魔鬼馬鞍山天頂 ê 超級草莓月娘

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Strawberry Supermoon Over Devil's Saddle
• 影像來源 kah 版權：Lorenzo Busilacchi
• 今仔日欲去佗位冒險？點看覓咧："Cagliari"
• 台文翻譯：An-Li Tsai (NCU)

[漢羅] 魔鬼馬鞍山天頂 ê 超級草莓月娘

月圓若是踮 地平線附近，定定看起來會較大、較脹。 這其實是一个足有名 ê 月娘錯覺。 這張縮時攝影相片，有照順序展示月球 ê 角寸尺。 照按呢 kā 看，伊 ê 角寸尺並無因為伊 peh 起來抑是落落去就無仝，毋閣月色就有改變。 記錄 ê 影格 差不多是 60 秒鐘翕一張。 這張相片嘛展示予咱看，太陽 tī 地平線附近是按怎會變甲遐爾紅。 這張合成相片是踮 意大利 Sardinia 島 Cagliari 城 翕--ê，彼工是 6 月 草莓月 ê 後一工。 這工 ê 月圓會去 hŏng 叫做是超級月娘，是因為伊 ê 角寸尺 kah 平常時比起來，有小可仔較大淡薄仔。 這粒 超級草莓月娘 拄 ùi 魔鬼馬鞍山 ê 後壁 peh 起來。 會按呢號名，是因為這粒山 tī 相片倚正爿、月娘 下底，有一个看起來大甲 無正常、欲 kah 月娘平大 ê 窟仔。 視線迵過地球 厚塗粉大氣層 ê 長度若愈來愈短，月色就會 ùi 草莓色變做蜂蜜色 kah 鵝仔黃色。 這个色光 ê 改變拄仔好有合北半球 6 月月圓 ê 名，叫做 草莓月 抑是 蜜月。 2022 年會有四个超級月娘，第三个就叫做 雷霆 超級月娘，會 tī 後個月出現。

[POJ] Mô͘-kúi Bé-oaⁿ-soaⁿ thiⁿ-téng ê Chhiau-kip Chháu-m̂ Goe̍h-niû

Goe̍h-îⁿ nā-sī tiàm tē-pêng-sòaⁿ hū-kīn, tiāⁿ-tiāⁿ khòaⁿ--khí-lâi ē khah tōa, khah tiùⁿ. Che kî-si̍t sī chi̍t-ê chiok ū-miâ ê goe̍h-niû chhò-kak. Chit-tiuⁿ sok-sî-liap-iáⁿ siòng-phìⁿ, ū chiàu sūn-sī tiān-sī goe̍h-kiû ê kak-chhùn-chhioh. Chiàu án-ni kā khòaⁿ, i ê kak-chhùn-chhioh pēng bô in-ūi i peh--khí-lâi iah-sī lak--lo̍h-khì to̍h bô-kâng, m̄-koh goe̍h-sek to̍h ū kái-piàn. Kì-lo̍k ê iáⁿ-keh chha-put-to sī 60 bió-cheng hip chi̍t tiuⁿ. Chit tiuⁿ siòng-phìⁿ mā tiān-sī hō͘ lán khòaⁿ, Thài-iông tī tē-pêng-sòaⁿ hū-kīn sī án-ná ē piàn kah hiah-nī âng. Chit tiuⁿ ha̍p-sêng siòng-phìⁿ sī tiàm I-tá-lī Sardinia tó Cagliari siâⁿ hip--ê, hit-kang sī 6 goe̍h Chháu-m̂-goe̍h ê āu chi̍t kang. Chit kang ê goe̍h-îⁿ ē khì hŏng kiò-chò sī Chhiau-kip goe̍h-niû, sī in-ūi i ê kak-chhùn-chhioh kah pêng-siông-sî pí khí-lâi, ū sió-khóa-á khah tōa tām-po̍h-á. Chit lia̍p Chhiau-kip Chháu-m̂ goe̍h-niû tú ùi Mô͘-kúi Bé-oaⁿ-soaⁿ ê āu-piah peh--khí-lâi. Ē án-ni hō-miâ, sī in-ūi chit lia̍p soaⁿ tī siòng-phìⁿ óa chiàⁿ-pêng, goe̍h-niû ē-té, ū chi̍t-ê tōa kah bô chèng-siông, beh kah goe̍h-niû pêⁿ-tōa ê khut-á. Sī-sòaⁿ thàng kòe Tē-kiû kāu thô͘-hún tōa-khì-chân ê tn̂g-tō͘ nā lú lâi lú té, goe̍h-sek to̍h ē ùi chháu-m̂ sek piàn-chò phang-bi̍t sek kah gô-á-n̄g sek. Chit ê se̍k-kng ê kái-piàn tú-á-hó ū ha̍h pak-pòaⁿ-kiû 6 goe̍h goe̍h-îⁿ ê miâ, kiò-chò Chháu-m̂-goe̍h ia̍h-sī bi̍t-goa̍t. 2022 nî ē ū sì ê Chhiau-kip-goe̍h-niû, tē-saⁿ-ê to̍h kiò-chò Lûi-têng Chhiau-kip goe̍h-niû, ē tī āu kò goe̍h chhut-hiān.

