魔鬼塔天頂 ê 銀河

Page(/daily/2022/04/20220413)

探索宇宙1!逐工會揀一幅無仝款 ê 影像抑是相片,𤆬你熟似咱這个迷人 ê 宇宙,閣有專業天文學者2為你解說3

[漢羅] 魔鬼塔天頂 ê 銀河

魔鬼塔是按怎來 ê? 這是 tī 美國 Wyoming 州 ê 特殊 大岩石,伊 ê 起源到底是啥,到今猶 leh 冤。 有一个主要 ê 假說是講,這是以前一寡無機會流到地表變做火山 ê 熔岩煙流,𠕇–去了後煞變做這款岩石。 這个理論 閣講,以前 tī 這个密度較懸 ê 火山頷頸外口,捌包一輾較輕 ê 岩石,毋閣這馬已經去予侵蝕了了矣。 賰 ê 部份 to̍h 變做這个 壯觀 ê 石塔美洲原住民 kā 伊叫做 熊的旅館 抑是 殕色的大喇叭。 這个實密 ê 岩石有地球面頂上長 ê 六角 形體,有超過 180 公尺懸。 相片面頂較懸彼塔,有 銀河系 ê 中央帶 迒過天頂。 咱嘛看會著足濟有名 ê 天體。 Tī 石塔 ê 正爿,有烏巡 ê 薰吹星雲,kah 紅色 ê 內海仔星雲前景 有青色 ê 草仔 kah 樹仔,石塔 ê 倒爿地平線附近,有雲。 Kah 其他足濟國際地標無仝,魔鬼塔 是會使 peh ê。

[POJ] Mô͘-kúi-thah thiⁿ-téng ê Gîn-hô

Mô͘-kúi-thah sī án-ná lâi ê? Che sī tī Bí-kok Wyoming chiu ê te̍k-sû tōa-giâm-chio̍h, i ê khí-goân tàu-té sī siáⁿ, kàu-taⁿ iáu leh oan. Ū chi̍t-ê chú-iàu ê ká-soat sī kóng, che sī í-chêng chi̍t-kóa bô ki-hōe laû kàu tē-piáu piàn chò hóe-soaⁿ ê iông-giâm-ian-liû, tēng–khì liáu-āu soah piàn chò chit-khoán giâm-chio̍h. Chit-ê lí-lūn koh kóng, í-chêng tī chit-ê bi̍t-tō͘ khah koân ê hóe-soaⁿ ām-kún gōa-kháu, bat pau chi̍t-liàn khah khin ê giâm-chio̍h, m̄-koh chit-má í-keng khì hō͘ chhim-sit liáu-liáu ah. Chhun ê pō͘-hūn to̍h piàn chò chit-ê chòng-koan ê chio̍h-thah. Bí-chiu goân-chū-bîn kā i kiò-chò Hîm ê lú-koán iah-sī phú-sek ê tōa-lá-pah. Chit-ê cha̍t-ba̍t ê giâm-chio̍h ū Tē-kiû bīn-téng siōng tn̂g ê la̍k-kak-thiāu hêng-thé, ū chhiau-kòe 180 kong-chhioh koân. Siòng-phìⁿ bīn-téng khah koân hit tah, ū Gîn-hô-hē ê tiong-ng-tòa hāⁿ kòe thiⁿ-téng. Lán mā khòaⁿ-ē-tio̍h chiok chōe ū-miâ ê thian-thé. Tī chio̍h-thah ê chiàⁿ-pêng, ū o͘-sûn ê Hun-chhoe-seng-hûn, kah âng-sek ê Lāi-hái-á-seng-hûn. Chiân-kéng ū chhiⁿ-sek ê chháu-á kah chhiū-á, chio̍h-thah ê tò-pêng tē-pêng-sòaⁿ hū-kīn ū hûn. Kah kî-tha chiok chōe kok-chè-tē-piáu bô-kâng, Mô͘-kúi-thah sī ē-sái peh ê.

