鬧熱滾滾 ê 內海仔星雲中央

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：The Lively Center of the Lagoon Nebula
• 影像來源：NASA, ESA, Hubble; 影像處理 kah 版權：Mehmet Hakan Özsaraç
• 超空間：APOD 亂數產生器
• 台文翻譯：An-Li Tsai (NCU)

[漢羅] 鬧熱滾滾 ê 內海仔星雲中央

內海仔星雲中央有 高速捲踅、足壯觀 ê 恆星形成。 咱看會著相片中心附近，上無有兩个長長 ê 漏仔形雲，一个差不多有半 光年 長，是極端 恆星風 kah 強力恆星光 形成--ê。 這是附近超級光 ê 恆星 Herschel 36 kā 這區照予光--ê。 寬闊 ê 塗粉 牆 kā 其他高溫少年 ê 恆星藏 tī 內底，閣 kā in 發出 ê 光變較紅咧。 這寡恆星 ê 能量入去到 低溫 ê 塗粉 kah 氣體內底，會 kah 隔壁 ê 物質 產生足大 ê 溫度差，結果就會產生 剪切風，造成 漏仔形 ê 雲。 這張相片 差不多有 10 光年闊，是 kā 踅地球咧行 ê Hubble 太空望遠鏡 翕 ê 六種色光影像，鬥做一張--ê。 內海仔星雲 嘛叫做 M8，伊 chhāi tī 離咱 5000 光年 遠 ê 射手 座（嘛叫做 人馬座）遐。

[POJ] Lāu-jia̍t kún-kún ê Lāi-hái-á seng-hûn tiong-ng

Lāi-hái-á seng-hûn tiong-ng ū ko-sok kńg-se̍h, chiok chòng-koan ê hêng-chhiⁿ hêng-sêng. Lán khòaⁿ-ē-tio̍h siòng-phìⁿ tiong-sim hū-kīn, siōng bô ū nn̄g-ê tn̂g-tn̂g ê lāu-á hêng hûn, chi̍t ê chha-put-to ū pòaⁿ kng-nî tn̂g, sī ke̍k-toan hêng-chhiⁿ-hong kah kiông-le̍k hêng-chhiⁿ-kng hêng-sêng--ê. Che sī hū-kīn chhiau-kip kng ê hêng-chhiⁿ Herschel 36 kā chit khu chiò hō͘ kng--ê. Khoan-khoah ê thô͘-hún-chhiûⁿ kā kî-tha ko-un siàu-liân ê hêng-chhiⁿ chhàng tī lāi-té, koh kā in hoat--chhut ê kng piàn khah âng leh. Chit kóa hêng-chhiⁿ ê lêng-liōng ji̍p-khì kàu kē-un ê thô͘-hún kah khì-thé lāi-té, ē kah keh-piah ê bu̍t-chit sán-seng chiok tōa ê un-tō͘ chha, kiat-kó tō ē sán-seng chián-chhiat-hong, chō-sêng lāu-á hêng ê hûn. Chit tiuⁿ siòng-phìⁿ chha-put-to ū 10 kng-nî khoah, sī kā se̍h Tē-kiû leh kiâⁿ ê Hubble Thài-khong-bōng-oán-kiàⁿ hip ê la̍k chióng sek-kng iáⁿ-siōng, tàu chò chi̍t tiuⁿ--ê. Lāi-hái-á seng-hûn mā kiò-chò M8, i chhāi tī lí lán 5000 kng-n̄g hn̄g ê Siâ-chhiut-chò (mā kiò-chò Jîn-má-chō) hiah.

[KIP] Lāu-jia̍t kún-kún ê Lāi-hái-á sing-hûn tiong-ng

Lāi-hái-á sing-hûn tiong-ng ū ko-sok kńg-se̍h, tsiok tsòng-kuan ê hîng-tshinn hîng-sîng. Lán khuànn-ē-tio̍h siòng-phìnn tiong-sim hū-kīn, siōng bô ū nn̄g-ê tn̂g-tn̂g ê lāu-á hîng hûn, tsi̍t ê tsha-put-to ū puànn kng-nî tn̂g, sī ki̍k-tuan hîng-tshinn-hong kah kiông-li̍k hîng-tshinn-kng hîng-sîng--ê. Tse sī hū-kīn tshiau-kip kng ê hîng-tshinn Herschel 36 kā tsit khu tsiò hōo kng--ê. Khuan-khuah ê thôo-hún-tshiûnn kā kî-tha ko-un siàu-liân ê hîng-tshinn tshàng tī lāi-té, koh kā in huat--tshut ê kng piàn khah âng leh. Tsit kuá hîng-tshinn ê lîng-liōng ji̍p-khì kàu kē-un ê thôo-hún kah khì-thé lāi-té, ē kah keh-piah ê bu̍t-tsit sán-sing tsiok tuā ê un-tōo tsha, kiat-kó tō ē sán-sing tsián-tshiat-hong, tsō-sîng lāu-á hîng ê hûn. Tsit tiunn siòng-phìnn tsha-put-to ū 10 kng-nî khuah, sī kā se̍h Tē-kiû leh kiânn ê Hubble Thài-khong-bōng-uán-kiànn hip ê la̍k tsióng sik-kng iánn-siōng, tàu tsò tsi̍t tiunn--ê. Lāi-hái-á sing-hûn mā kiò-tsò M8, i tshāi tī lí lán 5000 kng-n̄g hn̄g ê Siâ-tshiut-tsò (mā kiò-tsò Jîn-má-tsō) hiah.

[English] The Lively Center of the Lagoon Nebula

The center of the Lagoon Nebula is a whirlwind of spectacular star formation. Visible near the image center, at least two long funnel-shaped clouds, each roughly half a light-year long, have been formed by extreme stellar winds and intense energetic starlight. A tremendously bright nearby star, Herschel 36, lights the area. Vast walls of dust hide and redden other hot young stars. As energy from these stars pours into the cool dust and gas, large temperature differences in adjoining regions can be created generating shearing winds which may cause the funnels. This picture, spanning about 10 light years, combines images taken in six colors by the orbiting Hubble Space Telescope. The Lagoon Nebula, also known as M8, lies about 5000 light years distant toward the constellation of the Archer (Sagittarius).

詞彙學習