半爿圓厝頂岩石 kah 天頂 ê 昴宿星團

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Pleiades over Half Dome
• 影像來源 kah 版權：Dheera Venkatraman
• 台文翻譯：An-Li Tsai (NCU)

[漢羅] 半爿圓厝頂岩石 kah 天頂 ê 昴宿星團

恆星是做伙生出來--ê。 天頂 上有名 ê 一陣星叫做 昴宿星團，伊是一个 足光 ê 星團，咱用 目睭直接 就看會著。 昴宿星團離咱有 450 光年 遠，是 1 億年前形成--ê，而且會閣活 2.5 億歲。 咱 ê 太陽 應該嘛是 ùi 星團 內底生出來--ê。 毋閣伊已經 45 億歲矣，伊 誕生彼陣 ê 星伴，早就已經無去矣。 相片內底 ê 昴宿星團 就 tī 天頂。 前景是 tī 美國 加州 Yosemite 國家公園 內底，一粒足有名 ê 岩石，叫做 半爿圓厝頂。 這張相片 是 kā 28 張翕著 ê 前景，kah 174 張翕著 ê 天星背景疊做一張。 In 攏是 tī 2019 年 10 月 ê 仝一暝，踮仝一个所在，用仝一台 kha-mé-lah 翕--ê。 天文攝影師 事先有算好，愛開偌久時間 來翕 昴宿星團 kah 半爿圓厝頂岩石。 毋閣伊意外拄著這區咧 失電，結果 背景 ê 夜空 煞規个變甲異常烏暗。

[POJ] Pòaⁿ-pêng Îⁿ-chhù-téng giâm-chio̍h kah thiⁿ-téng ê Báu-siù-seng-thoân

Hêng-chhiⁿ sī chò-hóe seⁿ--chhut-lâi--ê. Thiⁿ-téng siōng ū-miâ ê chi̍t-tīn chhiⁿ kiò-chò Báu-siù-seng-thoân, i sī chi̍t-ê chiok kng ê seng-thoân, lán iōng ba̍k-chiu ti̍t-chiap to̍h khòaⁿ-ē-tio̍h. Báu-siù-seng-thoân lī lán 450 kng-nî hn̄g, sī 1 ek nî-chêng hêng-sêng--ê, jî-chhiáⁿ ē koh oa̍h 2.5 ek hòe. Lán ê Thài-iông èng-kai mā sī ùi seng-thoân lāi-té seⁿ--chhut-lâi--ê. M̄-koh i í-keng 45 hòe ah, i tàn-seng hit-chūn ê seng-phōaⁿ, chá to̍h í-keng bô--khì ah. Siòng-phìⁿ lāi-té ê Báu-siù-seng-thoân to̍h tī thiⁿ-téng. Chiân-kéng sī tī Bí-kok Ka-chiu Yosemite Kok-ka kong-hn̂g lāi-té, chi̍t-lia̍p chiok ū-miâ ê giâm-chio̍h, kiò-chò Pòaⁿ-pêng Îⁿ-chhù-téng. Chit-tiuⁿ siòng-phìⁿ sī kā 28 tiuⁿ hip-tio̍h ê chiân-kéng, kah 174 tiuⁿ hip-tio̍h ê thiⁿ-chhiⁿ pōe-kéng tha̍h chò chi̍t-tiuⁿ. In lóng-sī tī 2019 nî 10 goe̍h ê kâng chi̍t mê, tiàm kâng chi̍t-ê só͘-chāi, iōng kâng chi̍t-tâi kha-mé-lah hip--ê. Thian-bûn liap-iáⁿ-su sū-sian ū sǹg hó, ài khai gōa-kú sî-kan lâi hip Báu-siù-seng-thoân kah Pòaⁿ-pêng Îⁿ-chhù-téng giâm-chio̍h. M̄-koh i ì-gōa tú-tio̍h chit-khu leh sit-tiān, kiat-kó pōe-kéng ê iā-khong soah kui-ê piàn kah ī-siông o͘-àm.

[KIP] Puànn-pîng ÎNN-tshù-tíng giâm-tsio̍h kah thinn-tíng ê Báu-siù-sing-thuân

Hîng-tshinn sī tsò-hué senn--tshut-lâi--ê. Thinn-tíng siōng ū-miâ ê tsi̍t-tīn tshinn kiò-tsò Báu-siù-sing-thuân, i sī tsi̍t-ê tsiok kng ê sing-thuân, lán iōng ba̍k-tsiu ti̍t-tsiap to̍h khuànn-ē-tio̍h. Báu-siù-sing-thuân lī lán 450 kng-nî hn̄g, sī 1 ik nî-tsîng hîng-sîng--ê, jî-tshiánn ē koh ua̍h 2.5 ik huè. Lán ê Thài-iông ìng-kai mā sī uì sing-thuân lāi-té senn--tshut-lâi--ê. M̄-koh i í-king 45 huè ah, i tàn-sing hit-tsūn ê sing-phuānn, tsá to̍h í-king bô--khì ah. Siòng-phìnn lāi-té ê Báu-siù-sing-thuân to̍h tī thinn-tíng. Tsiân-kíng sī tī Bí-kok Ka-tsiu Yosemite Kok-ka kong-hn̂g lāi-té, tsi̍t-lia̍p tsiok ū-miâ ê giâm-tsio̍h, kiò-tsò Puànn-pîng ÎNN-tshù-tíng. Tsit-tiunn siòng-phìnn sī kā 28 tiunn hip-tio̍h ê tsiân-kíng, kah 174 tiunn hip-tio̍h ê thinn-tshinn puē-kíng tha̍h tsò tsi̍t-tiunn. In lóng-sī tī 2019 nî 10 gue̍h ê kâng tsi̍t mê, tiàm kâng tsi̍t-ê sóo-tsāi, iōng kâng tsi̍t-tâi kha-mé-lah hip--ê. Thian-bûn liap-iánn-su sū-sian ū sǹg hó, ài khai guā-kú sî-kan lâi hip Báu-siù-sing-thuân kah Puànn-pîng ÎNN-tshù-tíng giâm-tsio̍h. M̄-koh i ì-guā tú-tio̍h tsit-khu leh sit-tiān, kiat-kó puē-kíng ê iā-khong suah kui-ê piàn kah ī-siông oo-àm.

[English] Pleiades over Half Dome

Stars come in bunches. The most famous bunch of stars on the sky is the Pleiades, a bright cluster that can be easily seen with the unaided eye. The Pleiades lies only about 450 light years away, formed about 100 million years ago, and will likely last about another 250 million years. Our Sun was likely born in a star cluster, but now, being about 4.5 billion years old, its stellar birth companions have long since dispersed. The Pleiades star cluster is pictured over Half Dome, a famous rock structure in Yosemite National Park in California, USA. The featured image is a composite of 28 foreground exposures and 174 images of the stellar background, all taken from the same location and by the same camera on the same night in October 2019. After calculating the timing of a future juxtaposition of the Pleiades and Half Dome, the astrophotrographer was unexpectedly rewarded by an electrical blackout, making the background sky unusually dark.

詞彙學習