遊戲:超級行星相挵

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 遊戲:超級行星相挵

毋知你敢有法度製造一个會當活 1000 年 ê 行星系統? 你會當耍這个遊戲「超級行星相挵」,看會當抑是袂當。 你愛生出 10 粒 行星,踮中央恆星附近點落去就會生一粒出來。 倒爿 ê 菜單會當予你按照行星 ê 質量來揀行星 ê 形態。 Ùi 質量較細到較大是:地球超級地球冰巨行星巨行星棕矮行星、kah 矮恆星。 逐粒行星毋若去予行星系統內底,像太陽這款恆星 ê 引力縛牢–ê,嘛去予其他行星 ê 引力縛牢–ê。 耍愈久你 ê 分數會愈懸,而且你囥 ê 行星若是愈密,抑是囥較濟粒 tī 性命四序區 內底,你嘛會提著 獎勵分數。 你若是有法度耍到 1000 年,抑是行星去予引力 kā 擲出去,這个遊戲就會結束矣。 最近這幾冬,有 足濟系外行星系統 去予科學家揣著。 這个 超級行星相挵 ê 展示予咱看講,有一寡行星系統會較穩定。 等你耍這个 超級行星相挵 ê 遊戲幾若擺了後,你可能會開始憢疑。 到時你應該有理由相信講,咱 ê 太陽系 tī 行星系統形成 ê 過程,應該是有 幾若粒行星 phàng 見去矣

[POJ] Iû-hì: Chhiau-kip-kiâⁿ-chhiⁿ Sio-lòng

M̄-chai lí kám ū-hoat-tō͘ chè-chō chi̍t-ê ē-tàng oa̍h 1000 nî ê kiâⁿ-chhiⁿ hē-thóng? Lí ē-tàng sńg chit-ê iû-hì “Chhiau-kip Kiâⁿ-chhiⁿ Sio-lòng”, khòaⁿ ē-tàng iah-sī bē-tàng. Lí ài siⁿ-chhut 10 lia̍p kiâⁿ-chhiⁿ, tiàm tiong-ng hêng-chhiⁿ hū-kīn tiám–lo̍h-khì to̍h ēf siⁿ chi̍t-lia̍p chhut-lâi. Tò-pêng ê chhài-toaⁿ ē-tàng hō͘ lí chiàu kiâⁿ-chhiⁿ ê chit-liōng lâi kéng kiâⁿ-chhiⁿ ê hêng-thài. Ùi chit-liōng khah sè kàu khah tōa sī: Tē-kiû, Chhiau-kip Tē-kiû, Peng-kū-kiâⁿ-chhiⁿ, Kū-kiâⁿ-chhiⁿ, Chang-é-kiâⁿ-chhiⁿ, kah É-hêng-chhiⁿ. Ta̍k-lia̍p kiâⁿ-chhiⁿ m̄-nā khì hō͘ kiâⁿ-chhiⁿ-hē-thóng lāi-té, chhiūⁿ Thài-iông chit-khoán hêng-chhiⁿ ê ín-le̍k pa̍k-tiâu–ê, mā khì hō͘ kî-tha kiâⁿ-chhiⁿ ê ín-le̍k pa̍k-tiâu–ê. Sńg lú kú lí ê hun-sò͘ ē lú koân, jî-chhiáⁿ lí khǹg ê kiâⁿ-chhiⁿ nā-sī lú ba̍t, iah-sī khǹg khah chōe lia̍p tī sìⁿ-miā sù-sī-khu lāi-té, lí mā ē the̍h-tio̍h chióng-lē hun-sò͘. Lí nā-sī ū-hoat-tō͘ sńg kàu 1000 nî, iah-sī kiâⁿ-chhiⁿ khì hō͘ ín-le̍k kā tàn–chhut-khì, chit-ê iû-hì to̍h ē kiat-sok ah. Chòe-kīn chit kúi tang, ū chiok chōe hē-gōa-kiâⁿ-chhiⁿ-hē-thóng khì hō͘ kho-ha̍k-ka chhōe-tio̍h. Chit-ê Chhiau-kip-kiâⁿ-chhiⁿ Sio-lòng ê tián-sī hō͘ lán khòaⁿ kóng, ū chi̍t-kóa kiâⁿ-chhiⁿ-hē-thóng ē khah ún-tēng. Tán lí sńg chit-ê Chhiau-kip-kiâⁿ-chhiⁿ Sio-lòng ê iû-hì kúi-ā pái liáu-āu, lí khó-lêng ē khai-sí giâu-gî. Kàu-sî lí èng-kai ū lí-iû siong-sìn kóng, lán ê Thài-iông-hē tī kiâⁿ-chhiⁿ-hē-thóng hêng-sêng ê kòe-têng, èng-kai sī ū kúi-ā lia̍p kiâⁿ-chhiⁿ phàng-kìⁿ khì ah.

