-mauh-mauh. Sī kóng, Thó͘-ūi-i̍t Mimas nā-sī tú-tio̍h pí lòng chhut chit-ê ti̍t-kèng 130 kong-lí tōa koh khah tōa ê chhiong-kek sū-kiāⁿ, khó-lêng ē hō͘ chit-lia̍p Thó͘-chhiⁿ ê sè-lia̍p ūi-chhiⁿ, kui-lia̍p húi-bia̍t khì.

[KIP] Thóo-uī-i̍t Mimas ê Herschel Ún-si̍k-khenn

Thóo-uī-i̍t Mimas sī Thóo-tshinn ê sè-lia̍p uī-tshinn, i ê ti̍t-kìng tsiah 400 kong-lí khuah, m̄-koh i ū tsi̍t-ê ti̍t-kìng 130 kong-lí tuā ê Herschel ún-si̍k-khenn, sī kui ê Thài-iông-hē lāi-té siōng tuā ê ún-si̍k-khenn. Cassini Ke-khì-lâng Thài-khong-tsûn tī 2010 nî se̍h Thóo-tshinn leh kiânn. I pue kuè tsit-lia̍p sió-hîng ping sè-kài 1 bān kong-lí kīn ê sî-tsūn, ū kì-lio̍k tio̍h tsit-ê put-tit-liáu ê kíng-sik: Tsiah-nī sè-lia̍p ê uī-tshinn, ū tsiah-nī tuā ê ún-si̍k-khenn. Tsit-ê iánn-siōng tsu-liāu lī-iōng ká-sik ka-kiông tuì-pí, jî-tshiánn khah uá lán tsit-pîng, khì hōo tsing kah khah tshim ê tē-hîng, ū iōng sió-khuá-á bô kāng sik tsò kí-hô. Án-ni ē-tàng hōo Herschel ún-si̍k-khenn, tiān-sī koh khah tshing-tshóo ê tē-kíng. Bô kāng sik ìng-kai sī tē-piáu ê tsoo-sîng sîng-hūn bô kāng, tse khó-lîng sī in-uī Thóo-uī-i̍t Mimas í-tsîng bat khì hōo tsing kah mi-mi-mauh-mauh. Sī kóng, Thóo-uī-i̍t Mimas nā-sī tú-tio̍h pí lòng tshut tsit-ê ti̍t-kìng 130 kong-lí tuā koh khah tuā ê tshiong-kik sū-kiānn, khó-lîng ē hōo tsit-lia̍p Thóo-tshinn ê sè-lia̍p uī-tshinn, kui-lia̍p huí-bia̍t khì.

[English] Herschel Crater on Mimas

Mimas, small 400 kilometer-diameter moon of Saturn, is host to 130 kilometer-diameter Herschel crater, one of the larger impact craters in the entire Solar System. The robotic Cassini spacecraft orbiting Saturn in 2010 recorded this startling view of small moon and big crater while making a 10,000-kilometer record close pass by the diminutive icy world. Shown in contrast-enhanced false color, the image data reveal more clearly that Herschel’s landscape is colored slightly differently from heavily cratered terrain nearby. The color difference could yield surface composition clues to the violent history of Mimas. Of course, an impact on Mimas any larger than the one that created the 130-kilometer Herschel might have destroyed the small moon of Saturn.

詞彙學習（漢羅/POJ/KIP/華語/English）

• 【土衛一 Mimas】Thó͘-ūi-i̍t Mimas/Thóo-uī-i̍t Mimas/土衛一彌瑪斯/Mimas
• 【Herschel 隕石坑】Herschel ún-se̍k-kheⁿ/Herschel ún-si̍k-khenn/赫歇爾隕石坑/Herschel crater
• 【直徑】ti̍t-kèng/ti̍t-kìng/直徑/diameter
• 【土星】Thó͘-chhiⁿ/Thóo-tshinn/土星/Saturn
• 【衛星】ūi-chhiⁿ/uī-tshinn/衛星/moon
• 【Cassini 太空船】Cassini Thài-khong-chûn/Cassini Thài-khong-tsûn/Cassini 太空船/Cassini spacecraft
• 【假色】ká-sek/ká-sik/假色/false color