台北天頂 ê 日行軌跡

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Analemma over Taipei
• 影像來源 kah 版權：Meiying Lee (李美英)
• 台文翻譯：An-Li Tsai (NCU)

[漢羅] 台北天頂 ê 日行軌跡

天頂 ê 日頭敢會逐工行轉去原來彼位？袂呢！ 想袂知影這个答案，來看 日行軌跡 會較清楚，就是 kā 一冬內 仝一个時間仝一个所在 翕 ê 日頭相片疊做一張。 這張日行軌跡 是 kā 足濟工 2021 年下晡 4:30 踮 台灣 翕 ê 相片疊出來 ê 結果。 前景是 台北市 ê 剪影，咱嘛看會著上懸彼个 台北 101。 日頭 tī 天頂上倒爿 ê 時，是 12 月 ê 冬節。 日頭 tī 天頂上正爿 ê 時，是 6 月 ê 夏節。 這張閣有翕著 冬節、夏節、春分、秋分 這幾工，日頭規工是按怎咧行。 今仔日是 2022 年北半球 ê 夏節，抑就是講，這工 ê 日頭 會 tī 地球 天頂 留上久。 Tùi 足濟國家來講，今仔日是官方換 季 ê 日子。 咱若是踮南半球，今仔日就是冬季 ê 頭一工。

[POJ] Tâi-pak thiⁿ-téng ê Ji̍t-hêng kúi-jiah

Thiⁿ-téng ê ji̍t-thâu kám-ē ta̍k-kang kiâⁿ tńg-khì goân-lâi hit ūi? Bōe neh! Siūⁿ beh chai-iáⁿ chit-ê tap-àn, lâi khòaⁿ ji̍t-hêng kúi-jiah ē khah chheng-chhó͘, to̍h sī kā chi̍t tang lāi kāng chi̍t-ê sî-kan kāng chi̍t-ê só͘-chāi hip ê ji̍t-thâu siòng-phìⁿ tha̍h chò chi̍t tiuⁿ. Chit tiuⁿ ji̍t-hêng kúi-jiah sī kā chiok chōe kang 2021 nî ē-po͘ 4:30 tiàm Tâi-oân hip ê siòng-phìⁿ tha̍h--chhut-lâi ê kiat-kó. Chiân-kéng sī Tâi-pak-chhī ê chián-iáⁿ, lán mā khòaⁿ-ē-tio̍h siōng koân hit-ê Tâi-pak 101. Ji̍t-thâu tī thiⁿ-téng siōng tò-pêng ê sī, sī 12 goe̍h ê tang-cheh. Ji̍t-thâu tī thiⁿ-téng siōng chiàⁿ-pêng ê sî, sī 6 goe̍h ê hā-cheh. Chit tiuⁿ koh ū hip-tio̍h tang-cheh, hā-cheh, chhun-hun, chhiu-hun chit kúi kang, ji̍t-thâu kui-kang sī án-ná leh kiâⁿ. Kin-á-ji̍t sī 2022 nî pak-pòaⁿ-kiû ê hā-cheh, ia̍h to̍h sī kóng, chit kang ê ji̍t-thâu ē tī Tē-kiû thiⁿ-téng lâu siōng kú. Tùi chiok-chōe kok-ka lâi kóng, kin-á-ji̍t sī koaⁿ-hong ōaⁿ-kùi ê ji̍t-chí. Lán nā-sī tiàm lâm-pòaⁿ-kiû, kin-á-ji̍t to̍h sī tang-kùi ê thâu chi̍t kang.

[KIP] Tâi-pak thinn-tíng ê Ji̍t-hîng kuí-jiah

Thinn-tíng ê ji̍t-thâu kám-ē ta̍k-kang kiânn tńg-khì guân-lâi hit uī? Buē neh! Siūnn beh tsai-iánn tsit-ê tap-àn, lâi khuànn ji̍t-hîng kuí-jiah ē khah tshing-tshóo, to̍h sī kā tsi̍t tang lāi kāng tsi̍t-ê sî-kan kāng tsi̍t-ê sóo-tsāi hip ê ji̍t-thâu siòng-phìnn tha̍h tsò tsi̍t tiunn. Tsit tiunn ji̍t-hîng kuí-jiah sī kā tsiok tsuē kang 2021 nî ē-poo 4:30 tiàm Tâi-uân hip ê siòng-phìnn tha̍h--tshut-lâi ê kiat-kó. Tsiân-kíng sī Tâi-pak-tshī ê tsián-iánn, lán mā khuànn-ē-tio̍h siōng kuân hit-ê Tâi-pak 101. Ji̍t-thâu tī thinn-tíng siōng tò-pîng ê sī, sī 12 gue̍h ê tang-tseh. Ji̍t-thâu tī thinn-tíng siōng tsiànn-pîng ê sî, sī 6 gue̍h ê hā-tseh. Tsit tiunn koh ū hip-tio̍h tang-tseh, hā-tseh, tshun-hun, tshiu-hun tsit kuí kang, ji̍t-thâu kui-kang sī án-ná leh kiânn. Kin-á-ji̍t sī 2022 nî pak-puànn-kiû ê hā-tseh, ia̍h to̍h sī kóng, tsit kang ê ji̍t-thâu ē tī Tē-kiû thinn-tíng lâu siōng kú. Tuì tsiok-tsuē kok-ka lâi kóng, kin-á-ji̍t sī kuann-hong uānn-kuì ê ji̍t-tsí. Lán nā-sī tiàm lâm-puànn-kiû, kin-á-ji̍t to̍h sī tang-kuì ê thâu tsi̍t kang.

[English] Analemma over Taipei

Does the Sun return to the same spot on the sky every day? No. A better and more visual answer to that question is an analemma, a composite of images taken at the same time and from the same place over the course of a year. The featured analemma was compiled at 4:30 pm many afternoons from Taiwan during 2021, with the city skyline of Taipei in the foreground, including tall Taipei 101. The Sun's location in December -- at the December solstice -- is shown on the far left, while its location at the June solstice is captured on the far right. Also shown are the positions of the Sun throughout the rest of the day on the solstices and equinoxes. Today is the June solstice of 2022, the day in Earth's northern hemisphere when the Sun spends the longest time in the sky. In many countries, today marks the official beginning of a new season, for example winter in Earth's southern hemisphere.

詞彙學習