火衛一 Phobos：死期欲到矣 ê 火星衛星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Phobos: Doomed Moon of Mars
• 影像來源：HiRISE, MRO, LPL (U. Arizona), NASA
• 台文翻譯：An-Li Tsai (NCU)

[漢羅] 火衛一 Phobos：死期欲到矣 ê 火星衛星

這粒衛星 ê 死期已經註定好矣！ 火星 這粒紅色行星是用 羅馬戰神 ê 名 號--ê。 伊有兩粒細粒衛星，火衛一 Phobos kah 火衛二 Deimos。 這兩个名是 ùi 希臘文 ê 驚 kah 惶 來--ê。 這兩粒 火星 ê 衛星，可能本底是 ùi 火星 kah 木星之間 ê 主小行星帶來 ê 小行星，嘛有可能是 ùi 咱太陽系 閣較遠 ê 所在來 ê 天體，落尾去予火星掠牢矣。 這張 予人呵咾甲會觸舌 ê 彩色相片，是 火星探測軌道衛星 翕--ê，伊會當看著 10 公尺細 ê 物件。 相片內底 ê 火衛一 Phobos 是較大粒 ê 衛星，是一粒面頂有足濟隕石坑、親像是小行星 ê 天體。 毋閣 火衛一 Phobos 踅火星 ê 軌道 傷倚矣，伊 kah 火星地表 ê 距離才 5800 公里爾爾，按呢 引潮力 會 kā 伊搝落來。 是講，咱 ê 月娘 kah 地球 ê 距離是 40 萬公里遠。 差不多閣 5000 萬年，火衛一 Phobos 應該會去予搝甲碎糊糊，變做一輾衛星屑仔。

[POJ] Hóe-ūi-it Phobos: Sí-kî beh kàu--ah ê Hóe-chhiⁿ ūi-chhiⁿ

Chit-lia̍p ūi-chhiⁿ ê sí-kî í-keng chù-tiāⁿ hó--ah! Hóe-chhiⁿ chit lia̍p âng-sek kiâⁿ-chhiⁿ sī iōng Lô-má chiàn-sîn ê miâ hō--ê. I ū nn̄g lia̍p sè-lia̍p ūi-chhiⁿ, Hóe-ūi-it Phobos kah Hóe-ūi-jī Deimos. Chit nn̄g ê miâ sī ùi Hi-la̍h-bûn ê kiaⁿ kah hiâⁿ lâi--ê. Chit nn̄g lia̍p Hóe-chhiⁿ ê ūi-chhiⁿ, khó-lêng pún-té sī ùi Hóe-chhiⁿ kah Bo̍k-chhiⁿ chi-kan ê chú-sió-kiâⁿ-chhiⁿ-tòa lâi ê sió-kiâⁿ-chhiⁿ, mā ū khó-lêng sī ùi lán Thài-iông-hē koh-khah hn̄g ê só͘-chāi lâi ê thian-thé, lo̍h-bóe khì hō͘ Hóe-chhiⁿ lia̍h-tiâu--ah. Chit-tiuⁿ hō͘ lâng o-ló kah ē tak-chi̍h ê chhái-sek siòng-phìⁿ, sī Hóe-chhiⁿ Thàm-chhek-kúi-tō-ūi-chhiⁿ hip--ê, i ē-tàng khòaⁿ-tio̍h 10 kong-lí sè ê mi̍h-kiāⁿ. Siòng-phìⁿ lāi-té ê Hóe-ūi-it Phobos sī khah tōa-lia̍p ê ūi-chhiⁿ, sī chi̍t-lia̍p bīn-téng ū chiok chōe ún-se̍k-kheⁿ, chhiⁿ-chhiūⁿ sī sió-kiâⁿ-chhiⁿ ê thian-thé. M̄-koh Hóe-ūi-it Phobos se̍h Hóe-chhiⁿ ê kúi-tō siūⁿ óa--ah, i kah Hóe-chhiⁿ tē-piáu ê kū-lî chiah 5800 kong-lí niā-niā, án-ni ín-tiâu-le̍k ē kā i giú--lo̍h-lâi. Sī-kóng, lán ê goe̍h-niû kah Tē-kiû ê sī 40 bān kong-lí hn̄g. Chha-put-to koh 5000 bān nî, Hóe-ūi-it Phobos èng-kai ē khì hō͘ giú kah chhùi-kô͘-kô͘, piàn-chò chi̍t liàn ūi-chhiⁿ sap-á.

[KIP] Hué-uī-it Phobos: Sí-kî beh kàu--ah ê Hué-tshinn uī-tshinn

Tsit-lia̍p uī-tshinn ê sí-kî í-king tsù-tiānn hó--ah! Hué-tshinn tsit lia̍p âng-sik kiânn-tshinn sī iōng Lô-má tsiàn-sîn ê miâ hō--ê. I ū nn̄g lia̍p sè-lia̍p uī-tshinn, Hué-uī-it Phobos kah Hué-uī-jī Deimos. Tsit nn̄g ê miâ sī uì Hi-la̍h-bûn ê kiann kah hiânn lâi--ê. Tsit nn̄g lia̍p Hué-tshinn ê uī-tshinn, khó-lîng pún-té sī uì Hué-tshinn kah Bo̍k-tshinn tsi-kan ê tsú-sió-kiânn-tshinn-tuà lâi ê sió-kiânn-tshinn, mā ū khó-lîng sī uì lán Thài-iông-hē koh-khah hn̄g ê sóo-tsāi lâi ê thian-thé, lo̍h-bué khì hōo Hué-tshinn lia̍h-tiâu--ah. Tsit-tiunn hōo lâng o-ló kah ē tak-tsi̍h ê tshái-sik siòng-phìnn, sī Hué-tshinn Thàm-tshik-kuí-tō-uī-tshinn hip--ê, i ē-tàng khuànn-tio̍h 10 kong-lí sè ê mi̍h-kiānn. Siòng-phìnn lāi-té ê Hué-uī-it Phobos sī khah tuā-lia̍p ê uī-tshinn, sī tsi̍t-lia̍p bīn-tíng ū tsiok tsuē ún-si̍k-khenn, tshinn-tshiūnn sī sió-kiânn-tshinn ê thian-thé. M̄-koh Hué-uī-it Phobos se̍h Hué-tshinn ê kuí-tō siūnn uá--ah, i kah Hué-tshinn tē-piáu ê kū-lî tsiah 5800 kong-lí niā-niā, án-ni ín-tiâu-li̍k ē kā i giú--lo̍h-lâi. Sī-kóng, lán ê gue̍h-niû kah Tē-kiû ê sī 40 bān kong-lí hn̄g. Tsha-put-to koh 5000 bān nî, Hué-uī-it Phobos ìng-kai ē khì hōo giú kah tshuì-kôo-kôo, piàn-tsò tsi̍t liàn uī-tshinn sap-á.

[English] Phobos: Doomed Moon of Mars

This moon is doomed. Mars, the red planet named for the Roman god of war, has two tiny moons, Phobos and Deimos, whose names are derived from the Greek for Fear and Panic. These martian moons may well be captured asteroids originating in the main asteroid belt between Mars and Jupiter or perhaps from even more distant reaches of our Solar System. The larger moon, Phobos, is indeed seen to be a cratered, asteroid-like object in this stunning color image from the robotic Mars Reconnaissance Orbiter, with objects as small as 10 meters visible. But Phobos orbits so close to Mars - about 5,800 kilometers above the surface compared to 400,000 kilometers for our Moon - that gravitational tidal forces are dragging it down. In perhaps 50 million years, Phobos is expected to disintegrate into a ring of debris.

詞彙學習