捲螺仔星系 M74：較清楚 ê 版本

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Spiral Galaxy M74: A Sharper View
• 影像來源：NASA, ESA, CSA, STScI; 資料處理 kah 版權: Robert Eder
• 台文翻譯：An-Li Tsai (NCU)

[漢羅] 捲螺仔星系 M74：較清楚 ê 版本

美麗 ê 捲螺仔星系 Messir 74 (嘛叫做 NGC 628) 就 chhāi tī 雙魚座 ê 方向，離咱有 3200 萬光年遠。 M74 有兩支足大支 ê 捲螺仔手骨，這个島宇宙差不多有 1000 億粒恆星 tī 內底。 長期以來，攏因為伊 ê 宏偉結構，煞去予天文學家 kā 伊當做是捲螺仔星系 ê 模範。 這張是最近 ùi James Webb 太空望遠鏡 ê 公開觀測資料 處理 ê 影像，M74 ê 中央區清楚甲予人掣一趒。 這張彩色 ê 合成影像是 ùi Webb 太空望遠鏡 ê 兩个儀器 NIRcam kah MIRI 來–ê。 In 是 近紅外線 kah 中紅外線波段 ê kha-mé-lah。 Tī 這个有宏偉結構 ê 捲螺仔星系影像內底，看會著較冷 ê 恆星 kah 塗粉結構，這攏是以前 ê 太空望遠鏡 看袂著–ê。

[POJ] Kńg-lê-á seng-hē M74: Khah chheng-chhó͘ ê pán-pún

Bí-lē ê kńg-lê-á seng-hē Messir 74 (mā kiò-chò NGC 628) to̍h chhāi tī Siang-hî-chō ê hong-hiòng, lî lán ū 3200 bān kng-nî hn̄g. M74 ū nn̄g ki chiok tōa-ki ê kńg-lê-á chhiú-kut, chit-ê tó-ú-tiū chha-put-to ū 1000 ek lia̍p hêng-chhiⁿ tī lāi-té. Tn̂g-kî í-lâi, lóng in-ūi i ê hông-úi kiat-kò͘, soah khì hō͘ thian-bûn ha̍k-ka kā i tòng-chòe sī kńg-lê-á seng-hē ê bô͘-hoān. Chit-tiuⁿ sī chòe-kīn ùi James Webb thài-khong bōng-oán-kiàⁿ ê kong-khai koan-chhek chu-liāu chhú-lí ê iáⁿ-siōng, M74 ê tiong-ng khu chheng-chhó͘ kah hō͘ lâng chhoah-chi̍t-tiô. Chit-tiuⁿ chhái-sek ê ha̍p-sêng iáⁿ-siōng sī ùi Webb Thài-khong-bōng-oán-kiàⁿ ê nn̄g-ê gî-khì NIRcam kah MIRI lâi–ê. In sī kīn-âng-gōa-sòaⁿ kah tiong-âng-gōa-sòaⁿ pho-tōaⁿ ê kha-mé-lah. Tī chit-ê ū hông-úi kiat-kò͘ ê kńg-lê-á seng-hē iáⁿ-siōng lāi-té, khòaⁿ-ē-tio̍h khah léng ê hêng-chhiⁿ kah thô͘-hún kiat-kò͘, che lóng sī í-chêng ê thài-khong-bōng-oán-kiàⁿ khòaⁿ bōe-tio̍h–ê.

[KIP] Kńg-lê-á sing-hē M̄4: Khah tshing-tshóo ê pán-pún

Bí-lē ê kńg-lê-á sing-hē Messir 74 (mā kiò-tsò NGC 628) to̍h tshāi tī Siang-hî-tsō ê hong-hiòng, lî lán ū 3200 bān kng-nî hn̄g. M̄4 ū nn̄g ki tsiok tuā-ki ê kńg-lê-á tshiú-kut, tsit-ê tó-ú-tiū tsha-put-to ū 1000 ik lia̍p hîng-tshinn tī lāi-té. Tn̂g-kî í-lâi, lóng in-uī i ê hông-uí kiat-kòo, suah khì hōo thian-bûn ha̍k-ka kā i tòng-tsuè sī kńg-lê-á sing-hē ê bôo-huān. Tsit-tiunn sī tsuè-kīn uì James Webb thài-khong bōng-uán-kiànn ê kong-khai kuan-tshik tsu-liāu tshú-lí ê iánn-siōng, M̄4 ê tiong-ng khu tshing-tshóo kah hōo lâng tshuah-tsi̍t-tiô. Tsit-tiunn tshái-sik ê ha̍p-sîng iánn-siōng sī uì Webb Thài-khong-bōng-uán-kiànn ê nn̄g-ê gî-khì NIRcam kah MIRI lâi–ê. In sī kīn-âng-guā-suànn kah tiong-âng-guā-suànn pho-tuānn ê kha-mé-lah. Tī tsit-ê ū hông-uí kiat-kòo ê kńg-lê-á sing-hē iánn-siōng lāi-té, khuànn-ē-tio̍h khah líng ê hîng-tshinn kah thôo-hún kiat-kòo, tse lóng sī í-tsîng ê thài-khong-bōng-uán-kiànn khuànn buē-tio̍h–ê.

[English] Spiral Galaxy M74: A Sharper View

Beautiful spiral galaxy Messier 74 (also known as NGC 628) lies some 32 million light-years away toward the constellation Pisces. An island universe of about 100 billion stars with two prominent spiral arms, M74 has long been admired by astronomers as a perfect example of a grand-design spiral galaxy. M74’s central region is brought into a stunning, sharp focus in this recently processed image using publicly available data from the James Webb Space Telescope. The colorized combination of image data sets is from two of Webb’s instruments NIRcam and MIRI, operating at near- and mid-infrared wavelengths. It reveals cooler stars and dusty structures in the grand-design spiral galaxy only hinted at in previous space-based views.

詞彙學習（漢羅/POJ/KIP/華語/English）

• 【捲螺仔星系】kńg-lê-á seng-hē/kńg-lê-á sing-hē/螺旋星系/spiral galaxy
• 【捲螺仔手骨】kńg-lê-á chhiú-kut/kńg-lê-á tshiú-kut/螺旋手臂、旋臂/spiral arm
• 【M74】M chhit-cha̍p-sì/M tshit-tsa̍p-sì/M74/M74
• 【NGC 628】NGC lio̍k-jī-pat/NGC lio̍k-jī-pat/NGC 628/NGC 628
• 【雙魚座】Siang-hî-chō/Siang-hî-tsō/雙魚座/Pisces
• 【近紅外線】kīn-âng-gōa-sòaⁿ/kīn-âng-guā-suànn/近紅外線/near-infrared
• 【中紅外線】tiong-âng-gōa-sòaⁿ/tiong-âng-guā-suànn/中紅外線/mid-infrared
• 【James Webb 太空望遠鏡】James Webb Thài-khong-bōng-oán-kiàⁿ/James Webb Thài-khong-bōng-uán-kiànn/詹姆斯韋伯太空望遠鏡/James Webb Space Telescope