[KIP] Môo-kuí Bé-uann-suann thinn-tíng ê Tshiau-kip Tsháu-m̂ Gue̍h-niû

Gue̍h-înn nā-sī tiàm tē-pîng-suànn hū-kīn, tiānn-tiānn khuànn--khí-lâi ē khah tuā, khah tiùnn. Tse kî-si̍t sī tsi̍t-ê tsiok ū-miâ ê gue̍h-niû tshò-kak. Tsit-tiunn sok-sî-liap-iánn siòng-phìnn, ū tsiàu sūn-sī tiān-sī gue̍h-kiû ê kak-tshùn-tshioh. Tsiàu án-ni kā khuànn, i ê kak-tshùn-tshioh pīng bô in-uī i peh--khí-lâi iah-sī lak--lo̍h-khì to̍h bô-kâng, m̄-koh gue̍h-sik to̍h ū kái-piàn. Kì-lo̍k ê iánn-keh tsha-put-to sī 60 bió-tsing hip tsi̍t tiunn. Tsit tiunn siòng-phìnn mā tiān-sī hōo lán khuànn, Thài-iông tī tē-pîng-suànn hū-kīn sī án-ná ē piàn kah hiah-nī âng. Tsit tiunn ha̍p-sîng siòng-phìnn sī tiàm I-tá-lī Sardinia tó Cagliari siânn hip--ê, hit-kang sī 6 gue̍h Tsháu-m̂-gue̍h ê āu tsi̍t kang. Tsit kang ê gue̍h-înn ē khì hŏng kiò-tsò sī Tshiau-kip gue̍h-niû, sī in-uī i ê kak-tshùn-tshioh kah pîng-siông-sî pí khí-lâi, ū sió-khuá-á khah tuā tām-po̍h-á. Tsit lia̍p Tshiau-kip Tsháu-m̂ gue̍h-niû tú uì Môo-kuí Bé-uann-suann ê āu-piah peh--khí-lâi. Ē án-ni hō-miâ, sī in-uī tsit lia̍p suann tī siòng-phìnn uá tsiànn-pîng, gue̍h-niû ē-té, ū tsi̍t-ê tuā kah bô tsìng-siông, beh kah gue̍h-niû pênn-tuā ê khut-á. Sī-suànn thàng kuè Tē-kiû kāu thôo-hún tuā-khì-tsân ê tn̂g-tōo nā lú lâi lú té, gue̍h-sik to̍h ē uì tsháu-m̂ sik piàn-tsò phang-bi̍t sik kah gô-á-n̄g sik. Tsit ê si̍k-kng ê kái-piàn tú-á-hó ū ha̍h pak-puànn-kiû 6 gue̍h gue̍h-înn ê miâ, kiò-tsò Tsháu-m̂-gue̍h ia̍h-sī bi̍t-gua̍t. 2022 nî ē ū sì ê Tshiau-kip-gue̍h-niû, tē-sann-ê to̍h kiò-tsò Luî-tîng Tshiau-kip gue̍h-niû, ē tī āu kò gue̍h tshut-hiān.

[English] Strawberry Supermoon Over Devil's Saddle

Near the horizon the full moon often seems to loom large, swollen in appearance by the famous Moon illusion. But time-lapse image sequences demonstrate that the Moon's angular size doesn't really change as it rises or sets. Its color does, though. Recording a frame about every 60 seconds, this image also shows how red the Sun can look while low on the horizon. The featured montage was taken from Cagliari, Sardinia, Italy, the day after June's Strawberry Moon, a full moon dubbed a supermoon due to its slightly larger-than-usual angular size. This Strawberry Supermoon is seen rising behind the Devil's Saddle, a mountain named for the unusual moon-sized dip seen just to the right of the rising moon. A shrinking line-of-sight through planet Earth's dense and dusty atmosphere shifted the moonlight from strawberry red through honey-colored and paler yellowish hues. That change seems appropriate for a northern June Full Moon also known as the Strawberry or Honey Moon. A Thunder Supermoon -- the third of four supermoons in 2022 -- will occur later this month.

詞彙學習