[KIP] Môo-kuí-thah thinn-tíng ê Gîn-hô

Môo-kuí-thah sī án-ná lâi ê? Tse sī tī Bí-kok Wyoming tsiu ê ti̍k-sû tuā-giâm-tsio̍h, i ê khí-guân tàu-té sī siánn, kàu-tann iáu leh uan. Ū tsi̍t-ê tsú-iàu ê ká-suat sī kóng, tse sī í-tsîng tsi̍t-kuá bô ki-huē laû kàu tē-piáu piàn tsò hué-suann ê iông-giâm-ian-liû, tīng–khì liáu-āu suah piàn tsò tsit-khuán giâm-tsio̍h. Tsit-ê lí-lūn koh kóng, í-tsîng tī tsit-ê bi̍t-tōo khah kuân ê hué-suann ām-kún guā-kháu, bat pau tsi̍t-liàn khah khin ê giâm-tsio̍h, m̄-koh tsit-má í-king khì hōo tshim-sit liáu-liáu ah. Tshun ê pōo-hūn to̍h piàn tsò tsit-ê tsòng-kuan ê tsio̍h-thah. Bí-tsiu guân-tsū-bîn kā i kiò-tsò Hîm ê lú-kuán iah-sī phú-sik ê tuā-lá-pah. Tsit-ê tsa̍t-ba̍t ê giâm-tsio̍h ū Tē-kiû bīn-tíng siōng tn̂g ê la̍k-kak-thiāu hîng-thé, ū tshiau-kuè 180 kong-tshioh kuân. Siòng-phìnn bīn-tíng khah kuân hit tah, ū Gîn-hô-hē ê tiong-ng-tuà hānn kuè thinn-tíng. Lán mā khuànn-ē-tio̍h tsiok tsuē ū-miâ ê thian-thé. Tī tsio̍h-thah ê tsiànn-pîng, ū oo-sûn ê Hun-tshue-sing-hûn, kah âng-sik ê Lāi-hái-á-sing-hûn. Tsiân-kíng ū tshinn-sik ê tsháu-á kah tshiū-á, tsio̍h-thah ê tò-pîng tē-pîng-suànn hū-kīn ū hûn. Kah kî-tha tsiok tsuē kok-tsè-tē-piáu bô-kâng, Môo-kuí-thah sī ē-sái peh ê.

[English] Milky Way over Devils Tower

What created Devils Tower? The origin of this extraordinary rock monolith in Wyoming, USA is still debated, with a leading hypothesis holding that it is a hardened lava plume that never reached the surface to become a volcano. In this theory, the lighter rock that once surrounded the dense volcanic neck has now eroded away, leaving the dramatic tower. Known by Native Americans by names including Bear’s Lodge and Great Gray Horn, the dense rock includes the longest hexagonal columns known, some over 180-meters tall. High above, the central band of the Milky Way galaxy arches across the sky. Many notable sky objects are visible, including dark strands of the Pipe Nebula and the reddish Lagoon Nebula to the tower’s right. Green grass and trees line the foreground, while clouds appear near the horizon to the tower’s left. Unlike many other international landmarks, mountaineers are permitted to climb Devils Tower.

詞彙學習(漢羅/POJ/KIP/華語/English)

  • 【魔鬼塔】Mô͘-kúi-thah/Môo-kuí-thah/魔鬼塔/Devils Tower
  • 【熔岩煙流】iông-giâm-ian-liû/iông-giâm-ian-liû/熔岩羽流/lava plume
  • 【𠕇–去】tēng-khì/tīng-khì/硬化/hardened
  • 【薰吹星雲】Hun-chhoe seng-hûn/Hun-tshue sing-hûn/煙斗星雲/Pipe Nebula
  • 【內海仔星雲】Lāi-hái-á-seng-hûn/Lāi-hái-á-sing-hûn/礁湖星雲/Lagoon Nebula
  • 【六角柱】la̍k-kak-thiāu/la̍k-kak-thiāu/六角柱/hexagonal [columns
  • 【銀河系】Gîn-hô-hē/Gîn-hô-hē/銀河系/Milky Way galaxy
  • 【中央帶】tiong-ng-tòa/tiong-ng-tuà/中央帶/central band
  • 【180 公尺】chi̍t-pah-peh-cha̍p kong-chhioh/tsi̍t-pah-peh-tsa̍p kong-tshioh/180 公尺/180 meters

  1. 阮嘛有 Podcast面冊InstagramTwitter,會逐工 kā 你提醒有新 ê 翻譯 kah 錄音。閣有 YouTube 頻道,有當時仔會出新 ê 影片,緊來追蹤! ↩︎

  2. 本站 ê 介紹 (台語/華語)FAQ (華語) ↩︎

  3. 看無台文?阮讀予你聽!已經錄過 ê 文章 ↩︎

昨昏 ê 圖:N11:LMC 內底的恆星雲 明仔載 ê 圖:Messier 96