火衛一 Phobos ê 3D 影像

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Stereo Phobos
• 影像來源：G. Neukum (FU Berlin) et al., [Mars Express](http://www.esa.int/export/SPECIALS/Mars_Express/ SEMVQ95V9ED_0.html), DLR, ESA
• 台文翻譯：An-Li Tsai (NCU)

[漢羅] 火衛一 Phobos ê 3D 影像

Kā 你 ê 3D 目鏡提來，囥佇這粒 貓-chiù-chiù ê 火星衛星，火衛一 Phobos，ê 相片頂懸。 這張相片是用 ESA 火星快車號太空船 頂懸 ê 高解析度立體 kha-mé-lah tī 2004 年翕--ê。 是 ùi 火星衛星表面 200 公里懸 ê 所在翕--ê。 這張迷人 ê 立體浮雕景色，是 火衛一 Phobos 面對火星彼爿。 這粒衛星看起來就親像是小行星，相片有 kā 伊去予挵甲糜糜卯卯 ê 表面翕出來。 這寡 神祕 ê 窟仔 有幾若百公尺闊，可能 kah 倒爿彼个大隕石坑，Stickney 隕石坑，去 hŏng 挵出來有關。 Stickney 隕石坑差不多有 10 公里闊，是講 火衛一 Phobos 上闊 ê 部份嘛才 27 公里爾爾。

[POJ] Hóe-ūi-it Phobos ê 3D iáⁿ-siōng

Kā lí ê 3D ba̍k-kiàⁿ the̍h-lâi, khǹg tī chit-lia̍p niau-chiù-chiù ê Hóe-chhiⁿ ūi-chhiⁿ, Hóe-ūi-it Phobos, ê siòng-phìⁿ téng-koân. Chit-tiuⁿ siòng-phìⁿ sī iōng ESA Hóe-chhiⁿ Khoài-chhia-hō thài-khong-chûn téng-koân ê ko kái-sek-tō͘ li̍p-thé kha-mé-lah tī 2004 nî hip--ê. Sī ùi Hóe-chhiⁿ ūi-chhiⁿ piáu-bīn 200 kong-lí koân ê só͘-chāi hip--ê. Chit-tiuⁿ bê-lâng ê li̍p-thé phû-tiau kéng-sek, sī Hóe-ūi-it Phobos bīn-tùi Hóe-chhiⁿ hit-pêng. Chit-lia̍p ūi-chhiⁿ khòaⁿ--khí-lâi to̍h chhiⁿ-chhiūⁿ sī sió-kiâⁿ-chhiⁿ, siòng-phìⁿ ū kā i khì hō͘ lòng kah mi-mi-mauh-mauh ê piáu-bīn hip--chhut-lâi. Chit-kóa sîn-pì ê khut-á ū kúi-ā-pah kong-chhioh khoah, khó-lêng kah tò-pêng hit-ê tōa ún-se̍k-kheⁿ, Stickney ún-se̍k-kheⁿ, khì hŏng lòng--chhut-lâi ū-koan. Stickney ún-se̍k-kheⁿ chha-put-to ū 10 kong-lí khoah, sī-kóng Hóe-ūi-it Phobos siōng khoah ê pō͘-hūn mā chiah 27 kong-lí niā-niā.

[KIP] Hué-uī-it Phobos ê 3D iánn-siōng

Kā lí ê 3D ba̍k-kiànn the̍h-lâi, khǹg tī tsit-lia̍p niau-tsiù-tsiù ê Hué-tshinn uī-tshinn, Hué-uī-it Phobos, ê siòng-phìnn tíng-kuân. Tsit-tiunn siòng-phìnn sī iōng ESA Hué-tshinn Khuài-tshia-hō thài-khong-tsûn tíng-kuân ê ko kái-sik-tōo li̍p-thé kha-mé-lah tī 2004 nî hip--ê. Sī uì Hué-tshinn uī-tshinn piáu-bīn 200 kong-lí kuân ê sóo-tsāi hip--ê. Tsit-tiunn bê-lâng ê li̍p-thé phû-tiau kíng-sik, sī Hué-uī-it Phobos bīn-tuì Hué-tshinn hit-pîng. Tsit-lia̍p uī-tshinn khuànn--khí-lâi to̍h tshinn-tshiūnn sī sió-kiânn-tshinn, siòng-phìnn ū kā i khì hōo lòng kah mi-mi-mauh-mauh ê piáu-bīn hip--tshut-lâi. Tsit-kuá sîn-pì ê khut-á ū kuí-ā-pah kong-tshioh khuah, khó-lîng kah tò-pîng hit-ê tuā ún-si̍k-khenn, Stickney ún-si̍k-khenn, khì hŏng lòng--tshut-lâi ū-kuan. Stickney ún-si̍k-khenn tsha-put-to ū 10 kong-lí khuah, sī-kóng Hué-uī-it Phobos siōng khuah ê pōo-hūn mā tsiah 27 kong-lí niā-niā.

[English] Stereo Phobos

Get out your red/blue glasses and float next to Phobos, grooved moon of Mars! Captured in 2004 by the High Resolution Stereo Camera on board ESA's Mars Express spacecraft, the image data was recorded at a distance of about 200 kilometers from the martian moon. This tantalizing stereo anaglyph view shows the Mars-facing side of Phobos. It highlights the asteroid-like moon's cratered and grooved surface. Up to hundreds of meters wide, the mysterious grooves may be related to the impact that created Stickney crater, the large crater at the left. Stickney crater is about 10 kilometers across, while Phobos itself is only around 27 kilometers across at its widest point.

詞彙學習