天鵝座 γ kah 邊仔 ê 星雲

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Gamma Cygni Nebula
• 影像來源 kah 版權：Min Xie, Chen Wu, Yizhou Zhang, and Benchu Tang
• 台文翻譯：An-Li Tsai (NCU)

[漢羅] 天鵝座 γ kah 邊仔 ê 星雲

超巨星 天鵝座 γ（天津一）是佇北十字座 ê 中心遐。 這个有名 ê 星群，就敢若是一隻天鵝飛佇北半球熱天懸懸 ê 夜空中。 In 就是 天鵝座，佇銀河盤附近遐。 天津一佇英語內底正式 ê 名 就號做 Sadr。 這幅彩色影像是 ùi 闊頻 kah 狹頻影像資料來--ê，天津一就佇這幅 望遠鏡景色 中央倚下跤遐。 伊佇天頂 ê 視野範圍差不多是 3 度闊（6 粒月圓 ê 大細）。 內底閣有發射星雲 IC 1318 kah 開放星團 NGC 6910。 相片倚頂懸咧發光--ê，看起來敢若是去予長長 ê 塗粉帶分做兩爿 ê 宇宙翼股。 所以 IC 1318 才會叫做 蝶仔星雲，這嘛誠好理解。 天津一 ê 正爿是一陣少年、實櫼 ê 星團 NGC 6910。 咱到天津一 ê 距離 差不多是 560 秒差距，按呢差不多是 1800 光年遠。 咱估計 IC 1318 kah NGC 6910 到咱 ê 距離，差不多是 2000 到 5000 光年遐爾遠。

[POJ] Thian-gô-chō γ kah piⁿ-á ê seng-hûn

Chhiau-kū-chhiⁿ Thian-gô-chō γ (mā kiò-chò Thian-tin-it) sī tī Pak-si̍p-jī-chō ê tiong-sim hiah. Chit-ê ū-miâ ê seng-kûn, to̍h ká-ná sī chi̍t chiah thian-gô poe tī pak-pòaⁿ-kiû joa̍h-thiⁿ koân-koân ê iā-khong tiong. In to̍h sī Thian-gô-chō, tī Gîn-hô-pôaⁿ hū-kīn hiah. Thian-tin-it tī eng-gí lāi-té chèng-sek ê miâ to̍h hō-chò Sadr. Chit pak chhái-sek iáⁿ-siōng sī ùi khoah-pîn kah e̍h-pîn iáⁿ-siōng chu-liāu lâi--ê, Thian-tin-it to̍h tī chit pak bōng-oán-kiàⁿ kéng-sek tiong-ng óa ē-kha hiah. I tī thiⁿ-téng ê sī-iá hoān-ûi chha-put-to sī 3 tō͘ khoah (6 lia̍p goe̍h-îⁿ ê tōa-sè). Lāi-té koh ū hoat-siā-seng-hûn IC 1318 kah khai-hòng-seng-thoân NGC 6910. Siòng-phìⁿ óa téng-koân leh hoat-kng--ê, khòaⁿ--khí-lâi ká-ná sī khì hō͘ tn̂g-tn̂g ê thô͘-hún-tòa pun chò nn̄g pêng ê ú-tiū si̍t-kó͘. Só͘-í IC 1318 chiah-ē kiò-chò Iā-á-seng-hûn, che mā chiâⁿ hó lí-kái. Thian-tin-it ê chiàⁿ-pêng sī chi̍t tīn siàu-liân, cha̍t-chiⁿ ê seng-thoân NGC 6910. Lán kàu Thian-tin-it ê kū-lî chha-put-to sī 560 bió-chha-kū, án-ni chha-put-to sī 1800 kng-nî hn̄g. Lán kó͘-kè IC 1318 kah NGC 6910 kàu lán ê kū-lî, chha-put-to sī 2000 kàu 5000 kng-nî hiah-nī hn̄g.

[KIP] Thian-gô-tsō γ ê sing-hûn

Tshiau-kū-tshinn Thian-gô-tsō γ (mā kiò-tsò Thian-tin-it) sī tī Pak-si̍p-jī-tsō ê tiong-sim hiah. Tsit-ê ū-miâ ê sing-kûn, to̍h ká-ná sī tsi̍t tsiah thian-gô pue tī pak-puànn-kiû jua̍h-thinn kuân-kuân ê iā-khong tiong. In to̍h sī Thian-gô-tsō, tī Gîn-hô-puânn hū-kīn hiah. Thian-tin-it tī ing-gí lāi-té tsìng-sik ê miâ to̍h hō-tsò Sadr. Tsit pak tshái-sik iánn-siōng sī uì khuah-pîn kah e̍h-pîn iánn-siōng tsu-liāu lâi--ê, Thian-tin-it to̍h tī tsit pak bōng-uán-kiànn kíng-sik tiong-ng uá ē-kha hiah. I tī thinn-tíng ê sī-iá huān-uî tsha-put-to sī 3 tōo khuah (6 lia̍p gue̍h-înn ê tuā-sè). Lāi-té koh ū huat-siā-sing-hûn IC 1318 kah khai-hòng-sing-thuân NGC 6910. Siòng-phìnn uá tíng-kuân leh huat-kng--ê, khuànn--khí-lâi ká-ná sī khì hōo tn̂g-tn̂g ê thôo-hún-tuà pun tsò nn̄g pîng ê ú-tiū si̍t-kóo. Sóo-í IC 1318 tsiah-ē kiò-tsò Iā-á-sing-hûn, tse mā tsiânn hó lí-kái. Thian-tin-it ê tsiànn-pîng sī tsi̍t tīn siàu-liân, tsa̍t-tsinn ê sing-thuân NGC 6910. Lán kàu Thian-tin-it ê kū-lî tsha-put-to sī 560 bió-tsha-kū, án-ni tsha-put-to sī 1800 kng-nî hn̄g. Lán kóo-kè IC 1318 kah NGC 6910 kàu lán ê kū-lî, tsha-put-to sī 2000 kàu 5000 kng-nî hiah-nī hn̄g.

[English] The Gamma Cygni Nebula

Supergiant star Gamma Cygni is at the center of the Northern Cross. Near the plane of our Milky Way galaxy, that famous asterism flies high in northern summer night skies in the constellation Cygnus the Swan. Known by the proper name Sadr, Gamma Cygni also lies just below center in this telescopic skyscape, with colors mapped from both broadband and narrowband image data. The field of view spans about 3 degrees (six Full Moons) on the sky and includes emission nebula IC 1318 and open star cluster NGC 6910. Filling the upper part of the frame and shaped like two glowing cosmic wings divided by a long dark dust lane, IC 1318's popular name is understandably the Butterfly Nebula. Right of Gamma Cygni, are the young, still tightly grouped stars of NGC 6910. The distance to Gamma Cygni is around 560 parsecs or 1,800 light-years. Estimates for IC 1318 and NGC 6910 range from 2,000 to 5,000 light-years.

詞彙學習