NGC 6914 星雲複合體

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The NGC 6914 Complex
• 影像來源 kah 版權：Giorgio Ferrari
• 台文翻譯：An-Li Tsai (NCU)

[漢羅] NGC 6914 星雲複合體

這張 tī NGC 6914 附近 ê 彩色天景，是欲用來研究內底 ê 恆星、塗粉、kah 發光氣體。 這个 星際星雲複合體 離咱有 6000 光年遠，伊就 tī 北天星座 天鵝座 咧飛，嘛是 tī 銀河盤 ê 面頂。 這規張宇宙畫布攏是紅色 ê 水素 發射星雲 kah 厚塗粉 ê 藍色 反射星雲。 烏色剪影 ê 部份，就是閘光 ê 星際塗粉。 Tī 天鵝座 OB2 星協內底 ê 大質量、高溫、少年恆星發出 ê 紫外光輻射，kā 星協內底 ê 原子 水素氣體 離子化去，產生質子 kah 電子 複合 ê 特徵紅光。 Tī 天鵝座 OB2 內底 ê 恆星嘛因為反射塗粉雲，產生足強 ê 藍色恆星光。 這个超過 1 度闊 ê 望遠鏡視野，按照 NGC 6914 ê 距離來推算，差不多是 100 光年遐爾闊。

[POJ] NGC 6914 Seng-hûn Ho̍k-ha̍p-thé

Chit tiuⁿ tī NGC 6914 hū-kīn ê chhái-sek thian-kéng, sī beh iōng lâi gián-kiù lāi-té ê hêng-chhiⁿ, thô͘-hún, kah hoat-kng khì-thé. Chit ê seng-chè seng-hûn ho̍k-ha̍p-thé lī lán ū 6000 kng-nî hn̄g, i to̍h tī pak-thian seng-chō Thian-gô-chō leh poe, mā sī tī Gîn-hô-pôaⁿ ê bīn-téng. Che kui-tiuⁿ ú-tiū ōe-pò͘ lóng-sī âng-sek ê chúi-sò͘ hoat-siā-seng-hûn kah kāu thô͘-hún ê nâ-sek hoán-siā seng-hûn. O͘-sek chián-iáⁿ ê pō͘-hūn, to̍h sī cha̍h kng ê seng-chè thô͘-hún. Tī Thian-gô-chō OB2 seng-hiap lāi-té ê tōa-chit-liōng, ko-un, siàu-liân hêng-chhiⁿ hoat--chhut ê chí-gōa-kng hok-siā, kā seng-hiap lāi-té ê goân-chú chúi-sò͘ khì-thé lî-chú-hòa khì, sán-seng chit-chú kah tiān-chú hok-ha̍p ê te̍k-teng âng-kng. Tī Thian-gô-chō OB2 lāi-té ê hêng-chhiⁿ mā in-ūi hoán-siā thô͘-hún-hûn, sán-seng chiok kiông ê nâ-sek hêng-chhiⁿ-kng. Chit ê chhiau-kòe 1 tō͘ khoah ê bōng-oán-kiàⁿ sī-iá, àn-chiàu NGC 6914 ê kū-lî lâi thui-sǹg, chha-put-to sī 100 kng-nî hiah-nī khoah.

[KIP] NGC 6914 Sing-hûn Ho̍k-ha̍p-thé

Tsit tiunn tī NGC 6914 hū-kīn ê tshái-sik thian-kíng, sī beh iōng lâi gián-kiù lāi-té ê hîng-tshinn, thôo-hún, kah huat-kng khì-thé. Tsit ê sing-tsè sing-hûn ho̍k-ha̍p-thé lī lán ū 6000 kng-nî hn̄g, i to̍h tī pak-thian sing-tsō Thian-gô-tsō leh pue, mā sī tī Gîn-hô-puânn ê bīn-tíng. Tse kui-tiunn ú-tiū uē-pòo lóng-sī âng-sik ê tsuí-sòo huat-siā-sing-hûn kah kāu thôo-hún ê nâ-sik huán-siā sing-hûn. Oo-sik tsián-iánn ê pōo-hūn, to̍h sī tsa̍h kng ê sing-tsè thôo-hún. Tī Thian-gô-tsō OB2 sing-hiap lāi-té ê tuā-tsit-liōng, ko-un, siàu-liân hîng-tshinn huat--tshut ê tsí-guā-kng hok-siā, kā sing-hiap lāi-té ê guân-tsú tsuí-sòo khì-thé lî-tsú-huà khì, sán-sing tsit-tsú kah tiān-tsú hok-ha̍p ê ti̍k-ting âng-kng. Tī Thian-gô-tsō OB2 lāi-té ê hîng-tshinn mā in-uī huán-siā thôo-hún-hûn, sán-sing tsiok kiông ê nâ-sik hîng-tshinn-kng. Tsit ê tshiau-kuè 1 tōo khuah ê bōng-uán-kiànn sī-iá, àn-tsiàu NGC 6914 ê kū-lî lâi thui-sǹg, tsha-put-to sī 100 kng-nî hiah-nī khuah.

[English] The NGC 6914 Complex

A study in contrasts, this colorful skyscape features stars, dust, and glowing gas in the vicinity of NGC 6914. The interstellar complex of nebulae lies some 6,000 light-years away, toward the high-flying northern constellation Cygnus and the plane of our Milky Way Galaxy. Obscuring interstellar dust clouds appear in silhouette while reddish hydrogen emission nebulae, along with the dusty blue reflection nebulae, fill the cosmic canvas. Ultraviolet radiation from the massive, hot, young stars of the extensive Cygnus OB2 association ionize the region's atomic hydrogen gas, producing the characteristic red glow as protons and electrons recombine. Embedded Cygnus OB2 stars also provide the blue starlight strongly reflected by the dust clouds. The over 1 degree wide telescopic field of view spans about 100 light-years at the estimated distance of NGC 6914.

詞彙學習