[KIP] Iû-hì: Tshiau-kip-kiânn-tshinn Sio-lòng

M̄-tsai lí kám ū-huat-tōo tsè-tsō tsi̍t-ê ē-tàng ua̍h 1000 nî ê kiânn-tshinn hē-thóng? Lí ē-tàng sńg tsit-ê iû-hì “Tshiau-kip Kiânn-tshinn Sio-lòng”, khuànn ē-tàng iah-sī bē-tàng. Lí ài sinn-tshut 10 lia̍p kiânn-tshinn, tiàm tiong-ng hîng-tshinn hū-kīn tiám–lo̍h-khì to̍h ēf sinn tsi̍t-lia̍p tshut-lâi. Tò-pîng ê tshài-tuann ē-tàng hōo lí tsiàu kiânn-tshinn ê tsit-liōng lâi kíng kiânn-tshinn ê hîng-thài. Uì tsit-liōng khah sè kàu khah tuā sī: Tē-kiû, Tshiau-kip Tē-kiû, Ping-kū-kiânn-tshinn, Kū-kiânn-tshinn, Tsang-é-kiânn-tshinn, kah É-hîng-tshinn. Ta̍k-lia̍p kiânn-tshinn m̄-nā khì hōo kiânn-tshinn-hē-thóng lāi-té, tshiūnn Thài-iông tsit-khuán hîng-tshinn ê ín-li̍k pa̍k-tiâu–ê, mā khì hōo kî-tha kiânn-tshinn ê ín-li̍k pa̍k-tiâu–ê. Sńg lú kú lí ê hun-sòo ē lú kuân, jî-tshiánn lí khǹg ê kiânn-tshinn nā-sī lú ba̍t, iah-sī khǹg khah tsuē lia̍p tī sìnn-miā sù-sī-khu lāi-té, lí mā ē the̍h-tio̍h tsióng-lē hun-sòo. Lí nā-sī ū-huat-tōo sńg kàu 1000 nî, iah-sī kiânn-tshinn khì hōo ín-li̍k kā tàn–tshut-khì, tsit-ê iû-hì to̍h ē kiat-sok ah. Tsuè-kīn tsit kuí tang, ū tsiok tsuē hē-guā-kiânn-tshinn-hē-thóng khì hōo kho-ha̍k-ka tshuē-tio̍h. Tsit-ê Tshiau-kip-kiânn-tshinn Sio-lòng ê tián-sī hōo lán khuànn kóng, ū tsi̍t-kuá kiânn-tshinn-hē-thóng ē khah ún-tīng. Tán lí sńg tsit-ê Tshiau-kip-kiânn-tshinn Sio-lòng ê iû-hì kuí-ā pái liáu-āu, lí khó-lîng ē khai-sí giâu-gî. Kàu-sî lí ìng-kai ū lí-iû siong-sìn kóng, lán ê Thài-iông-hē tī kiânn-tshinn-hē-thóng hîng-sîng ê kuè-tîng, ìng-kai sī ū kuí-ā lia̍p kiânn-tshinn phàng-kìnn khì ah.

[English] Game: Super Planet Crash

Can you create a planetary system that lasts for 1000 years? Super Planet Crash, the featured game, allows you to try. To create up to ten planets, just click anywhere near the central star. Planet types can be selected on the left in order of increasing mass: Earth, Super-Earth, Ice giant, Giant planet, Brown dwarf, or Dwarf star. Each planet is gravitationally attracted not only to the central Sun-like star, but to other planets. Points are awarded, with bonus factors applied for increasingly crowded and habitable systems. The game ends after 1000 years or when a planet is gravitationally expelled. Many exoplanetary systems are being discovered in recent years, and Super Planet Crash demonstrates why some remain stable. As you might suspect after playing Super Planet Crash a few times, there is reason to believe that our own Solar System has lost planets during its formation.

詞彙學習(漢羅/POJ/KIP/華語/English)

  • 【超級行星】chhiau-kip-kiâⁿ-chhiⁿ/tshiau-kip-kiânn-tshinn/超級行星/Super planet
  • 【行星系統】kiâⁿ-chhiⁿ-hē-thóng/kiânn-tshinn-hē-thóng/行星系統/planetary system
  • 【系外行星】hē-gōa-kiâⁿ-chhiⁿ/hē-guā-kiânn-tshinn/系外行星/exoplanet
  • 【系外行星系統】hē-gōa-kiâⁿ-chhiⁿ-hē-thóng/hē-guā-kiânn-tshinn-hē-thóng/系外行星系統/exoplanetary system
  • 【超級地球】Chhiau-kip Tē-kiû/Tshiau-kip Tē-kiû/超級地球/Super-Earth
  • 【冰巨行星】Peng-kū kiâⁿ-chhiⁿ/Ping-kū kiânn-tshinn/冰巨行星/Ice giant
  • 【巨行星】Kū kiâⁿ-chhiⁿ/Kū kiânn-tshinn/巨行星/Giant planet
  • 【棕矮行星】chang-é-kiâⁿ-chhiⁿ/tsang-é-kiânn-tshinn/棕矮行星/Brown dwarf
  • 【矮恆星】é-hêng-chhiⁿ/é-hîng-tshinn/矮恆星/Dwarf star
  • 【矮星】é-chhiⁿ/é-tshinn/矮星/Dwarf star
  • 【性命四序區】sìⁿ-miā sù-sī-khu/sìnn-miā sù-sī-khu/適居帶/habitable zone

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:天鵝座 γ kah 邊仔 ê 星雲 明仔載 ê 圖:火星面頂 ê 手指頭仔岩石