土衛六 Titan：Ùi 土星面頂飛過 ê 衛星

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Titan: Moon over Saturn
• 影像來源：NASA, JPL-Caltech, Space Science Institute
• 台文翻譯：An-Li Tsai (NCU)

[漢羅] 土衛六 Titan：Ùi 土星面頂飛過 ê 衛星

Kah 地球 ê 衛星仝款，土星上大粒 ê 衛星，土衛六 Titan，嘛去予土星鎖牢，綴伊同步自轉矣！ 這張拼鬥影像 是 Cassini 太空船 tī 2012 年 5 月彼陣記錄--ê。 這爿毋是向土星彼爿，是 永遠離 有環 ê 氣體巨行星較遠彼爿。 土衛六 Titan 是太陽系內底，唯一有實密大氣層 ê 衛星。 嘛是 太陽系 內底，除了地球以外，地表固定有液體 ê 所在。 伊 kah 地球仝款，有 落雨 kah 蒸發 ê 循環。 這个證據，就 tī Cassini 太空船翕著 ê 這張相片內底。 咱看會著這粒 tī 土星環 kah 土星雲頂懸、直徑 5000 公里闊 ê 衛星，tī 較懸海拔 ê 所在，有一層大氣雲霧。 中央附近 烏烏--ê 是沙崙區，咱 kā 叫做 Shangri-La。 Cassini 太空船 送出去 ê Huygens 探測船，降落 tī 土衛六 Titan，這是 離地球上遠 ê 一擺降落。 伊落尾就 tī 倚中央 ê 倒爿下跤遐安息。

[POJ] Thó͘-ūi la̍k Titan: Ùi Thó͘-chhiⁿ bīn-téng poe kòe ê Ūi-chhiⁿ

Kah Tē-kiû ê ūi-chhiⁿ kāng-khoán, Thó͘-chhiⁿ siōng tōa lia̍p ê ūi-chhiⁿ, Thó͘-ūi la̍k Titan, mā khì hō͘ Thó͘-chhiⁿ só-tiâu tòe i tông-pō͘-chū-choán ah! Chit tiuⁿ pheng-tàu iáⁿ-siōng sī Cassini thài-khong-chûn tī 2012 nî 5 goe̍h hit-chūn kì-lo̍k--ê. Chit pêng m̄-sī hiòng Thó͘-chhiⁿ hit pêng, sī lî ū khoân ê khì-thé kū kiâⁿ-chhiⁿ khah hn̄g e̍k-théhit pêng. Thó͘-ūi la̍k Titan sī Thài-iông-hē lāi-té, ûi-it ū cha̍t-ba̍t tōa-khì-chân ê ūi-chhiⁿ. Mā sī Thài-iông-hē lāi-té, tû-liáu Tē-kiû ì-gōa, tē-piáu kò͘-tēng ū e̍k-thé ê só͘-chāi. I kah Tē-kiû kāng-khoán, ū lo̍h-hō͘ kah cheng-hoat ê sûn-khoân. Chit ê chèng-kù, tō tī Cassini thài-khong-chûn hip tio̍h ê chit tiuⁿ siòng-phìⁿ lāi-té. Lán khòaⁿ-ē-tio̍h chit lia̍p tī Thó͘-chhiⁿ-khoân kah Thó͘-chhiⁿ hûn téng-koân, ti̍t-kèng 5000 kong-lí khoah ê ūi-chhiⁿ, tī khah koân hái-poa̍t ê só͘-chāi, ū chi̍t chân tōa-khì hûn bū. Tiong-ng hū-kīn o͘-o͘--ê sī soa-lūn khu, lán kā kiò-chò Shangri-La. Cassini thài-khong-chûn sàng--chhut-khì ê Huygens thàm-chhek-chûn, kàng-lo̍h tī Thó͘-ūi la̍k Titan, che sī lî tē-piáu siōng hn̄g ê chi̍t pái kàng-lo̍h. I lo̍h-bóe tō tī óa tiong-ng ê tò-pêng ē-kha hiah an-si̍t.

[KIP] Thóo-uī la̍k Titan: Uì Thóo-tshinn bīn-tíng pue kuè ê Uī-tshinn

Kah Tē-kiû ê uī-tshinn kāng-khuán, Thóo-tshinn siōng tuā lia̍p ê uī-tshinn, Thóo-uī la̍k Titan, mā khì hōo Thóo-tshinn só-tiâu tuè i tông-pōo-tsū-tsuán ah! Tsit tiunn phing-tàu iánn-siōng sī Cassini thài-khong-tsûn tī 2012 nî 5 gue̍h hit-tsūn kì-lo̍k--ê. Tsit pîng m̄-sī hiòng Thóo-tshinn hit pîng, sī lî ū khuân ê khì-thé kū kiânn-tshinn khah hn̄g hit pîng. Thóo-uī la̍k Titan sī Thài-iông-hē lāi-té, uî-it ū tsa̍t-ba̍t tuā-khì-tsân ê uī-tshinn. Mā sī Thài-iông-hē lāi-té, tû-liáu Tē-kiû ì-guā, tē-piáu kòo-tīng ū i̍k-thé ê sóo-tsāi. I kah Tē-kiû kāng-khuán, ū lo̍h-hōo kah tsing-huat ê sûn-khuân. Tsit ê tsìng-kù, tō tī Cassini thài-khong-tsûn hip tio̍h ê tsit tiunn siòng-phìnn lāi-té. Lán khuànn-ē-tio̍h tsit lia̍p tī Thóo-tshinn-khuân kah Thóo-tshinn hûn tíng-kuân, ti̍t-kìng 5000 kong-lí khuah ê uī-tshinn, tī khah kuân hái-pua̍t ê sóo-tsāi, ū tsi̍t tsân tuā-khì hûn bū. Tiong-ng hū-kīn oo-oo--ê sī sua-lūn khu, lán kā kiò-tsò Shangri-La. Cassini thài-khong-tsûn sàng--tshut-khì ê Huygens thàm-tshik-tsûn, kàng-lo̍h tī Thóo-uī la̍k Titan, tse sī lî tē-piáu siōng hn̄g ê tsi̍t pái kàng-lo̍h. I lo̍h-bué tō tī uá tiong-ng ê tò-pîng ē-kha hiah an-si̍t.

[English] Titan: Moon over Saturn

Like Earth's moon, Saturn's largest moon Titan is locked in synchronous rotation. This mosaic of images recorded by the Cassini spacecraft in May of 2012 shows its anti-Saturn side, the side always facing away from the ringed gas giant. The only moon in the solar system with a dense atmosphere, Titan is the only solar system world besides Earth known to have standing bodies of liquid on its surface and an earthlike cycle of liquid rain and evaporation. Its high altitude layer of atmospheric haze is evident in the Cassini view of the 5,000 kilometer diameter moon over Saturn's rings and cloud tops. Near center is the dark dune-filled region known as Shangri-La. The Cassini-delivered Huygens probe rests below and left of center, after the most distant landing for a spacecraft from Earth.

詞彙學習