貓眼星雲 ê 中心

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：In the Center of the Cat's Eye Nebula
• 影像來源：NASA, ESA, Hubble, HLA; 資料重新處理 kah 版權：Raul Villaverde
• 台文翻譯：An-Li Tsai (NCU)

[漢羅] 貓眼星雲 ê 中心

Tī 3000 光年遠 ê 所在，有一粒欲死--去 ê 恆星 kā 伊 ê 發光氣體殼擲出去。 這張相片 是 Hubble 太空望遠鏡 翕 ê 貓眼星雲 (NGC 6543)，是目前咱知影 ê 行星形星雲 內底 上複雜--ê。 這張 貓眼星雲 相片實在是有夠複雜--ê，伊有半 光年 闊。 天文學家懷疑講，tī 伊 中心 ê 天體，可能是一組 雙星系統。 這款形體 ê 天體攏叫做「行星形星雲」，毋閣會按呢號名，其實是一个 誤會。 雖然講這款天體 tī 細台天文望遠鏡內底看起來是圓--ê，kah 行星欲仝欲仝。 毋閣咱若是用懸解析度 ê 大型天文望遠鏡 kā 看，就會看著恆星外圍有一个 恆星繭，這是 恆星演化 到上尾坎站 ê 時陣，去予歕出去 ê 氣體殼。 天文學家若是 tùi 貓眼星雲硞硞 kā 看，毋若會看著閣較清楚 ê 結構，嘛會看著太陽閣 50 億年，仝款會演化到 行星形星雲 ê 階段。

[POJ] Niau-gán-seng-hûn ê Tiong-sim

Tī 3000 kng-nî hn̄g ê só͘-chāi, ū chi̍t-lia̍p beh sí--khì ê hêng-chhiⁿ kā i ê hoat-kng khì-thé-khak tàn--chhut-khì. Chit-tiuⁿ siòng-phìⁿ sī Hubble Thài-khong-bōng-oán-kiàⁿ hip ê Niau-gán-seng-hûn (NGC 6543), sī bo̍k-chêng lán chai-iáⁿ ê kiâⁿ-chhiⁿ-hêng-seng-hûn lāi-té siōng ho̍k-cha̍p--ê. Chit-tiuⁿ Niau-gán-seng-hûn siòng-phìⁿ si̍t-chāi sī ū-kàu ho̍k-cha̍p--ê, i ū pòaⁿ kng-nî khoah. Thian-bûn ha̍k-ka hoâi-gî kóng, tī i tiong-sim ê thian-thé, khó-lêng sī chi̍t-cho͘ siang-chhiⁿ-hē-thóng. Chit-khoán hêng-thé ê thian-thé lóng kiò-chò "kiâⁿ-chhiⁿ-hêng-seng-hûn", m̄-koh ē án-ne hō-miâ, kî-si̍t sī chi̍t-ê gō͘-hōe. Sui-jiân kóng chit-khoán thian-thé tī sè-tâi thian-bûn bōng-oán-kiàⁿ lāi-té khòaⁿ--khí-lâi sī îⁿ--ê, kah kiâⁿ-chhiⁿ beh-kâng beh-kâng. M̄-koh lán nā-sī iōng koân kái-sek-tō͘ ê tōa-hêng thian-bûn bōng-oán-kiàⁿ kā khòaⁿ, to̍h ē khòaⁿ-tio̍h hêng-chhiⁿ gōa-ûi ū chi̍t-ê hêng-chhiⁿ-kián, che sī hêng-chhiⁿ ián-hòa kàu siōng-bóe khám-chām ê sî-chūn, khì hō͘ pûn--chhut-khì ê khì-thé-khak. Thian-bûn ha̍k-ka nā-sī tùi Niau-gán-seng-hûn kho̍k-kho̍k kā khòaⁿ, m̄-nā ē khòaⁿ-tio̍h koh-khah chheng-chhó͘ ê kiat-kò͘, mā ē khòaⁿ-tio̍h Thài-iông koh 50 ek nî, kāng-khoán ē ián-hòa kàu kiâⁿ-chhiⁿ-hêng-seng-hûn ê kai-tōaⁿ.

[KIP] Niau-gán-sing-hûn ê Tiong-sim

Tī 3000 kng-nî hn̄g ê sóo-tsāi, ū tsi̍t-lia̍p beh sí--khì ê hîng-tshinn kā i ê huat-kng khì-thé-khak tàn--tshut-khì. Tsit-tiunn siòng-phìnn sī Hubble Thài-khong-bōng-uán-kiànn hip ê Niau-gán-sing-hûn (NGC 6543), sī bo̍k-tsîng lán tsai-iánn ê kiânn-tshinn-hîng-sing-hûn lāi-té siōng ho̍k-tsa̍p--ê. Tsit-tiunn Niau-gán-sing-hûn siòng-phìnn si̍t-tsāi sī ū-kàu ho̍k-tsa̍p--ê, i ū puànn kng-nî khuah. Thian-bûn ha̍k-ka huâi-gî kóng, tī i tiong-sim ê thian-thé, khó-lîng sī tsi̍t-tsoo siang-tshinn-hē-thóng. Tsit-khuán hîng-thé ê thian-thé lóng kiò-tsò "kiânn-tshinn-hîng-sing-hûn", m̄-koh ē án-ne hō-miâ, kî-si̍t sī tsi̍t-ê gōo-huē. Sui-jiân kóng tsit-khuán thian-thé tī sè-tâi thian-bûn bōng-uán-kiànn lāi-té khuànn--khí-lâi sī înn--ê, kah kiânn-tshinn beh-kâng beh-kâng. M̄-koh lán nā-sī iōng kuân kái-sik-tōo ê tuā-hîng thian-bûn bōng-uán-kiànn kā khuànn, to̍h ē khuànn-tio̍h hîng-tshinn guā-uî ū tsi̍t-ê hîng-tshinn-kián, tse sī hîng-tshinn ián-huà kàu siōng-bué khám-tsām ê sî-tsūn, khì hōo pûn--tshut-khì ê khì-thé-khak. Thian-bûn ha̍k-ka nā-sī tuì Niau-gán-sing-hûn kho̍k-kho̍k kā khuànn, m̄-nā ē khuànn-tio̍h koh-khah tshing-tshóo ê kiat-kòo, mā ē khuànn-tio̍h Thài-iông koh 50 ik nî, kāng-khuán ē ián-huà kàu kiânn-tshinn-hîng-sing-hûn ê kai-tuānn.

[English] In the Center of the Cat's Eye Nebula

Three thousand light-years away, a dying star throws off shells of glowing gas. This image from the Hubble Space Telescope reveals the Cat's Eye Nebula (NGC 6543), to be one of the most complex planetary nebulae known. Spanning half a light-year, the features seen in the Cat's Eye are so complex that astronomers suspect the bright central object may actually be a binary star system. The term planetary nebula, used to describe this general class of objects, is misleading. Although these objects may appear round and planet-like in small telescopes, high resolution images with large telescopes reveal them to be stars surrounded by cocoons of gas blown off in the late stages of stellar evolution. Gazing into this Cat's Eye, astronomers may well be seeing more than detailed structure, they may be seeing the fate of our Sun, destined to enter its own planetary nebula phase of evolution ... in about 5 billion years.

詞彙學習