阿根廷 ê 日偏食

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Partial Solar Eclipse over Argentina
• 影像來源 kah 版權：Aixa Andrada
• 台文翻譯：An-Li Tsai (NCU)

[漢羅] 阿根廷 ê 日偏食

太陽是發生啥物代誌咧？ 兩工前，南美一寡所在發生 日偏食。 日偏食就是日頭有一部份去予月娘 閘去 矣。 這張 迵過雲 ê 日偏食相片，是日頭 tī 阿根廷 Patagonia 日落彼陣翕 ê。 Tī 這張趨趨 ê 相片內底，地球是 tī 正爿。 這擺 ê 日食，是月娘有一部份行到 地球 kah 太陽之間。 雖罔講這張相片 予人印象足深 ê，毋閣因為日偏食造成環境變暗 ê 影響，是比日頭去予厚雲閘著 ê 影響閣較少。 差不多閣兩禮拜，全 南美 kah 一部份 ê 北美 就會看著月全食 矣！ 月全食就是地球行到 月球 kah 太陽之間。 差不多閣兩冬，北美 就會看著 日全食 矣！

[POJ] A-kun-têng ê Ji̍t-phian-si̍t

Thài-iông sī hoat-seng siáⁿ-mih tāi-chì leh? Nn̄g kang chêng, Lâm-bí chi̍t-kóa só͘-chāi hoat-seng ji̍t-phian-si̍t. Ji̍t-phian-si̍t to̍h sī ji̍t-thâu ū chi̍t-pō͘-hūn khì hō͘ goe̍h-niû cha̍h--khì ah. Chit tiuⁿ thàng kòe hûn ê ji̍t-phian-si̍t siòng-phìⁿ, sī ji̍t-thâu tī A-kun-têng Patagonia ji̍t-lo̍h hit-chūn hip--ê. Tī chit tiuⁿ chhu-chhu ê siòng-phìⁿ lāi-té, Tē-kiû sī tī chiàⁿ-pêng. Chit pái ê ji̍t-si̍t, sī goe̍h-niû ū chi̍t-pō͘-hūn kiâⁿ kàu Tē-kiû kah Thài-iông chi-kan. Sui-bóng kóng chit tiuⁿ siòng-phìⁿ hō͘ lâng ìn-sióng chiok chhim ê, m̄-koh in-ūi ji̍t-phian-si̍t chō-sêng khoân-kéng piàn àm ê éng-hióng, sī pí ji̍t-thâu khì hō͘ kāu hûn cha̍h tio̍h ê éng-hióng koh khah chió. Chha-put-to koh nn̄g lé-pài, choân Lâm-bí kah chi̍t-pō͘-hūn Pak-bí to̍h ē khòaⁿ tio̍h goe̍h-choân-si̍t ah! Goe̍h-choân-si̍t to̍h sī Tē-kiû kiâⁿ kàu Goe̍h-kiû kah Thài-iông chi-kan. Chha-put-to koh nn̄g tang, Pak-bí to̍h ē khòaⁿ tio̍h ji̍t-choân-si̍t ah!

[KIP] A-kun-tîng ê Ji̍t-phian-si̍t

Thài-iông sī huat-sing siánn-mih tāi-tsì leh? Nn̄g kang tsîng, Lâm-bí tsi̍t-kuá sóo-tsāi huat-sing ji̍t-phian-si̍t. Ji̍t-phian-si̍t to̍h sī ji̍t-thâu ū tsi̍t-pōo-hūn khì hōo gue̍h-niû tsa̍h--khì ah. Tsit tiunn thàng kuè hûn ê ji̍t-phian-si̍t siòng-phìnn, sī ji̍t-thâu tī A-kun-tîng Patagonia ji̍t-lo̍h hit-tsūn hip--ê. Tī tsit tiunn tshu-tshu ê siòng-phìnn lāi-té, Tē-kiû sī tī tsiànn-pîng. Tsit pái ê ji̍t-si̍t, sī gue̍h-niû ū tsi̍t-pōo-hūn kiânn kàu Tē-kiû kah Thài-iông tsi-kan. Sui-bóng kóng tsit tiunn siòng-phìnn hōo lâng ìn-sióng tsiok tshim ê, m̄-koh in-uī ji̍t-phian-si̍t tsō-sîng khuân-kíng piàn àm ê íng-hióng, sī pí ji̍t-thâu khì hōo kāu hûn tsa̍h tio̍h ê íng-hióng koh khah tsió. Tsha-put-to koh nn̄g lé-pài, tsuân Lâm-bí kah tsi̍t-pōo-hūn Pak-bí to̍h ē khuànn tio̍h gue̍h-tsuân-si̍t ah! Gue̍h-tsuân-si̍t to̍h sī Tē-kiû kiânn kàu Gue̍h-kiû kah Thài-iông tsi-kan. Tsha-put-to koh nn̄g tang, Pak-bí to̍h ē khuànn tio̍h ji̍t-tsuân-si̍t ah!

[English] Partial Solar Eclipse over Argentina

What's happened to the Sun? Two days ago, parts of South America were treated to a partial solar eclipse -- where the Moon blocked out part of the Sun. The featured image shows an image of the partially eclipsed Sun through clouds as it was setting over Patagonia, Argentina. In the tilted image, Earth is toward the right. During the eclipse, the Moon moved partly between Earth and the Sun. Although a visually impressive sight, the slight dimming of surroundings during this partial eclipse was less noticeable than dimming created by a thick cloud. In about two weeks, all of South America and part of North America will experience a total lunar eclipse -- where the Earth moves completely between the Moon and the Sun. In about two years, a total solar eclipse will cross North America.

詞彙學習