日食 ê 紅色佛光

Page(/daily/2022/05/20220530)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 日食 ê 紅色佛光

彼个島嶼後壁是發生啥物代誌? 有一寡咱臆會著–ê,有一寡咱臆袂著–ê。 臆會著–ê,應該是圖內底 ê 光線,這嘛叫做 佛光,是 ùi 日頭 來–ê。 臆袂著–ê,是 日頭 tī 頂個月底拄著 日偏食,去予 月娘 閘去矣。 臆會著–ê,是 日光 遮爾光,ùi 地平線下底 ê 雲 ê 閬縫透光過來。 臆袂著–ê,是 佛光 遮爾紅,可能是 地球大氣層 內底有足濟 氣溶膠,kā 大部份 ê 藍光散射去矣。 臆會著–ê,是向望會當疊出一張 月娘 kah 日頭 同齊出現 ê 紀念性景色。 是講真不幸,tī 遮,ùi 烏拉圭阿根廷 ê 方向看,雲 kā 日食閘牢矣! 這嘛毋是完全臆袂著。 毋閣,等 in 包袱仔款款咧轉去了後,煞發現翕著美麗閣光 ê 紅色佛光。 這真正是臆袂著–ê 啦! 順紲講一下,彼个 tī 地平線 ê 島嶼,其實是兩个

[POJ] Ji̍t-si̍t ê Âng-sek hu̍t-kng

Hit ê tó-sū āu-piah sī hoat-seng siáⁿ-mih tāi-chì? Ū chi̍t-kóa lán ioh ē-tio̍h–ê, ū chi̍t-kóa lán ioh bōe-tio̍h–ê. Ioh ē-tio̍h–ê, èng-kai sī tô͘ lāi-té ê kng-sòaⁿ, che mā kiò-chò hu̍t-kng, sī ùi ji̍t-thâu lâi–ê. Ioh bōe-tio̍h–ê, sī ji̍t-thâu tī téng kò goe̍h tú-tio̍h ji̍t-phian-si̍t, khì hō͘ goe̍h-niû cha̍h–khì ah. Ioh ē-tio̍h–ê, sī ji̍t-kng chiah-nī kng, ùi tē-pêng-sòaⁿ ē-té ê hûn ê làng-phāng thàu-kng–kòe-lâi. Ioh bōe-tio̍h–ê, sī hu̍t-kng chiah-nī âng, khó-lêng sī Tē-kiû tōa-khì-chân lāi-té ū chiok chōe khì-iûⁿ-ka, kā tōa-pō͘-hūn ê nâ-kng sàn-siā khì ah. Ioh ē-tio̍h–ê, sī ǹg-bāng ē-tàng tha̍h chhut chi̍t tiuⁿ goe̍h-niû kah ji̍t-thâu tâng-chê ê kì-liām-sèng kéng-sek. Sī kóng chin put-hēng, tī chia, ùi O͘-la-kui hiòng A-kun-têng ê hong-hiòng khòaⁿ, hûn kā ji̍t-si̍t cha̍h-tiâu ah! Che mā m̄-sī oân-choân ioh bōe-tio̍h. M̄-koh, tán in pau-ho̍k-á khoán-khoán–leh tńg–khì liáu-āu, soah hoat-hiān hip-tio̍h bí-lē koh kng ê âng-sek hu̍t-kng. Che chin-chiàⁿ sī ioh bōe-tio̍h–ê la̍h! Sūn-sòa kóng chi̍t-ē, hit ê tī tē-pêng-sòaⁿ ê tó-sū, kî-si̍t sī nn̄g-ê.

