火星面頂 ê 手指頭仔岩石

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Rock Fingers on Mars
• 影像來源：NASA, JPL-Caltech, MSSS
• 探索宇宙：APOD 亂數產生器
• 台文翻譯：An-Li Tsai (NCU)

[漢羅] 火星面頂 ê 手指頭仔岩石

彼个！踮中央較倚正爿彼个，是啥物？ 火星表面一直有一寡新 ê 趣味代 出現。 最近這个新發現，是一个手指頭仔形 ê 岩石。 這張相片是 火星 ê 好奇號機器人探測車 佇頂個月 翕--ê，內底有直直徛咧 ê 細塊岩石。 雖罔講這个寸尺 kah 外形有成細隻 蛇，毋閣若是講著 in ê 起源，這馬較 hŏng 接受 ê 解說是講，是水 流過岩石閬縫 ê 時陣，留落來 ê 細塊礦物 ê 集合體。 是當初時，有一寡 較實密 ê 礦物 kā 岩石閬縫窒予密，等邊仔 ê 岩石去予侵蝕了了 了後，就賰這寡集合體矣。 地球面頂 kah 這有類似起源 ê 岩石，就是有名 ê 巫毒石林。 NASA ê 好奇號探測車，這馬繼續踮火星 ê Gale 隕石坑 內底揣古早時代 水 ê 線索。 伊嘛紀錄火星 ê 地質資料，因為這 tùi 未來人類欲探索 火星，是足重要 ê 資訊。

[POJ] Hóe-chhiⁿ bīn-téng ê Chhiú-chéng-thâu-á Giâm-chio̍h

Hit-ê! Tiàm tiong-ng khah óa chiàⁿ-pêng hit-ê, sī siáⁿ-mih? Hóe-chhiⁿ piáu-bīn it-ti̍t ū chi̍t-kóa sin ê chhù-bī-tāi chhut-hiān. Chòe-kīn chit-ê sin hoat-hiān, sī chi̍t-ê chhiú-chéng-thâu-á hêng ê giâm-chio̍h. Chit-tiuⁿ siòng-phìⁿ sī Hóe-chhiⁿ ê Hòⁿ-kî-hō ke-khì-lâng thàm-chhek-chhia tī téng kò goe̍h hip--ê, lāi-té ū ti̍t-ti̍t khiā--leh ê sè-tè giâm-chio̍h. Sui-bóng kóng chit-ê chhùn-chhioh kah gōa-hêng ū sêng sè-chiah chôa, m̄-koh nā-sī kóng-tio̍h in ê khí-goân, chit-má khah hŏng chiap-siu ê kái-soeh sī kóng, sī chúi lâu-kòe giâm-chio̍h làng-phāng ê sî-chūn, lâu--lo̍h-lâi ê sè-tè khòng-bu̍t ê chi̍p-ha̍p-thé. Sī tong-chhoe-sî, ū chi̍t-kóa khah cha̍t-ba̍t ê khòng-bu̍t kā giâm-chio̍h làng-phāng that hō͘ ba̍t, tàn piⁿ-á ê giâm-chio̍h khì hō͘ chhim-sit liáu-liáu liáu-āu, to̍h chhun chit-kóa chi̍p-ha̍p-thé ah. Tē-kiû bīn-téng kah che ū lūi-sū khí-goân ê giâm-chio̍h, to̍h sī ū-miâ ê Bû-to̍k-chio̍h-nâ. NASA ê Hòⁿ-kî-hō thàm-chhek-chhia, chit-má kè-sio̍k tiàm Hóe-chhiⁿ ê Gale ún-se̍k-kheⁿ lāi-té chhōe kó͘-chá sî-tāi chúi ê sòaⁿ-soh. I mā kì-lo̍k Hóe-chhiⁿ ê tē-chit chu-liāu, in-ūi che tùi bī-lâi jîn-lūi beh thàm-soh Hóe-chhiⁿ, sī chiok tiōng-iàu ê chū-sìn.

[KIP] Hué-tshinn bīn-tíng ê Tshiú-tsíng-thâu-á Giâm-tsio̍h

Hit-ê! Tiàm tiong-ng khah uá tsiànn-pîng hit-ê, sī siánn-mih? Hué-tshinn piáu-bīn it-ti̍t ū tsi̍t-kuá sin ê tshù-bī-tāi tshut-hiān. Tsuè-kīn tsit-ê sin huat-hiān, sī tsi̍t-ê tshiú-tsíng-thâu-á hîng ê giâm-tsio̍h. Tsit-tiunn siòng-phìnn sī Hué-tshinn ê Hònn-kî-hō ke-khì-lâng thàm-tshik-tshia tī tíng kò gue̍h hip--ê, lāi-té ū ti̍t-ti̍t khiā--leh ê sè-tè giâm-tsio̍h. Sui-bóng kóng tsit-ê tshùn-tshioh kah guā-hîng ū sîng sè-tsiah tsuâ, m̄-koh nā-sī kóng-tio̍h in ê khí-guân, tsit-má khah hŏng tsiap-siu ê kái-sueh sī kóng, sī tsuí lâu-kuè giâm-tsio̍h làng-phāng ê sî-tsūn, lâu--lo̍h-lâi ê sè-tè khòng-bu̍t ê tsi̍p-ha̍p-thé. Sī tong-tshue-sî, ū tsi̍t-kuá khah tsa̍t-ba̍t ê khòng-bu̍t kā giâm-tsio̍h làng-phāng that hōo ba̍t, tàn pinn-á ê giâm-tsio̍h khì hōo tshim-sit liáu-liáu liáu-āu, to̍h tshun tsit-kuá tsi̍p-ha̍p-thé ah. Tē-kiû bīn-tíng kah tse ū luī-sū khí-guân ê giâm-tsio̍h, to̍h sī ū-miâ ê Bû-to̍k-tsio̍h-nâ. NASA ê Hònn-kî-hō thàm-tshik-tshia, tsit-má kè-sio̍k tiàm Hué-tshinn ê Gale ún-si̍k-khenn lāi-té tshuē kóo-tsá sî-tāi tsuí ê suànn-soh. I mā kì-lo̍k Hué-tshinn ê tē-tsit tsu-liāu, in-uī tse tuì bī-lâi jîn-luī beh thàm-soh Hué-tshinn, sī tsiok tiōng-iàu ê tsū-sìn.

[English] Rock Fingers on Mars

There, just right of center, what is that? The surface of Mars keeps revealing new surprises with the recent discovery of finger-like rock spires. The small nearly-vertical rock outcrops were imaged last month by the robotic Curiosity rover on Mars. Although similar in size and shape to small snakes, the leading explanation for their origin is as conglomerations of small minerals left by water flowing through rock crevices. After these relatively dense minerals filled the crevices, they were left behind when the surrounding rock eroded away. Famous rock outcrops on Earth with a similar origin are called hoodoos. NASA's Curiosity Rover continues to search for new signs of ancient water in Gale Crater on Mars, while also providing a geologic background important for future human exploration.

詞彙學習