木星表面的木衛烏影

探索宇宙¹！逐工會揀一幅無仝款 ê 影像抑是相片，𤆬你熟似咱這个迷人 ê 宇宙，閣有專業天文學者²為你解說³。

• 原始文章：Moon Shadow on Jupiter
• 影像來源：NASA/JPL-Caltech/SwRI/MSSS; 資料處理 kah 許可：Thomas Thomopoulos
• 探索宇宙：APOD 亂數產生器
• 台文翻譯：An-Li Tsai (NCU)

[漢羅] 木星表面的木衛烏影

木星表面彼个大烏點是啥物？ 彼是 木衛三 Ganymede 的烏影。 伊是 木星 上大粒的衛星。 木衛 若是行到木星四大衛星佮太陽之間，in 就會佇木星表面 產生烏影。 這就和 月娘行到 地球佮太陽之間仝款。 佮佇地球仝款，你若是 chhāi 佇 木星表面的烏影 遐，木衛就會共太陽完全閘去，按呢你就會看著 日全食 矣。 毋閣佮地球無仝的是，木衛的烏影 會定定出現。 閣較無四常 的是，太空船離 in 有夠近的，才會記錄著這張 高解析度 的 影像。 Juno 太空船 佇二月底彼陣飛到 木星 附近，所以離太空船較近的木星雲佮木衛的烏影才會看起來 遮爾大。 木星是 太陽系 上大粒的行星。 Juno 太空船已經佇木星面頂，揣著足濟新的發現，嘛包括最近 高速擴大的圓形極光。

[POJ] Bo̍k-chhiⁿ piáu-bīn ê Bo̍k-ūi o͘-iáⁿ

Bo̍k-chhiⁿ piáu-bīn hit-ê tōa o͘-tiám sī siáⁿ-mih? He sī Bo̍k-ūi-saⁿ Ganymede ê o͘-iáⁿ. I sī Bo̍k-chhiⁿ siōng tōa-lia̍p ê ūi-chhiⁿ. Bo̍k-ūi nā-sī kiâⁿ kàu Bo̍k-chhiⁿ Sì-tōa-ūi-chhiⁿ kah Thài-iông chi-kan, in to̍h ē tī Bo̍k-chhiⁿ piáu-bīn sán-seng o͘-iáⁿ. Che to̍h hām Goe̍h-niû kiâⁿ kàu Tē-kiû kah Thài-iông chi-kan kāng-khoán. Kah tī Tē-kiû kāng-khoán, lí nā-sī chhāi tī Bo̍k-chhiⁿ piáu-bīn ê o͘-iáⁿ hiah, Bo̍k-ūi to̍h ē kā Thài-iông oân-choân cha̍h khì, án-ni lí to̍h ē khòaⁿ tio̍h ji̍t-choân-si̍t ah. M̄-koh kah Tē-kiû bô-kâng ê sī, Bo̍k-ūi ê o͘-iáⁿ ē tiāⁿ-tiāⁿ chhut-hiān. Koh khah bô sù-siông ê sī, Thài-khong-chûn lî in ū-kàu kīn--ê, chiah ē kì-lo̍k tio̍h chit tiuⁿ ko kái-sek-tō͘ ê iáⁿ-siōng. Juno Thài-khong-chûn tī jī goe̍h té hit-chūn poe kàu Bo̍k-chhiⁿ hū-kīn, só͘-í lî thài-khong-chûn khah kīn ê Bo̍k-chhiⁿ-hûn kah Bo̍k-ūi ê o͘-iáⁿ chiah ē khòaⁿ--khí-lâi chiah-nī tōa. Bo̍k-chhiⁿ sī Thài-iông-hē siōng tōa lia̍p ê kiâⁿ-chhiⁿ. Juno Thài-khong-chûn í-keng tī Bo̍k-chhiⁿ bīn-téng, chhōe tio̍h chiok chōe sin--ê hoat-hiān, mā pau-koat chòe-kīn ko-sok khok-tōa ê îⁿ-hêng ke̍k-kng.

[KIP] Bo̍k-tshinn piáu-bīn ê Bo̍k-uī oo-iánn

Bo̍k-tshinn piáu-bīn hit-ê tuā oo-tiám sī siánn-mih? He sī Bo̍k-uī-sann Ganymede ê oo-iánn. I sī Bo̍k-tshinn siōng tuā-lia̍p ê uī-tshinn. Bo̍k-uī nā-sī kiânn kàu Bo̍k-tshinn Sì-tuā-uī-tshinn kah Thài-iông tsi-kan, in to̍h ē tī Bo̍k-tshinn piáu-bīn sán-sing oo-iánn. Tse to̍h hām Gue̍h-niû kiânn kàu Tē-kiû kah Thài-iông tsi-kan kāng-khuán. Kah tī Tē-kiû kāng-khuán, lí nā-sī tshāi tī Bo̍k-tshinn piáu-bīn ê oo-iánn hiah, Bo̍k-uī to̍h ē kā Thài-iông uân-tsuân tsa̍h khì, án-ni lí to̍h ē khuànn tio̍h ji̍t-tsuân-si̍t ah. M̄-koh kah Tē-kiû bô-kâng ê sī, Bo̍k-uī ê oo-iánn ē tiānn-tiānn tshut-hiān. Koh khah bô sù-siông ê sī, Thài-khong-tsûn lî in ū-kàu kīn--ê, tsiah ē kì-lo̍k tio̍h tsit tiunn ko kái-sik-tōo ê iánn-siōng. Juno Thài-khong-tsûn tī jī gue̍h té hit-tsūn pue kàu Bo̍k-tshinn hū-kīn, sóo-í lî thài-khong-tsûn khah kīn ê Bo̍k-tshinn-hûn kah Bo̍k-uī ê oo-iánn tsiah ē khuànn--khí-lâi tsiah-nī tuā. Bo̍k-tshinn sī Thài-iông-hē siōng tuā lia̍p ê kiânn-tshinn. Juno Thài-khong-tsûn í-king tī Bo̍k-tshinn bīn-tíng, tshuē tio̍h tsiok tsuē sin--ê huat-hiān, mā pau-kuat tsuè-kīn ko-sok khok-tuā ê înn-hîng ki̍k-kng.

[English] Moon Shadow on Jupiter

What is that large dark spot on Jupiter? It's the shadow of Ganymede, one of Jupiter's largest moons. When Jupiter's moons cross between the Jovian giant and the Sun, they created shadows just like when the Earth's moon crosses between the Earth and the Sun. Also like on Earth, if you were in a dark shadow on Jupiter, you would see a moon completely eclipse the Sun. Unlike on Earth, moon shadows occur most days on Jupiter -- what's more unusual is that a spacecraft was close enough to record one with a high-resolution image. That spacecraft, Juno, was passing so close to Jupiter in late February that nearby clouds and the dark eclipse shadow appear relatively large. Juno has made many discoveries about our Solar System's largest planet, including, recently, rapidly expanding circular auroras.

詞彙學習