[KIP] Ji̍t-si̍t ê Âng-sik hu̍t-kng

Hit ê tó-sū āu-piah sī huat-sing siánn-mih tāi-tsì? Ū tsi̍t-kuá lán ioh ē-tio̍h–ê, ū tsi̍t-kuá lán ioh buē-tio̍h–ê. Ioh ē-tio̍h–ê, ìng-kai sī tôo lāi-té ê kng-suànn, tse mā kiò-tsò hu̍t-kng, sī uì ji̍t-thâu lâi–ê. Ioh buē-tio̍h–ê, sī ji̍t-thâu tī tíng kò gue̍h tú-tio̍h ji̍t-phian-si̍t, khì hōo gue̍h-niû tsa̍h–khì ah. Ioh ē-tio̍h–ê, sī ji̍t-kng tsiah-nī kng, uì tē-pîng-suànn ē-té ê hûn ê làng-phāng thàu-kng–kuè-lâi. Ioh buē-tio̍h–ê, sī hu̍t-kng tsiah-nī âng, khó-lîng sī Tē-kiû tuā-khì-tsân lāi-té ū tsiok tsuē khì-iûnn-ka, kā tuā-pōo-hūn ê nâ-kng sàn-siā khì ah. Ioh ē-tio̍h–ê, sī ǹg-bāng ē-tàng tha̍h tshut tsi̍t tiunn gue̍h-niû kah ji̍t-thâu tâng-tsê ê kì-liām-sìng kíng-sik. Sī kóng tsin put-hīng, tī tsia, uì Oo-la-kui hiòng A-kun-tîng ê hong-hiòng khuànn, hûn kā ji̍t-si̍t tsa̍h-tiâu ah! Tse mā m̄-sī uân-tsuân ioh buē-tio̍h. M̄-koh, tán in pau-ho̍k-á khuán-khuán–leh tńg–khì liáu-āu, suah huat-hiān hip-tio̍h bí-lē koh kng ê âng-sik hu̍t-kng. Tse tsin-tsiànn sī ioh buē-tio̍h–ê la̍h! Sūn-suà kóng tsi̍t-ē, hit ê tī tē-pîng-suànn ê tó-sū, kî-si̍t sī nn̄g-ê.

[English] Red Crepuscular Rays from an Eclipse

What’s happening behind that island? Things both expected and unexpected. Expected, perhaps, the pictured rays of light – called crepuscular rays – originate from the Sun. Unexpected, though, the Sun was being partially eclipsed by the Moon at the time – late last month. Expected, perhaps, the Sun’s rays are quite bright as they shine through gaps in below-horizon clouds. Unexpected, though, the crepuscular rays are quite red, likely the result an abundance of aerosols in Earth’s atmosphere scattering away much of the blue light. Expected, with hope, a memorable scene featuring both the Moon and the Sun, superposed. Unfortunately, from this location – in Uruguay looking toward Argentina – clouds obscured the eclipse – which wasn’t completely unexpected. However, after packing up to go home, the beauty of bright red crepuscular rays emerged – quite unexpectedly. Oh – and that island on the horizon – it’s really two islands.

詞彙學習(漢羅/POJ/KIP/華語/English)

  • 【日食】ji̍t-si̍t/ji̍t-si̍t/日食/solar eclipse
  • 【日偏食】ji̍t-phian-si̍t/ji̍t-phian-si̍t/日偏食/partial solar eclipse
  • 【佛光】hu̍t-kng/hu̍t-kng/佛光、耶穌光/crepuscular rays
  • 【氣溶膠】khì-iûⁿ-ka/khì-iûnn-ka/氣溶膠/aerosol
  • 【煙霧質】ian-bū-chit/ian-bū-tsit/氣溶膠/aerosol
  • 【散射】sàn-siā/sàn-siā/散射/scatter
  • 【烏拉圭】O͘-la-kui/Oo-la-kui/烏拉圭/Uruguay
  • 【阿根廷】A-kun-têng/A-kun-tîng/阿根廷/Argentina

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:TNG50 ê 模擬:一个星系團 ê 形成 明仔載 ê 圖:火箭 ùi 有波紋 ê 太陽面頭前飛過